Read Alladian 1 ROJA KÍDÍ 11 Bible Online

1 ROJA KÍDÍ 11 - Alladian bible

1 ROJA KÍDÍ 11

¹Solomon bí deddína mibo-miying mimeme mííla bomto. Ijipt lokke Pharaoh rojake ome kékon loteng bí Hittit, Moab, Ammon, Edom, delokke Sidon kídíke mime kídí lokte mimepe bomto.

²Sikena mibo amilo omum-nyameng ibosumadope Israel kídíem RUUTUM bí lutumtuai. Kapeila bulukíng dekepe ibosumílo buluke ségu-siang kídílo soyélsula uyu kídí agomem tatlangkula uyu ipak ikupelo emla kerapekai lutortuai. Idolateng Solomon bí dekena mime kídíeme méngpe bomyinto.

³Solomon bí língko kínídko roja odonglok mimepe, delokke língko angumko abíd odonglok mimepe bomto. Bulu bíkke aapí-aangem Shédíke keralok mootengmoto.

⁴Bíkke mijing rongeme bulu, mibo among lokke uyu kídíemte bíme kumsudope imoto. RUUTUM bíkke Shédí kíng kape kísa bíkke abu Dabid bí airupe míngkesutodí, dekepe bí míngkesuyimato.

⁵Bí Sidon among lokke uyu mime Astarte me, Ammon among lokke belumnam uyu Molek me kumsugoola,

⁶bíkke abu Dabid ke yélam lok yémape bí RUUTUMke keralo paab ila yékaku.

⁷Jirusalem lokke sanggodan díítumlo, Moab among lokke belumnam Molek uyuke legape kumkeng ekum emte mobito.

⁸Sikesok teyoloteng bí, bíkke mibo mime kídíe agí-agíke uyu kídíem ipak ila nampona aríkanem romlíkla idope buluke kumkeng ekum kídíem moyinbito.

⁹RUUTUM Israelke Shédí bí lennyi kokai Solomonme lengkan sulateng Solomon ke aapí-aange RUUTUM ke keralok mootepe ikukolok RUUTUM bí Solomon ke teyolo yagorupe markai.

¹⁰RUUTUM bí Solomon me angukon uyu kumsumapeka emla lutum lateng bí RUUTUM ke lutumem arope tatbimato.

¹¹Depeila Solomon me RUUTUM bí luto, “Sikepe nokke ségue ilangkula ngokke ayonem, delokke daapongke idongem betkukolok, ngo nokke among yétaem nokkíng laabín langkula, nokke rumkílo yéna migom konem biyéku.

¹²Idola nokke abu Dabidke legape sike agér sim nokke yédo alop so ngo imayé, idola nokke oo lokke roja doyékueme iyé.

¹³Among yéta sim nok oo lok apíírupe laabínmayé; idola delok ayanpe, ngokke tosak sulennam Jirusalem doolung legapelang, ngom agér ibina Dabid ke legape nokke oo alaglo opín atelko mesiibiyé.”

¹⁴Depeila Edom among lokke roja oo akon Hadadme Solomon ke mirupe rurepto.

¹⁵Kerapekai edílo Edom kídíem Dabid bí mimak imín sutodí, delo maglíng lok ruutum Joab bí simang kídíem yusidope Edomlo gíduem, bí Edom lokke milokong tabungem moka kayinto.

¹⁶Joab lang Israel ami kídíe delo poolo akkéko duula Edom lokke milokong tabungem petyinto.

¹⁷Idola Hadad lang bíkke abu rumkílo yéna Edom lokke migom ayoko Ijipt amongpe dugnyokto. Dekepe ido delo Hadad bí koo amé alootuai.

¹⁸Bulu Midian lok gíla Paranlo pííto. Delo bulu Paran lok ami ayoko enbola Ijiptpe enla Pharaoh rojame kaaríksuto. Pharaoh bí bulum toríksula Hadad me ekumem bila asi-among emte panbito, delokke donam-tíínam emte bito.

¹⁹Pharaoh bí Hadad ke teyolo airupe mííto. Bí depe mííla, bíkke agíke rani Tahpenes ke bírme aníyangem Hadadke mimepe tombito.

²⁰Tahpenes ke bírmede Hadadme Genubat emla mínnam ooko obito. Deme Tahpenes bí roja ekumlo duusaaboto. Depeila Genubat bí Pharaoh ke ome-oo kídílo lekope sisaabosuto.

²¹Hadadke Ijiptlo duudungem, Dabid ke sila bíme yunam emlang maglíng lok ruutum Joab ke sinamem bí tatto. Deme tatla bí, “Ngome agí amonglo gímotokui,” emla Pharaohme roguto.

²²Pharaoh bí bíme ííto, “No agíke amonglo ensukupe ingkokoda Ijipt among so pííramdun?” Delo bí, “Ma dekedere atí kamang, idola ngome gímokuyi,” emla Hadad rogugugapto.

