Read Alladian 1 ROJA KÍDÍ 12 Bible Online

1 ROJA KÍDÍ 12 - Alladian bible

1 ROJA KÍDÍ 12

¹Rehoboam me roja imodope Shekhem doolunglo línggíngdan Israel kídíe píídum suyinto, depeila delo bí gíto.

²Dekepe ido delo, Solomon kelok dugnyok gela Ijipt lo dunyok gena Jeroboam bí legí-sigang kídíem tatla delok aalat sutoku.

³Línggídanke Israel ami kídíe Jeroboam me tomla bím gíbola Rehoboam kíng aala ííto,

⁴“Nok abu Solomon bí ngoluke teyonglo adír rupe agérem imola tebegna egedem joolíkto. No eget kídí sim etsamola ngolum asar gampe yémo yémílo, ngolu nok amipe ila nom agér ibiyé.”

⁵Delo Rehoboam bí, “Nolu longum méélamlo aalangkuka, delo ngo nolum poyansuyé,” emla pokolok ami kídíde gípotoku.

⁶Solomon me luyil bosuna migom miku kídíem Rehoboam bí tomla íngkíto, “Ami kídar sim kape poyansumíloi emla nolu míídon?”

⁷Bulu bíme poyilto, “Silo no bulum aipe agér ibila, tatpo-kaapo rupe buluke rogunamem aina agom lok poyan suyémílo, bulu nokke amipe iyaryé.”

⁸Idola Rehoboam bí miku kídí poyildem tatmato. Delok ayanpe bíkke lekope sisa bosula yébosunam angong kídíeme lupo-manmo sula ilatto. Bí bulume,

⁹“Kape kísape, ngoluke eget kídísim etsa molangka, emla roguna kídísim poyan sumíloi aiyén? Nolu kape emdon?” emla íngkíto.

¹⁰Bulu bíme, “Ngokke lakkéng kééyi si ngok abu ugíngem pemílo biisam yadung.

¹¹Noluk teyolo ngok abue tebegna eget em joolíkto; dekedem pemílo ngo tebegyamoyé. Ngok abue nolume aséklok itto; dem pakyape ngo nolum banggénlok demyé, emla no bulum poyan sutola,” emla bulu bím poyilto.

¹²Ami kídídem Rehoboam ke políknampe longum méélam delo Jeroboam lang ami kídíde píídum sutoku.

¹³Roja Rehoboam bí miku kídíke agomem tatmape, ami kídí teyong delo gomképe tolperung agomem luto.

¹⁴Bí bulume, “Ngok abue noluke teyolo eget em tebegrupe pyalíkto. Ngo dem pemílo pakyape tebek moyé. Bí nolume aséklok itto, ngo nolume banggén lok demyé,” emla luto.

¹⁵Sikepe, rojade ami kídí agomem tatmato. Bíkke sikena ségupe inamsi Shiloh doolung lokke kaaluna miri Ahijah kelok RUUTUM ke agom poname apíng dope, RUUTUM ke míínampe ikai. Sikepe ila rojade sékoke agom-aang emkom tatmato.

¹⁶Buluke agomem tatyi berok yimang emla edílo Israel kídíde kangkadí, bulu marla rojadem luto, “Ngolu Dabid kíng ingko koda paabo supename katon? Jesse ke oo lo ingkona legang koda ngolu kabosudun? E Israel kídí, agí-agí moole-baalelo enyin suka langku. Dabid ke oten no, agí ekumem kaasulangka.” Sikepe Israel de mirolpe rollento.

¹⁷Idola Judah among lokke Israel ami teyolo Rehoboam bí rojape ila yéboto.

¹⁸Dekepe iro delo Rehoboam rojabí, agér ina takamem kaabomna Adoniram me lulíkto. Idola Israel kídíde bíme elínglok gepetto. So Rehoboam dan dadape guré gaari lok Jirusalem pe dugpí sugetoku.

¹⁹Depeila silo loope Dabid ke otíng-oyinem mirolpe Israel kídíe idung.

²⁰Edílo Ijipt amonglok Jeroboam ke píngkunamem Israel kídíe kényintodí, delo bulu baane kebang ko baala, Jeroboam me tomla bíme Israel ke rojape ullíkto. Judah opín petomde Dabid ke otíng-oyinlo opéépe yéto.

²¹Rehoboam ke Jirusalem lo píídokuem bí midum 180,000 maglíngko Judah opín loklang Benjamin opín lok gogdum suto. Legade, bí mirolpe ilenna línggíng Israel kídíem bík alag aralo langa dokupe emla sikepe mimak idope ilento.

²²Idola Shédíke agome kaaluna Shemaiah kíng pííto,

²³“Judah ke roja Solomon ke oo Rehoboam melang Judah ami kídíem, delokke Benjamin kídíem, delokke ami kídíem sipe polangka:

²⁴RUUTUM sipe podung, noluke bíro Israel kídíke teyolo mimak ipe gímapeka. Nolu agí-agí ekumlo enyin sulangkuka. Si ngokke ruuname.” RUUTUM ke agom dem tatla bulu takame enpan sutoku.

²⁵Israel ke roja Jeroboam bí adi among Ephraim ke Shekhem doolung dem língkum etor torla edíípe ipala, delo oolko duuto. Delokke bí byaklangkula Penuel emnam doolung dem edíípe irepla dungato.

²⁶Jeroboam bí sikep míísuto, “Si ami kídar si Jirusalem lo gíla, RUUTUM ke Kumkeng Ekum belo aman bila ipak ila itímílo, bulu longeko Rehoboam ke opéépe ilangkula, ngome mokala Rehoboam rojake alag aralo yéyéku.

²⁷Depe imílo among yéta si Dabidke otíng-oyin aralo aayin yéku.”

²⁸Depe mííla ingkí-lupo sugopala bí uunlok ruo mimang annyiko píla ami kídíem sipe poto, “Nolu kumsukape emla Jirusalemlo yagorupe ennga aloosukai. E Israel kídía, si mino noluke uyue. Si mino nolum arope Ijipt among lok laalenkune.”

²⁹Depe lukan gopala akon dem bí Bethello delokke akon dem Danlo melíkto.

³⁰Delo ami kídíe Bethel lolang Danlo gíla kumsula botterupe paab ilento.

³¹Sike sokke teyoloteng Jeroboam bí díítum teyolo kumko ekum mola, Lebi kídíem ilíkmape, angu-angu opín erang lok miripe idope ullento.

³²Judah among lokke kísa poolo píínyi lokke looying kolang longolo adeng-apeko Jeroboam bí ilen bola, runggu píla, ipak ibola ami kídíem ilenboto. Sikepe bí agíke rubo oo mimang pínam delo, ipak ibola Bethel doolunglo ito. Delok teyong delo Bethel lokke kumko ekum kídí delo miri amiemte parlíkla ito.

³³Poolo píínyi lokke looying kolang longo dem bí agí aapílok adeng-ape longepe míílensula Bethello bíkke runggu pínamlo, bí ipak ila ami kídíem ilenboto. Sikepe bí Israel kídí legape gíídí-siipe eme ilenbola, runggulo aman kídíeme ipak ilíkla ilenboto.