Read Alladian 2 SAMUEL 7 Bible Online

2 SAMUEL 7 - Alladian bible

2 SAMUEL 7

¹RUUTUM bí Dabid me bík miru takam lok mopítla, roja Dabid bík roja ekumlo duuto.

²Delo Dabid kaalu-kangorna Nathanme poto, “Sina ngo Sidar esing lok monam ekumlo duudung, idola Shédíke Daapong Sonduk dem tombu kolo metung.”

³Nathan poyansuto, “Nok aapílo ingkoko ipe míídudí dem ilangka, kapeila RUUTUM bí nokkíng yémín gedung.”

⁴Idola yoh delo RUUTUM bí Nathan me poto,

⁵“Gíla ngok béérang Dabid me, ngo sipe podung emla polangka, ‘Ngok duupeko ekum dem mobipenade nomang.

⁶Israelem Ijipt lok laalendoku delok ila, supak loope ngo ekum kolo duumang; ngo tombulo duula yégodung.

⁷Ngok Israel kídílo en-gong-gígong mínko takamlo, ngo edílokom ngok ullen sunam íngkona yégebona emteng, ngom kape sidar esinglok ekumko mobimane emmang.’

⁸Dekepeila, Ralya yalumna RUUTUM ngo, ngok béérang Dabid me sikepe podung emla pobilangka, ‘Ngo nom arík kídarlo, mér sobén kaabom kolokke laalenla ngok Israel ami kídí teyolo ruutumpe imotung.

⁹Ngo nok gíko takamlo nok keralo gímín gela, nok miru takamem nok keralo ikumbito. Ngo nome taleng kuppo sok botteyalumna ruutum kídí kísape bottepe imoyé.

¹⁰Delokke ngo ngok Israel ami legape amongko bila, bulum delo duulík mola agí ekum kasula, atí adír kaimadope iyé. Loorímana amie bulum kerape adír binam kísa bilayimayé.

¹¹Kapeila, ngokke Israel teyolo kebang ruutum ullenlíkla ido lokke bulu adír bituai; delokke ngo nolum noluke miru takamlok mopítyé. Delok teyolo RUUTUM agísue pobesudung, RUUTUM bí nokkepe ekumko mobiyé.

¹²Edílo no sila nok buku kídílo lekope nom yuyédí, delo ngo nok oo kídílok akonem rojape imola, bík rojape ibomnam amongem edíímoyé.

¹³Bí moko ngok legape ekumem mobiyéne, delokke ngo agínpe bík rojape ibonamem duuyardope imoyé.

¹⁴Ngo bík abupe delo bí ngok oope iyé. Edílo bí imemyédí, delo abue kapekísa uem demrít-lurítla poyildudí dekepe ngoteng bím iyé.

¹⁵Idola ngo Saul me, rojape idope laapak kunam kísape bím laapak mayé.

¹⁶No agínpe otíng-oyin kala, nokke rojape yébonamem duuyar moyé. Nok roja paleng duubomnamde duurí kamayé.’ ”

¹⁷Shédíke lengkan-pokannam takamem, Nathan bí Dabid me poyinbito.

¹⁸Delo roja Dabid Tombu delo gíala, RUUTUM ke keralo dungaala kumto, “E ngok RUUTUM Shédí, ngo íngko koda, delokke ngok ekum erangsi kapenakoda. Íngko legape no ngom sikepe bomonkane?

¹⁹Delokke supak no bojéyanem ngok legape idung. RUUTUM Shédí no agíe ngok aapena otíng-oyin legapeteng pébisutung. Delokke no sim ami konem kaamotung,[5] E RUUTUM Shédí.

²⁰Ngo sim íngkoko pobooyapen? No nok béérangem aipe kénsudung.

²¹Nok pésukolok, delokke nok agí aapí míngkorlok, sim bottena agér takam sim ngom kéndope itung.

²²Dekepe ila, E RUUTUM Shédí no botterune, sékokom nok kísana kamang, ngolu agínpe no petom min Shédíe emla kéndung.

²³Israel kísana opín yang tani amongso kamang, séko medín no agí amisupe idope, abílpe ikolok mopít lentokune. Israel legape nokke bottena, delokke míngkén manam agér kídí inamde nok amínem taleng kupposo byargo mokai. No abíd opín kídí emlang uyu kídíem, nok Ijipt lok agíkepe idope laalen sukunam Israel ami legape igébito.

²⁴No Israel em agínpe agíkesupe, delokke RUUTUM no buluke Shédípe ikai.

²⁵“Dekepeila supak, E RUUTUM Shédí, nok béérang, delokke bík ekum-erang teyolo políknam gompil miyongsim, apíng modaklangka, delokke nok ponampe idaklangka.

²⁶Nok amíne agínpe botteyé, delokke ami kídíe sikepe agínpe poyé, ‘Maklíngke RUUTUM bí, Israel lok Shédíe,’ delokke nok béérang Dabid ke ekum-erange agínpe nok keranglo edíng ayaryé.

²⁷Ralya yalumna RUUTUM, Israel lok Shédí, sim ngo nok keranglo kumlangkai; kapeila, sim takam nok béérang ngom lengkantung, delokke ngok otíng-oyinem rojape imoyé emla pobito.

²⁸Delokke supak, E RUUTUM Shédía, no Shédíe, delokke nok agom kídíe aro yindung, delokke no ngok teyolo míngkén manam pébisunamem pébisutung.

²⁹Ngo nom ngok otíng-oyin teyolo utepooro ruulíkdola, nok ai-asangem paayardope rogudung. E RUUTUM Shédía, no sim pébisutung, delokke nok utepooroe ngok otíng-oyin takamlo duuyarmínyé.”