²³Solomon ke mirupe Eliada ke oo Rejon memte Shédí bí ruurepto. Jobah lokke roja Hadadejer ke keralok Rejon bí agí ruutumem mííyimala dugnyok gela,

²⁴rutígong gena milíhodong opéé lokke ruutumpe ila yétíto. Sikepe bíkke igong genamde Dabid ke Hadadejer me mimaklo ikumla bíkke Siria opéé kídíem petyin rongeme Rejon bí igeto. Rejon lang bík ami kídíe Damaskaslo gíla delo duuto. Deke delokke ami kídíe bíme Siria lokke rojape imoto.

²⁵Bí Israel ke miru akonpe Solomon ke yédo longe delo ito.

²⁶Sike sokke teyoloteng Nebat ke oo Jeroboam bí Solomon ke mirolpe irepto. Bí roja lokke migom konpe yétuai. Bí Ephraim opín lokke Jeredah doolung lokke. Bík ane delokke amínem Jeruah emdungai. Anedem miloe kerapekai sinyoto.

²⁷Solomon ke mirolpe bíkke igang legange si: Solomon bí Jirusalem ke sanggodan among dem kédénglok gebííla língkum etorem isi-simoto.

²⁸Jeroboam bí agér anamlo ernarung yaamékuai. Bíkke gai-gakorupe agér inamem Solomon kaala, Manasseh keelang Ephraim amonglo agér ina abíl kídíke teyolo ruutumpe bím parlíkto.

²⁹Longe konem, Jeroboam ke Jirusalem lok gílendokuem Shiloh doolung lokke kaaluna miri Ahijah bí, bedang delo bíme kaaríksuto.

³⁰Delo Ahijah bí, bíkke lukdor aní genam dem bítsula alop íying kolang annyikope bétpansuto.

³¹Depe ipala bí Jeroboam me poto, “No alop íying sime laatola kapeila RUUTUM Israel ke Shédí bí nome sipe ludung, ‘Ngo Solomon ke among yéta sim laabínla, opín íying konsim nome biyé.

³²Ngom agér ibina Dabidke legape opín konem Solomon kíng meyé, delokke sok legang petommang, Israel doolung takam aralok Jirusalem me ngokke agí doolungpe tosaksunam legangpete ngo dekepe iyé.

³³Ngo sikena agér sim iyé, kapeila Solomon bí ngome mepak geyéla, Sidon lokke uyu mime Astarte me, Moab lokke uyu Kemos me, delokke Ammon lokke uyu Molek me kumgongsula ipak ibila, mibo-miying uyu kídíem míngge alongkai. Solomon bí ngok agom tatyimang. Bí yagorupe imemkai, delokke bíkke abu Dabid ke kísa imape Solomon bí ngokke lulíg emlang ayonem igeyimang.

³⁴Idola Solomon ke turdu tete delo ngo bíkke among yétaem laabín mayé, delokke bíme roja domopoyé. Sikepe ngokke igangsi, ngome agér ibina Dabid bí ngokke ullensunam amirupe, bí ngokke lulígnam tabung emlang ayon takamem aipakpe igeto. Iname bík legape ngo sikepe iyé.

³⁵Ngo Solomon ke oo lok among yétaem laabínla opín íyingem nome biyé.

³⁶Idola ngome kumsudope, ngokke ullensunam Jirusalem doolunglo, ngome agér ibina Dabidke otíng-oyine rojape iyar bomdope ngo Solomon ke ueme, opín atel konem ruulen biyé.

³⁷Jeroboam nom ngo Israel ke rojape imoyé. Nokke aapí míínam tabung among yétaem no yébomyé.

³⁸No airupe ngok agom-aangem tatbiyémílo, ngok ayon lok yéyémílo delokke ngom agér ibina Dabid ke ségu pakpe ngokke lulígem aipakpe tatbila ngome arope míímoyémílo, nokkíng ngo agínpe yémín geyé. Nom ngo Israel ke rojape imola, Dabid ke teyolo kape kísa ngo itodí, dekepe nok amíllok lenna oten siirek loope Israelke rojape iyardope ngo ibiyé.

³⁹Solomon ke paab legape ngo Dabid ke otíng-oyinem itung-iréyé, idola agín legape imayé.’ ”

⁴⁰Jeroboam me Solomon bí mokape ito, idola bí Ijipt among lokke Pharaoh roja Shishak kíng dugnyok gela Solomon ke sido loope duupísuto.

⁴¹Solomon ke roja ido longe kídí, delokke bíkke agér inam, delokke bíkke gyan kénnam tabungem Solomon ke dooying kitablo atyintung.

⁴²Bí Israel tabungke rojape, Jirusalemlo takying appiko yéto.

⁴³Bí sila, Dabidke doolung lo bím yula bíkke oo Rehoboam bí rojape yéyanto.