Read Alladian 2 SAMUEL 21 Bible Online

2 SAMUEL 21 - Alladian bible

2 SAMUEL 21

¹Dabid ke rojape yébodu delo, doopénmape dítak angum apíngko botterupe dírí-kenoko kato. Dekepeila, Dabid bí RUUTUM me sok legape tatkíla, RUUTUM bí poyansuto, “Saul lang bík erange ami mokanam imem kadung. Bí Gibeon lok ami kídíem simoto.”

²(Gibeon lok ami kídíde, Israel lok amimangíai; bulu Israel kídílok mopít-ipít biyé emla pébisunam Amorit ami asumkuai. Idola, Saul bí bík agísu Israel, delokke Judah legape bulum inyokpem ito).

³Dekepe ila Dabid bí Gibeon ami kídarem gogdumsula bulum poto, “Ngo nolukepe íngkoko ibipene? Nolu RUUTUM ke ami kídí teyolo utepooro políkdokupe, noluke teyolo imemnamem, ngo aina agérko iyan bikupe míídung.”

⁴Bulu poyansuto, “Saul kelang bík eranglo ngoluke pityang sim ngolu uunlok demangkom baldínlok laayinmayé, delokke ngolu Israel ami atel koteng petlímang.” Delo Dabid, “Demílo, nolu ngom nolukepe íngkokoda ibidope míídune,” emla ííto.

⁵Bulu poyansuto, “Saul bí ngolume atel koteng Israel lo turla duumadope inyokpe mííto.

⁶Dekepeila, bík otíng-oyinlok milokong kínítko ngolume bitoka. Ngolu dem RUUTUM ke ullensunam roja Saul ke doolung Gibeahlo RUUTUM ke keralo ogsulyé.” “Ngo bulume nolum biyé,” emla Dabid poyansuto.

⁷Idola, bí lang Jonathan bínyike deenampe pébosunam legape, Dabid bí Saulke oten Mephibosheth, Jonathan ke uem mesiito.

⁸Depe iduakom, bí Aiah ke ome Rijpah ke Saul kelo obinam oo annyi Armoni melang Mephibosheth me laato; delokke bí Mehola lok Barjillai ke oo Adriel kíng Saul ke ome Merab ke olíknam oo pilngo demteng laato.

⁹Dabid bí Gibeon ami kídarem bulum bito. Bulu RUUTUM ke keralo ogsulla, midum kíníd de lekope sibosuto. Dekepe bulum peddo delo ayag-aliem isi lendokuai.

¹⁰Delo Saul ke éémé Rijpah, Aiah ke ome, bosta egelok simang kídíem meko líídung kídí delo dungkengko mola, ali isi-sasidí delokke ila méélam pedong odoloope duubomtíto. Longeme bí pettang kídíem simang kídíem domadope monbínla, delokke yuem bí dekedem moonam simon-sililok mosito.

¹¹Edílo Dabid Rijpah ke inam kídíem tattodín,

¹²delo bí gíla Saul kelang bík oo Jonathan ke along kídíem Gileadlo duuna Jabesh ami kídarlok laato. (Bulu along kídarem Philistain kídar lokke Gilboa díítumlo Saul me petpala, bíla dagmoko Bethshan bene delok laasito.)

¹³Dabid Saul kelang Jonathan ke along kídar demlang, ogsulnam ami kínít delokke along emteng langkumto.

¹⁴Delo bulu Saul kelang Jonathan ke along kídíem, Benjamin among lokke Jelalo Saulke abu Kishke agolo, rojalok lulíknam tabungem ila yutoku. Dekepe irongem Shédíbí buluke among legape kumnam kídíem poyansutoku.

¹⁵Philistain elang Israel aralo mimak akoteng kato. Delo Dabid lang bík ami kídíe gíla, Philistain kídíem imínsuto. Dekepe mimak imínsudo delo lekon irum kolo Dabid yagorupe apééto.

¹⁶Ishbibenob emnam migo-mimat kone, kilo gram angum kola arotkope tebegna pitol gíníng kola yoksa aníko gela, Dabid me petlayé emla mííto.

¹⁷Idola Jeruiah ke oo Abishai bí Dabid me igulpe aadola, migo-mimatdem imínsula petto. Delo Dabid ke ami kídíe Dabidme, bulukelo lekope mimak imín sukolo gíbo suyimadope pésumoto, “No min Israel lok míínam sukenge. Ngolu nom menyoklímang,” emla bulu poto.

¹⁸Dekepe irongem, Gob lo Philistain kídíem mimakko kabosutoku. So mimak so Hushah lok Sibbekai emnam ami bí Saph emnam migo-mimatko petto.

¹⁹Akoteng Goblo Philistain kídíem mimak ko kabosulangkula, Bethlehemlo duuna Jair ke oo Elhanan bí Gath lok Goliath me petto. Goliath ke gíníngde ege sumkeng lok gilgang kísape botte inakuai.

²⁰Delokrongem Gath lo akoteng mimakko katoku. Gath lo mimak ilíína migo-mimat ko kadungai. Bí lekéngko apekpe ale annyi delokai, delokke lakkéngko apekpe alag annyi delokai gedungai.

²¹Bí Israel kídíem imínsudope gogla, Dabid ke bíro Shammah ke oo Jonathan bí dem migo-mimat dem petto.

²²Si appi si Gath lok migo-mimat kídílok otíng-oyiníai. Bulum Dabid lang bík ami kídare petyinto.