Read Alladian KEYUM KERO 9 Bible Online

KEYUM KERO 9 - Alladian bible

KEYUM KERO 9

¹Delo Noah melang bík oo kídídem Shédíbí utepooro ruulíkdola poto, “Otíng-oyin kalangka delokke parlangka delokke among sime bííbom langka.

²Nolume, simon-sili tabunge, kebung-pettang kídíe, engo kídíe eggoona ato-siro kídíe pesoyé, kapeila bulum noluke alaglo melíkbito.

³Turna ato-siro tabude noluke dopenampe iyé. Nolum kapekísa yayina nesi-neyangem bitudí, dekepe takamem ngo nolum bidung.

⁴Idola nolu iyyi kadupe adíneme domapeka, kapeila iyyilo turname kadung.

⁵Kapeila tani iyyiem lanadem, ngo edo rayé delokke ingkona simon-silie tani mokayédí, demte ngo edo rayé.

⁶Taniem Shédíme gesudope píto, depeila séko amiko mokayédí, bímkom amikone mokayéku.

⁷Delokke nolu amongso bojérupe otíng-oyin kalangkula parlangkuka.”

⁸Delo Shédíbí Noah melang bík oo kídíem sipe potoku,

⁹“Kaatola, nolum lang noluke otíng-oyin lope sim daapong sim ibosudung,

¹⁰delokke teyolo etkung delok nolukíng lenmín gekuna turna ato-siro tabung loope emnamde pei-pettang simon-sili ato-siro sim ibomla podung.

¹¹Sim daapong sim nolukíng ibosudola podung: Ngo edílokom turna ato-siroeme, puumulok nyokku momayé delokke amosime edílokom puumulok nyokku momayé.”

¹²Delokke Shédíbí poto, “Nolum lang nolukíng yémín gena simon-sili tabung delokke angkupena tani siirum yédong keela ngokke pénsamlo, ngokke daapong ibosunam iyode sikepe iyé:

¹³Doomuglo ngokke muréem garlíkyé, de ngokke lang tani amosokke daapong iyode.

¹⁴Edílo ngo doomugem among teyongso bomala, doomug aralo muréem gardope kaayédí,

¹⁵delo ngokkelang turna ato-siro tabung solang noluke pénsamlo daapong dobosunam sim, ngo míípasuyé, delokke asie edílokom puumupe ila turna tabungem nyokmo yimayé.

¹⁶Edílo muréem doomuglo ngo kaayédí, amoso turna takamlo Shédíke turyarna daapong ibosunamem ngo míípasuyaryé.”

¹⁷Noahme Shédíbí poto, “Simoko ngokkelang amoso turna takam kídíke pénsamlo daapong ibosunam iyode.”

¹⁸Etkung delokke lenkuna Noahke oo kídíe Shem, Ham delokke Japheth. Hambí Kanaanke abue.

¹⁹De oo angumde Noahke, delokke bulu kelok ila amoso tanie bííbom kaku.

²⁰Noahbí kerayalumpe arík igene. Bí onggur esing aríkko ito.

²¹Bí onggur alangem tííla tíngírsula amíl araape, tombu aradelo ketto.

²²Kanaanke abu Hambí abu delokke araape inamem kaala bík bíro annyidem luyudelo popato.

²³Dem tatla Shem lang Japheth gordulo ege bomla, méélamdanpe gíkutsula abu delokke amíl araape inamdem pokapla, bínyik amige abulokke amíl araangem kaasumape ito.

²⁴Edílo Noahbí tíngír delok ailangkula dartokudí, aníyang lokke agér inamdem kénla,

²⁵bí sikepe poto, “Kanaanme podung, bí bíkke bíro kídíke abílpe iyé.”

²⁶“RUUTUM Shemke Shédíme yidgedung, Kanaanbí Shemke abílpe iyé.”

²⁷“Japhethme bojémolangka, delokke bíme Shemke tombu ekumlo duumolangka, delokke Kanaanbí bíkke abílpe ilangka.”

²⁸Puumu irongem, Noahbí dítak língko angum kolang takying pilngoko turto.

²⁹Noahke yéname dítak língko konang kolang takying pilngoko irongem bí sikai.