Read Alladian KEYUM KERO 8 Bible Online

KEYUM KERO 8 - Alladian bible

KEYUM KERO 8

¹Depe irongem, Shédíbí Noah melang bíkkíng etkunglo duumín gena simon-sili kídíem míípasula among teyongso asarko mutmoto. Delo puumue oolenkaku.

²Eerína siyéng kídí, sirung kídíemlang taleng telokke puumu gíko yapgo kídíem itumtoku; delo pedonge oyimato.

³Delo asie among sok longe língko kolang looying pilngokope ootítoku.

⁴Delokke poolo kíníd lokke looying kolang longe kínídlo Ararat lokke díítum kolo etkungde yuddasula dakto.

⁵Aside ootí langkula poolo íying lokke kerang longe delo dííte ponyuk kídíem kaapang lentoku.

⁶Looying appi méélam delo Noahbí bíkke omtonam etkung delokke kirkikonem siyyato.

⁷Bí paak konem melenla, de amosokke asie ooyin kumang tete deloope yopgong gootíto.

⁸Depe irongem Noahbí among si asie ongkakudí emla dem kangkípe pekíko melentoku.

⁹Idola amosok asie ooyin kumanam legape, bí unapeko kamala yopgoopala etkung delo yobatoku, dekepeila Noahbí alaglok umrík sulangkula etkung delo meangtoku.

¹⁰Bí longe kíníd kope dooya polangkula, lekoda etkung delok pekídem yoplen motoku.

¹¹Pekíde yumedan deme yobatoku, delo kaatoname bíkke nappang delo aní pakpe yinlenkuna olib esing anneko puabomdoku. Delo among sok asie ongkaku emla Noah bí kénto.

¹²Delo longe kínídko toya popalangkula, lekoda pekídem yoplen motoku, delo pekíde aalat sukumape yéyarkai.

¹³Noahke dítak língko akké kola taktelko ido delo, kerayalum poolo delokke longe kerang delok, among sok asie ooyintoku; Noah delo etkung dem mokapnam atíem laabín rodem kaatoname amonge pítíldoku.

¹⁴Poolo annyi lokke looying annyi kolang longe kínídnalo amonge pítíltoku.

¹⁵Delo Shédíbí Noahme sikepe poto,

¹⁶“No lang nok mime delokke nok oo kídíe lang buluke mime kídíe etkung sok lenlangkula delokke,

¹⁷amoso parla yédokupe, takam simon-sili, kebung-pettang emlang eggoona ato-siro tabunge amoso bojépe otíng-oyin kadokupe bulumte laalentokuka.”

¹⁸Depeila Noah lang bíkke oo kídíe lang bík mime delokke nyameng kídíe etkung delok gílento.

¹⁹Delokke simon-sili, kebung-pettang elang eggoona kídíe delokke amoso yékína tabunge erangsupe etkung delok gílentoku.

²⁰Delo Noah bí RUUTUM kepe rungguko píla deena simon sili emlang pettang kídílok laala runggu delo romnam amanpe romlíkbito.

²¹Edílo RUUTUM bí nampona arídem namtodí delo bík aapílo sipe posuto, “Tanike legape ngo amosim lekokom peyyimayé kapeila koo amélokkai tanike míípe-míngore atímang; Ngo lekoda ngok inam kísa turna ato-siro kídíem nyokmo yimayé.”

²²“Amosi turdung tetengem, ali-ayé ngiilík-replíkdíelang isum-sasumdíe, ansinge lang pamkie, díyue lang dígíne; longe lang yoe kayaryé.”