Read Alladian 1 ROJA KÍDÍ 15 Bible Online

1 ROJA KÍDÍ 15 - Alladian bible

1 ROJA KÍDÍ 15

¹Nebat ke oo Jeroboamke Israel teyolo dítak íying kolang píínyinape rojape idoem, Judah lokke rojape Abijah bí ito.

²Bí Jirusalemlo dítak angumko rojape ito. Absalom ke ome Maakah bí Abijah me ona ane.

³Bíkke abu lokke paab inam pakpe bíteng paab ito. Bíkke abu buku Dabid ke aapí-aang kísa bíkke aapí-aangde imape, RUUTUM bíkke Shédíme bí aro-siro mínggela yémato.

⁴Idolateng RUUTUM bíkke Shédíbí Dabid ke legape bíkke ruutum namem iyar gedope, bík teyolo oo ko ruubila Jirusalem emte edíídope imoto.

⁵Kapeila Dabid ke turdungem bíkke inam tabungde RUUTUM ke amig keralo kaaba-tatbaruupe ito. Hittit ami Uriah ke mime legang kékonlo Dabid ke yénam tabungem, RUUTUM ke lulígnam agom atel kokom mepakmape airupe bomgapto.

⁶Jeroboam kelang Rehoboam ke mimak imínsunam idonge Abijah ke yédo takam loope katíto.

⁷Abijah ke roja ido delokke abíd agér inam kídí, delokke abíd legí-sigang kídíem, Judah lokke roja kídíke dooying kitablo attung. Abijah lang Jeroboam bínyikom mimak ití mínsuto.

⁸Abijah bí sila bík simangem Dabid ke doolunglo bíkke abu kídílo lekope yuto. Bíkke oo Asa bí bíme rojape yétít toku.

⁹Jeroboam ke dítak íying annyiko rojape Israel lo ido delo, Asa bí rojape Judahlo ito.

¹⁰Bí Jirusalem lo takying appi kolang taktel ko rojape ito. Absalom ke ome Maakah bí bíkke ane eejoe.

¹¹Bíkke abu buku Dabid ke kísa bí RUUTUMke kangkolo ai-kampope yéla RUUTUM me ashéng moto.

¹²Bí uyu kumsuko kumkeng ekum kídílo notiipe ina milokong, delokke mime kídíem among yéta lokke luyulo monyin lenpala, bíkke kerangke roja kídíke mimang pílíknam kídíem benpak yinla igoto.

¹³Bí bíkke eejo Maakahme rani ane yéyonlok laabínto. Kapeila bí uyu mime Asherah ke belumrunam mimang ko bomtuai. Mimang deme Asa bí puubínla Kidron Yiibelo rompakto.

¹⁴Asa bí uyu kumpom takamem ikutmatuakom bíkke yénam tabunglo RUUTUM kíng míngkesula yétíto.

¹⁵Bí RUUTUM ke Kumkeng Ekum delo bíkke abu kela bík agíke tosaklíknam uun, delokke baldín ekuserang atí takamem Shédí kíng tosaklíkla meyinlíkto.

¹⁶Judah lokke roja Asa lang Israel lokke roja Baasha bínyi, rojape ibosudo teteng delo mimak motímínsuto.

¹⁷Baasha bí Judah amonglo mimak iala, Judah among lokke angko-lenko bedang kaimadope itumdope Ramah doolungem edíírupe líísak etorpe torlento.

¹⁸Dekepe ido emkísi emla roja Asa bí Kumkeng Ekum delokke uun, baldín ekuserang duuna tabungem laala, delokke roja ekum kídí delokke serang duuna kídíem laadum sugeyéla Hejion ke oten, Tabrimmonke oo Siriah lokke roja Ben-Hadad kíng migom kídíem melíkla ekurang takam dem bidola sim rogu agom sim políkto:

¹⁹“Ngonyike buku kídíke kísa ngonyikom opéé atelkope ibo sulape, si uun delokke baldín kídarsi nok legape aman ibiname. No sime torík sugeyéla, Israel ke roja Baasha keelo nokke magpé pe doonamem melangkuka. Depe imílo bí ngokke amonglo bíkke maglíng duunem laabínyéku.”

²⁰Roja Ben-Hadad bí Asa ke agom dem elíkto. Delo bí, bíkke sipaying maglíng ruutum kídíem Israel doolung kídíem mimak iang dope ukum líkto. Bulu mimak iabomla Ijon, Dan, Abel Beth Maakah, Galil Siyéngke dei-degong among kídíem, delokke Naphtali among yéta tabungem buluke alag aralo bomato.

²¹Edílo dekena legang kídíem roja Baasha bí tattodí, bí Ramah doolungem gai-gakorupe líísak etor ibomnam dem megeyéla Tirjahlo duutoku.

²²Depe buluke gírongkuem roja Asabí, Judah ami miyonge (midum atel koteng mepakmape) Ramah doolunglo gíla roja Baashake ilík tunam líísak elíng kídí demlang gaang kídídem, delokke abíd ekurang kídíem jooyin lendope Judah among tabunglo ukumem lulígto. Dekepe ila ekuserang kídí delok roja Asabí Benjamin among lokke Mijpah doolung emla Geba doolungem líísak etor tornatoku.

²³Roja Asa ke itonam tabungem, bíkke miram agér kídíem, líísak etor tornam legang kídíem Judah lokke roja kídíke dooying kitablo atkumtung. Asa bí mijing doku delo, ale kinamko kala bí lebyato.

²⁴Asa bí sila, bím Dabid ke doolunglo, roja simang yupomlo yuto. Bík oo Jehoshaphat bí, bíme rojape yétít toku.

²⁵Judah lokke roja Asake dítak annyinape roja iduem roja Jeroboam ke oo Nadab bí Israel ke rojape ito.

²⁶Bíte bíkke abu akampe RUUTUM me kangkidope paab ila Israel em paablo yéboto.

²⁷Longe konem Philistia among lokke Gibbethon doolungem Nadab lang bík maglíng kídíe mimakpe iabomla idungem, Issakhar opín lokke Ahijah ke oo Baasha bí Nadab me rukupla mokato.

²⁸Judah lokke roja Asa ke dítak angumnape roja ido delo sim agér sim ito. Depe irongem Israel ke rojape Baasha bí Nadabme yétít toku.

²⁹Bíkke roja irongpak delo bí Jeroboam ke edung-erang takamem moka kayinto. Shiloh doolung lokke RUUTUM me agér ibina kaaluna miri Ahijah ke nappalok RUUTUM ke agom potonam adupe legí-sigang si iyinkai. Jeroboam ke ali-atod, edung-erang kídí tabungem midum atel koteng turmomape petyinto.

³⁰Sikepe igasi, Jeroboam bí atírumape paab agér ila, Israel daadiemte paab imola RUUTUM Israel ke Shédí me yagorupe marmoto.

³¹Nadab ke legí-sigang kídíem Israel ke roja kídíke dooying kitablo atkumtung.

³²Judah lokke roja Asa lang Israel lokke roja Baasha ke rojape idung teteng delo edílokom aibosumato.

³³Judah lokke roja Asa ke dítak angumnape roja iduem, Ahijah ke oo Baasha bí Israel ke rojape ito. Bí Tirjah lo dítak íying annyi kolang dítak appiko rojape ito.

³⁴Bíkke yétítnam Jeroboam ke kísa, bíte RUUTUM ke kangkidope paab ila Israelem paab iboto.