Read Alladian 1 ROJA KÍDÍ 10 Bible Online

1 ROJA KÍDÍ 10 - Alladian bible

1 ROJA KÍDÍ 10

¹Edílo Sheba lokke ranide Solomon ke amín kanam emlang RUUTUM kíng bíkke yébosunamem tattodí, bí Solomonme poyansula pemanam agom-aanglok íngkíkape emla enbomsuto.

²Bí deddína uunem, nampona kuséréngem, atí-atína lunggu-tadogem deddína uut simon teyolo gíala, delokke deddína agér ibina kídíem enbola Jirusalemlo pííto. Edílo bí Solomon me kaarík sutodí, bíkke aapílo íngkírupe emla míínam tabungem ííyinto.

³Solomon bí agom íngkínam tabungdem ai-kamporupe poyansubito. Solomon ke legape agom kídíde polapemanam kamato.

⁴Shebake ranide Solomonke gyan kanamem tatla-kaala, ekum moonam kídíem kaayin gooto.

⁵Bí apim-oying donam-tíínam kídíem kaala, Solomon ke migom kídíke duupom kídíem kaala, roja ekum arang, delokke ami kídíke agér inam kídíem kaala, buluke ege-galuk genamem kaala, doman-tíímanlo agér ibina kídíke séguem kaala, Solomon ke Kumkeng Ekumlo ipak inam kídíem kaayin goola, deke tabungdem bí míírí-míínyope mííto.

⁶Bí Solomon rojame sikepe popato, “Ngokke agíke amonglo nokke legí-sigang emla nokke gyan kénnam legangem tatnamde arorungko.

⁷Ngo so pííla agí amigsok kaasuma teteloope aroe emla míímatuai. Ngokke tatnamde nokke legí-sigang kídíke arot petomem tatto. Nokke gyan kénnam dela mirem kídar si ngome lupabinamem pakya berokdo.

⁸Nokke mime kídar [6] si gérnarungeke. Nokke gyan agom-aange tatpaala, nok keralo agér ibina ami kídarsi arope gérkai.

⁹RUUTUM nokke Shédíme yidgerudo! Nokke teyolo RUUTUM bí ashéng aloodung. Bí nome Israel ke roja palenglo duumotung. Israel ke teyolo RUUTUM bí agínpe ayang ayarla, pénsam kebangem baajiibola, jonna delokke deena bedanglok yébodope, nome Israelke rojape imotung.”

¹⁰Delo bí roja Solomon me bíkke aman bomanem bito. Dekede uun kootíre éjar appi kilogram ngatnako, deddína nampona ato-siroe, delokke atí-atína deddína arekana lunggu-tadoge. Solomon bí kerangpe edítko nampona ato-siroem paatodí, dempemílo pakyape ngatyana nampona ato-siroem Sheba lokke rani keelok amanpe paato.

¹¹(Hiram ke asi jaji kídíde Ophir lok uunem bomatoku, delok teyoloteng juniper esing emlang arekana elíngem bojérungko bomatoku.

¹²Solomon bí junipher esing kídídelok Kumkeng Ekum delolang bíkke ekum kídí delo gaang pelang daabepe ilíkla, delokke miri ami kídí legape harp tapung pelang layar tapungpe monato. Dekena esingem Israel amonglo lekoda bomang kumato, delokke delok longe kídí delokke ila dekena esingem kaana kaimato.)

¹³Sheba lokke ranike mííla konam tabungem, Solomon bí, agíke roja bipek bimansunam kékon loteng bíme biyinto. Depe irodem bí lang bíkke ami kídíde Sheba amongsupe enkaku.

¹⁴Bési-bépar ina kídíke kajanang binam abal kídí, agí ami lokke bépar lok namngo paanam kídí, Arab roja kídíke kajanang binam kídí, delokke Israel amongke yéta kídíke ruutum kídíke bidumsunam kídí takamem sanmape;

¹⁵dítak miyonglo Solomon bí, 23,000 kilogram uun kope paatíto.

¹⁶Solomon roja bí uun kootírlok língko annyi kokai bortakruna tamkungem píto. Tamkung miyong delo kilogram kíníd kope uunem yollíkto.

¹⁷Dekedem delokke kattam [7] ekete língko angum kope píto. Kattam miyong delo kilogram annyikope uunem yollíkto. Dem takam dem bí Lebanonke Monam Kumne delo kampope mesiisiyinto.

¹⁸Botteruna roja paleng koteng bí píto. Paleng delokke arangem sita iipang lok píla, delokke luyu deme gairuna uun lok pílíkto.

¹⁹Paleng de lekor akkékope ila méélamde pírílla teyonglope isaato. Lekor miyongke abe elenlo myomur mimangem píyin líkto, idumsula íying kolang annyiko myomur mimange kato.

²⁰Paleng lokke méélam delo rubo mimang kísanako kato, delokke duuyém alag annyi medasukode mimangpe ito. Abíd-abíd roja kídíke among yétalokom sikena roja palenge kamato.

²¹Solomon rojake tíngkeng bati kídí takam de uun lok píyinnampe ito. Lebanonke Moonam Kumne aradelo menam ekung-bati tabungde uun kootírlok pínam mílípe ito. Solomonke longelo baldínem míípaknam legape baldín ekurang atí kamato.

²²Bí siyénglo yutgoona jajie bojéko kato. Dekede Hiramke jaji kídílo yémín geto. Dítak angum-angumlo bíkke asi jaji ami kídíe pííyin langkula; uunem, baldínem, sita iipangem, sibé-sikat kídí emlang atí-atína kebung-pettang kídíem bomala iyarto.

²³Abíd roja kídarem pemílo Solomon rojabí kénnam gyane kayala delokke miremete iyaberokto.

²⁴Taleng kuppo sokke ami tabunge Shédíke ruulíknam kénnam gyan agomem Solomon kíng aala tatpe-kénpe mííyinto.

²⁵Bulu baldín, delokke uunlok ekurang, ege-galuk, gíníng-yoksa lok, nampona kusérénglok, guré delokke gado lok bomala amanpe biyinto. Sikepe dítak miyonglo itíto.

²⁶Solomon bí éjar kolang língko appi guré gaari, delokke éjar íying kolang éjar annyi mimak guré maglíngko irepto. Delokke ayokonem bí Jirusalemlo meto, delokke ayokonem abíd-abíd doolunglo megooto.

²⁷Solomon ke longe delo baldínem gíídang elíng kísa míítuai, delokke Judah among lokke dííte lebe kídílo sidar esinge are kamana, alum asamape garsana sikamor esing kísa gartuai.

²⁸Roja lokke ami kídíe Musri kelang Silisia lokke guré bépar emlang

²⁹Ijiptlok guré gaari kídíem luyulo konamem kaabom-tatbomto. Bulu guré gaariem miyonglo língko akké baldín nokdipe, delokke guréem língko kolang íying pilngo baldín nokdipe laangala ito. Dekedelok bulu Hittit kídí kelang Siria kídíke roja kídílo koyon sulangkula ito.