Read Alladian 2 SAMUEL 2 Bible Online

2 SAMUEL 2 - Alladian bible

2 SAMUEL 2

¹Sikepe irongem, Dabid RUUTUM me íngkíto, “Ngo Judah lokke luune kídílok doolung konem bompe gímíloya?” “Aiyé,” emla RUUTUM bí poyansuto. “Íngko doolungem imíloi?” emla Dabid íngkítoku. “Hibron,” emla RUUTUM bí poto.

²Dekepeila Dabid Hibronpe, bíkkelo lekope bík mime annyidem, Jejreel lok Ahinoam melang, Karmellok Nabalke meyéng Abigail bínyim gíbola gíto.

³Bí bík ami kídíem, delokke buluke erang kídí emteng gíbola, Hibronem gargo bomna luune kídí delo duulíkto.

⁴Delo Judah lok ami kídíe, Hibronlo aala Dabid me Judahlok rojape pídélíkla tosak líkto. Edílo Dabid, Gilead ke Jabeshlok ami kídíe, Saul me yuto emnamem tattodí,

⁵bí amieke delo sikepe agomem políkdola melíkto, “Ngoluke aapí-ainang ainamem, noluke rojeme yusi sunamlok lengkan sunam legape, RUUTUM bí noluke teyolo utepooroem ruulík daklangka.

⁶Delokke supak kelok RUUTUM bí, noluke teyolo ayang delokke aronamem lengkan sudaklangka. Ngo agí sueteng noluke teyolo, noluke inam legape aipe iríksuyé.

⁷Miramla aapí-aange edíílangka; noluke roja Saul bí sikai, delokke Judahlok ami kídíe ngom buluke rojape kumlíkla pídé líktung.”

⁸Saulke sipaying ruutum, Nerke oo Abnerbí, Saulke oo Ishbosheth kíng lekope Jordanke kékonke Mahanaim lo duksi sulíkto.

⁹Delo Abner bí Ishboshethme Gilead, Asher, Jejreel, Ephraim, Benjamin delokke Israel takamlok rojape ullíkto.

¹⁰Ishboshethke dítage bím Israel lok rojape ido delo takying appiko ido, delokke bí taknyiko Israelem yéboto. Idola Judahlok ami kídíe Dabidke míídulok yéto,

¹¹delokke Dabid Hibronlo dítak kíníd kolang poolo akkéko rojape ito.

¹²Abner lang Ishboshethke ruutum kídíe, Mahanaim lok gíla Gibeonlo aato.

¹³Jeruiah ke oo Joab lang Dabid ke abíd ruutum kídíe, bulum paatang delo kaaríksula, bulu takam delo duuto. Opéékone paatang rotkon delo delokke, opéé konde rotkondan delo duuto.

¹⁴Abner Joab me poto, “Momín sukídope, yaamé koo lok nokke danlok lang ngokke dansok ullenlape.” “Sa aiyé,” emla Joab poyansuto.

¹⁵Dekepeila midum íying kolang annyiko, Ishbosheth kepelang Benjamin ami amínpe, Dabid ke midum íying kolang annyiem momín suto.

¹⁶Ami takamde agí-agíke ikísubomnam dem dumpong tereng lok gagla, yoksalok níkmínsula, bulu takam midum íying annyi kolang appide oletla siyin bosukai. Dekepe ikolok, Gibeon lok sim moolop sim Yoksa Among emla mínlíkto.

¹⁷Dekep ikolok, reyubruna mimakko ilenla, Abner lang Israel ami kídíe, Dabid ke ami kídí alaglo ikum kosuto.

¹⁸Jeruiah ke oo angum ekai; Joab, Abishai delokke Asahel delo kato. Moonam sidum kísa dugdugna Asahel bí,

¹⁹jonnampe Abner me monlen bomto.

²⁰Abner kangkut sudolangkula poto, “No Asahelya?” “E ngona,” bí emyansuto.

²¹“Ngome monbom mapeka,” Abner podola, “Sipaying konem monbomla bíkkelo kana ekurang kídíem laatoka,” emto. Idola, Asahel bíme montíbomto.

²²Lekoda Abner bíme potoku, “Ngome monbom yimapeka. Kapeda no ngom petdope duklík sudune? Kapekísa ngo nok bíro Joab me kaarík suyékun?”

²³Idola Asahel melíkmato. Dekepeila, Abner méélam danpe bík gíníngem dukut sulangkula, Asahel ke akii delok níkla lamkulok paddokupe níklíkto. Delo Asahel bí among delo sila oletto, delokke delo among delo píngaana takame bík oko delo dakto.

²⁴Idola, Joab lang Abishai bínyi Abner me monmín gela doonyi uadodem Ammahlok dííte delo pííto. Si Gibeon lok mongku-moorang bedape gína delo duuna Giah doolung lokke sanggo danlo kadungai.

²⁵Benjamin opínlok ami kídíe, lekoda Abner me gargo bomla, bulu dííte teyong delo irusula dagto.

²⁶Joab me Abner gogdola, “Kape, ngolu mimak itímínsu ayar yénía? Ngoluke mimak ikolok, kaangki-míngki petom emin méélamlo kayéne, dem no kénsu-kaasumanía? Ngoluteng nokke duubo-dakbo supenam amiemin. No edílopeda, nokke amiem ngolum montímoyéne?” emto.

²⁷“Ngo turna Shédíke amín lok pésudung,” emla Joab emyan suto. “No dekepe pomangamílo, ngok ami kídíe nome nyampoke roh loope monlíkyai.”

²⁸Delo Joab, Israel ami kídíem, bík ami kídíe monyimadope, iyodpe bikul tapung dem mutla, delokke ila mimakde iyimato.

²⁹Abner lang bík ami kídíde, yoh rubudem Jordan yiibe delok gíla, Jordan asiem koola, roh ruubung demteng enla, Mahanaimlo píílat sutoku.

³⁰Edílo Joab bulum monyimatodín, delo bí bík ami kídíem aadum sumoto. Delo bí Asahel ke teyolo midum íying kolang konangko kaimadope kaapato.

³¹Dabid ke amie Benjamin opín lokke Abner ke amiem midum 360 ko petto.

³²Joab lang bík ami kídare Asahel ke simang amílem bomla, Bethlehemlo buluke erang agolo yutoku. Dekepe ipala, bulu yoh rubudem enla rokomem Hibronlo píílat sutoku.