Read Alladian 2 SAMUEL 6 Bible Online

2 SAMUEL 6 - Alladian bible

2 SAMUEL 6

¹Lekoda Dabid Israel lok ralya yalumna sipaying jarying angumko gogdumsula,

²Sérubim [3] annyi pénsamke palenglo duuna, Ralya yalumna RUUTUM ke amín gena, Shédíke Daapong Sondugem langkupe Judahlok Baalahlo enboto.

³Bulu dem dííte delo duuna Abinadab ke ekumlok laala, gooru-gaari aní kolo joolíkto. Abinadab ke oo annyi Ujjah lang Ahio bínyi gaaridem enbomto.

⁴Ahio kerang delo ento.

⁵Dabid lang Israel ami takamde, buluk ralnam tabunglok RUUTUM me yidgepe paksong soola, miri lula ito. Bulu harp, layar, dumdum, ratel delokke lupiya tapunglok yidgeto.

⁶Nakon ke ali-ayé yikkollo buluke píídodem, gooru annyide tubesula ikolok, Ujjah Daapong Sondukdem gombomto.

⁷RUUTUM Shédíke marname delo Ujjahke míngge manam legape aala bím petto. Ujjah Daapong Sonduk ampeng delo sila,

⁸dekepe ikolok, dem among dem Perej Ujjah[4] emla silo loope mínkai. RUUTUM ke marla Ujjah me petnam legape Dabid marto.

⁹Delo Dabid RUUTUM me pesodola poto, “Kapekísa ngo supak Daapong Sonduk sim bomyékune?”

¹⁰Dekepe ila, bí Jirusalemlo bomkumayé emla mííla, bedang delok layila, Gath luunelo duuna Gitith ami Obed Edomke ekumlo joolíkto.

¹¹Daapong Sondukde delo poolo angumko duula, RUUTUM bí Obed Edom melang bík erang kídí teyolo utepooroem melíkto.

¹²Dabid roja bí RUUTUM ke Daapong Sondukde, Obed Edomke erangem delokke bík ato-siro takam teyolo utepooro rulíknamem tatla, Obed Edomke ekumlok Daapong Sonduk dem Jirusalemlo írgang apam rupe bomatoku.

¹³Daapong Sonduk dem joobomna ami kídíde lekor akkéko gíduem, Dabid bulum lutum popala, RUUTUM kepe gooru kolang unarung ruoko amanpe ito.

¹⁴Dabid ugíng petomlo Ephod gasorko yétgela, bík ralnam tabunglok paksong soola, RUUTUM me yidgeto.

¹⁵Dekepe, Dabid lang Israel kídí takame, Daapong Sonduk dem Jirusalemlo bulu ashéng-angampe goggela, delokke bikul tapung mutla bomsaatoku.

¹⁶Sonduk dem luune delo aabom dokuem, Saul ke ome Mikal kirkilok kalenla iduem, Dabid rojame tíkla-soola, RUUTUM ke keralo idope kaala, bí Dabid me aapílo míípakto.

¹⁷Bulu Dabid ke morepnam Tombu delo Sondukdem duupe kolo leelíkto.

¹⁸Bí romnam aman emlang eetet amanem ilík rongem, Ralya yalumna RUUTUM ke amínlok takam amiem utepooroem políkla,

¹⁹takame dobo-tííbosuto. Bí Israel lok mime delokke milo takamem burla goona ettíng alop kola mureenam adín alop kola, aarenam onggur eke bito. Delo takame agí ekumpe gítoku.

²⁰Méélamdem, edílo Dabid agí ekumpe erang kídíem, utepooro eme políkpe aatokudín, delo Mikal kaaríksupe lendola, “Israel lok roja, silo agí amín legape bottena agérko gérto!” Mikal poto. “Bí agí egem pítbínsula, bík yébonam ruutum kídarlok béérang mime kangkolo ito.”

²¹Dabid poyansuto, “Ngom nok abu kelang erang ayanpe, Israel ami teyolo ruutumpe ullíkna RUUTUM memin ngo yidgela paksong sootone. Delokke RUUTUM me yidgepe ngo soodan teteyé.

²²Delokke sok legape ngo agísuem igíp suyayé. No ngom agér kamang emla míílado, idola e mime kídar esi ngom bottepe mííyé.”

²³Saul ke ome Mikal bí bíkke sido loope ome-oo atel koteng omang.