Read Alladian 2 SAMUEL 24 Bible Online

2 SAMUEL 24 - Alladian bible

2 SAMUEL 24

¹Lekoda RUUTUM bí Israel teyolo marla, Dabid me buluke teyolo ebínem langaamoto. RUUTUM bí Dabid me poto, “Gíla Israel kelang Judah ke amiem sankílangka.”

²Dekepeila, bík sipaying ruutum Joab me Dabid bí lulíkto: “Nok sipaying ruutum kídíem gíbosula, among sokke kéényungkon lokke ila kéényungkon loope gíla, Israel opín takam lok ami kídíem sanlangka. Edítko amie kadun dem ngo kénpe míídung.”

³Idola Joab bí rojadem poyansuto, “Ngok ruutuma, RUUTUM nok Shédíbí supak kempemílo, Israel amiem língko yangkope bojé yadope idaklangka, delokke Shédíke depe ibinamem kaadope no turdaklangka. Idola, kapeila ngok ruutum no sankí língkane?”

⁴Idokom rojade Joab melang, bík sipaying ruutum kídíem bík ukumem tatdope luto; bulu bík keralok gílenla, Israel ami kídíem sanpe gíto.

⁵Bulu Jordanem koola, Gad among lok kobung raadalo duuna, Aroer sokkolok luune delo notkoem ito. Delokke bulu línggíng danpe Jajerlo,

⁶delo Hittit amonglok, Gilead lolang Kadeshlo gíto. Delokrongem bulu Danlo gípala, Dan lokke bulu Sidon lok anggodanpe gíto.

⁷Delokke bulu sokkodanpe Tur lok lííreng doolung delo gíla, Hibit kelang Kanaan ke doolung takamlo gíto. Méélam yalumpe Judah lok sokko amonglo Beersheba lo gíto.

⁸Dekepeila, among takamdem en-gong yinla, bulu poolo konang kolang looying annyi méélamlo Jirusalemlo píílatsutoku.

⁹Bulu sipaying agér ibeena amiem Israel lo 800,000 ko, delokke Judahlo 500,000 ko kadung emla rojadem pokan bitoku.

¹⁰Idola Dabid ke ami sannam dem laarodem, bíkke aapí-aange genyii lenbomla, bí RUUTUM me poto, “Ngo sim agér sim ila botteruna imemko ito. Ngome ayangla mesamtoika. Ngo miderupe itung.”

¹¹Delo edílo Dabid bí rodem gereptodín, RUUTUM ke agom kídíe Dabid ke kaana, kaaluna Gad kíng aala poto,

¹²“Gíla Dabid me polangka, ‘Sikepe RUUTUM bí podung; Ngo ato angumko nome bidung. Sok arasok ako, nokke teyolo ngo ilíkdope ullangka.’”

¹³Dekepeila Gad Dabid kíng gíla, RUUTUM ke ponamem pobila íngkíto, “Íngkuem no míídone? Dítak angumko [15] nok among so díírí-keno emía, demangke poolo angumko nok miru kídílok duggetínam emía, demangkom longumko nok among so pesorunam kiliikua? Supak dem míngkíla RUUTUM me ngo pobidokupe, ngom polangka.”

¹⁴Dabid poyansuto, “Ngo míílal aloosudung, idola ngo ami kídílok ingéé kosulímang. RUUTUM agísume ngolum itung-iré molangka, kapeila bí asampe ayang sukunako.”

¹⁵Dekepeila RUUTUM bí pesorunam kiliiko Israello melíkto. De delok rokom delok ilenla RUUTUM ke míído moodí loope ilíkto. Among delok kéényung konlok ila, kéényungkon loope 70,000 ko Israel amie sito.

¹⁶Edílo RUUTUM ke kotoki kídíe, Jirusalemem nyokmopem idopak delo, RUUTUM ke ami kídíem itung-iréna aapíde angupe ilangkula petgoona kotokidem poto, “Melangka. De aikabong.” Kotokide Jebus ami Araunah ke ali yikkol abe delo dagaduai.

¹⁷Dabid bí ami petgoona kotokidem kaato. Delo RUUTUM me poto, “Ngo mino imemne. Ngo mino paab inade. Si opan ami kídísi íngkoko itone? No ngom lang ngok erangem mino ingéépene.”

¹⁸Delo longe deloi, Gad bí Dabid kíng gíla bím poto, “Araunah ke ali yikkollo gíla, RUUTUM kepe deena rungguko píbilangka.”

¹⁹Dabid bí RUUTUM ke lulígem tatla Gad ke pokampe gíto.

²⁰Araunah kaatoksula, rojadem lang bík sipaying ruutum kídídem bíkkelo saadope kaato. Bí agíe Dabid ke keralo among delo olíkdola,

²¹ííto, “Ngok ruutuma, no íngko legape so aadune?” Dabid poyan suto, “Nok ali yikkol sim rela, RUUTUM bí pesorunam kilii-ramli sim itumdope RUUTUM me deena rungguko píbipe.”

²²“Ngok ruutuma, sim laalangka, delokke nok míínamem RUUTUM me bilangka,” emla Araunah poto. “Sina, gooru kídar sim romla, RUUTUM me amanpe bilangka; romnanape sina, buluke jungoli elang yiknana ekurang kídíe.”

²³Araunah takamem roja dem bila poto, “RUUTUM nokke Shédíbí nok amanem torík sudaklangka.”

²⁴Idola rojade poyansuto, “Ma, ngo sok legape nom doryé. Ngo RUUTUM ngok Shédíme asampe paanam atolok amanem bimayé.” Delo bí ali yikkol demlang, gooru kídídem baldín nokdi apil íying pilngoko bila reto.

²⁵Delo bí RUUTUM kelope deena rungguko píla, romnam aman emlang ashéng aman kídíem bito. RUUTUM bí bík kumnamem tatbila, Israel lok pesorunam kilii-ramli deme laabíntoku.