Read Alladian 1 ROJA KÍDÍ 14 Bible Online

1 ROJA KÍDÍ 14 - Alladian bible

1 ROJA KÍDÍ 14

¹Delo longe kídí delo Jeroboam ke oo Abijah bí kikai.

²Delo Jeroboam bí bíkke mimedem poto, “Sékote ngokke mime emla kangkén madope no angupe leemo irung sula Shiloh doolung belo gíkaka. Belo, ngome Israel kídíke rojape iyé emla manna kaaluna miri Ahijah bí duudung.

³No burna ettíng apíng íying kolang kék lok delokke ngullang lok kaklak kope bomla, bím kaaríksutoka. Bí koo sokke legangem pokan biyé.”

⁴Depe lulíg kolok Jeroboam ke mime de milo lukampe ila, Shiloh doolunglo Ahijah me kaaríksupe gíto. Ahijah bí yagorupe mijingla amige molla kaapayimape ito.

⁵Idola RUUTUM bí Ahijah me poto, “Jeroboam ke mime, nome luposupe emla pííyé. Bíkke ue kidung, idola no ngokke políknampe bíme pobilangka. Edílo bí pííyédí, delo bí angukon ami kísa iruyé.”

⁶Edílo Ahijah bí mime delokke eyablo adudem tattodí, delo bí bíme lupoto, “Jeroboam ke mime, ekum araso aatola. Kape no irudun? Nok legape ngo aimana agom pokan penamko kadung.

⁷No gílat sulangkula Jeroboam me RUUTUM Israel ke Shédíbí sikepe podung emla pobi langkuka, ‘Ngo nome ami kídí aralok ullenla ngokke Israel ami teyolo ruutumpe ruulíkto.

⁸Ngo Dabid ke oten lok among yétaem laabínla nome bito, idola no ngokke Dabid ke kísamangkai. Dabid bí ngokke lulígem tatla, ngokke yélam lok bí aange apíírupe yémín gela ngokke amig kaabanam mílílo agér-anamem itíto.

⁹Nokke kerangem yéna kídíem pemílo no atíyalum mana agérem ikai. No agí legape arem mimang mola, uyu kumla, ngome apíírupe mepaksula, nokke lamku-danpe melangkula, ngome marlen mokai.

¹⁰Sikepe inam legape ngo Jeroboam ke edung-eralo itung-irélenyé. Israel aralo edítko Jeroboamke ali-atode kadudí, abílpe ilai, ruutumpe ilai, milokong yaryar dem nyokyin moyé. Mepomem kape kísa rombíndudí, deke kísa Jeroboam ke erangem romkutyé.

¹¹Jeroboam ke edung-erange doolung aralo sinamko kayémílo, deme ekiie simangem doyé, delokke moonamlo sina kayémílo simangem kebung-pettange doyé.’ Dekepe RUUTUM bí podung.”

¹²Dekepe porodem Jeroboam ke mimedem Ahijah bí potemtoku, “No ekumpe gílat sukalangku. Edílo nokke ale doolung telo tuang yékudí, delopak nonyike oode siyé.

¹³Israel tabunge kapla-rííla simang dem yuyé. Jeroboam ke edung-erang aralok bím petom aipe yusiyé. Kapeila RUUTUM Israel ke Shédíbí bím petom aipe kaato.

¹⁴Jeroboam ke roja ibomnameme akoneme RUUTUM bí ikam molangkula, bí Jeroboam ke yédongem nyokyin moyéku.

¹⁵RUUTUM bí Israelem itung-iréla, asi bítkolo kape kísa dolbum ane beledudí dekepe Israele beleyé. Buluke neku-bukuem binam aina among sok Israel amiem puubínla elo, sanggodan Euphrates korong kékon elokai pitpan-piran sulíkyé, kapeila bulu uyu mime Asherah ke mimangem bojéko mopala kumsu goola yagorupe RUUTUM ke marnamem kamokai.

¹⁶Israel em RUUTUM bí mepakyé, kapeila Jeroboam bí paab igebola Israel tabunge paab ikai.”

¹⁷Delo Jeroboam ke mimede Tirjah doolungpe entoku. Bík ekum delo píídokuem koo de sikai.

¹⁸Kaaluna miri Ahijah ke nappalok RUUTUM bí kape kísa potodí, deke pakpe, Israel takame Abijah ke simang teyong delo ankí-kenola kabbom-rííbomla ai-kampope bíme yusito.

¹⁹Jeroboam ke roja ido longe delokke abíd agér inam kídíem, bíkke mimak inam kídíem, delokke bíkke among yétaem, yébonam kídí takam legangem Israel roja kídíke dooying kitablo atkumtung.

²⁰Jeroboam bí takying annyi kolang taknyiko rojape yéboto. Bí sila bíme yurodem bíkke oo Nadab bí, bím rojape yétíttoku.

²¹Solomon ke oo Rehoboam bí dítak íying appi kolang atello píídoem Judah ke rojape ito. RUUTUM me kumsuko doolungpe Israel among yéta doolung tabulok RUUTUM ke ullensunam Jirusalem doolung luune delo Rehoboam bí takying kolang dítak kíníd ko rojape yéboto. Bíkke ane amíne Naamah, delokke anede Ammon opín lokke amikuai.

²²RUUTUM ke amig keralo Judahte atímana agérem ito. Buluke paab agérde buluke buku kídíem pemílo atíyamape ila RUUTUM me yagorupe marmoto.

²³Bulute rego miyonglo kumsuko ekum mogola, morí-mojoknam elíngem dínggola, mime uyu Asherah ke mimangem díítum kídílo, rotne esing lerílo dínggong líkla kumsugooto.

²⁴Sikesim pemílo pakyape kumpom ekum kídílo mime-milope notii agér ipom pete ila, Israel kídíke kerape RUUTUM ke monpaknam mibo-miying ami kídí akampe Judah ami kídí dete belumrunam agérem ila yéyinto.

²⁵Rehoboamke dítak pilngonape roja iduem, Ijipt lokke roja Shishak bí Jirusalem em mimakpe aabomto.

²⁶Bí RUUTUM ke Kumko Ekum arang delokke ekuserang takam emlang roja ekum kídí delokke ekuserang takamem giibomtoku. Bí Solomon ke monam uun téngking kídí demla kaapanam ato-siro takamem giiyin bomtoku.

²⁷Depeila deke delokke ayanpe roja Rehoboam bí pitol lok tamkungpe yollangkula leeyan líktoku. Depe pitol tamkung píyan geyékula roja ekumem kaabomna sipaying ruutum kídílo dekedem kaabom dope lulígto.

²⁸Dekepe ila edí-edílodí rojade Kumko Ekumlo gíyédí, delo kaabomna sipaying kídíde tamkung kídídem Kumko Ekumlo joongato, delokke depe irodem buluke duupomlo mesiilangkula itíto.

²⁹Roja Rehoboam ke inam tabungem Judah lokke roja kídíke dooying kitablo attung.

³⁰Rehoboam keelang Jeroboam ke pénsamlo agínpe midu-mimage katíto.

³¹Rehoboam bí sila bík simangem Dabid ke doolung, roja kídíke simang kídíem yupomlo yuto. Bíkke oo Abijah bí bíme rojape yétít bomtoku.