Read Alladian 1 ROJA KÍDÍ 16 Bible Online

1 ROJA KÍDÍ 16 - Alladian bible

1 ROJA KÍDÍ 16

¹RUUTUM bí Hanani ke oo, kaaluna miri Jehu kíng Baasha ke legape sim agom sim poto,

²“No amín kamana amikuai, idola ngo nome Israel ke rojape imoto. Supak no Jeroboam ke kísa paab ila ngok ami kídíem paab ibokai. Buluke paab kídíde ngome marmokai.

³Depeila ngo Jeroboam me kape kísa itodí, dekepe nom lang nok edung-erang kídí loope iyé.

⁴Nokke erang kídí aralo séko buludí doolunglo siyéne, deme simangem ekiie doyé. Séko buludí moonamlo siyéne, buluke simangem kebung-pettange doyé.”

⁵Baashake abíd agér inam kídíem, bíkke miram agér kídíem, Israel lokke roja kídíke dooying kitablo atkumtung.

⁶Baasha bí sila bíme Tirjah lo yuto. Bíme bíkke oo Elah bí rojape yétíttoku.

⁷Baasha kelang bíkke erang kídí teyolo RUUTUM ke atímana agomem kaaluna miri Jehu keelok políknam legade, RUUTUM ke kangkidope Baasha ke paab itíkolok políkto. Roja Jeroboam ke atímana adupe Baasha bí imín geko teyoloteng Jeroboam ke erang takamem petpaknam dai paab legape, bík teyolo RUUTUM bí yagorupe marto.

⁸Judah lokke roja Asake takying annyi kolang dítak akkéko rojape iduem, Baashake oo Elah bí Israelke rojape ito. Bí Tirjah lo dítak annyiko rojape ito.

⁹Roja lokke attungkon guré gaari kídíke ruutumpe ina Jimri bí, Elahke mirupe rukup lento. Longe konem roja ekumem kaabomna Arjake ekumlo Elah bí tíngírsula duudungem,

¹⁰Jimri bí ekum delo aala, Elah me mokala, bíme rojape yétítto. Sikena legí-sigange Judah lokke Asa rojake takying annyi kolang dítak kínídnalo Tirjah doolunglo ito.

¹¹Jimri bí edílo rojape ikadí, delo bí kerangke rojape ina Baasha ke edung-erang tabungem petyinto. Milokong takam emlang ali-atod kídí takamem nyokyinmoto.

¹²Kaaluna miri Jehu keelok RUUTUM bí kape kísa potodí, dekepakpe Baashake erang teyolo Jimri bí ito.

¹³Baasha lang Elah bínyike uyu mimang kumla Israelem paab imola, RUUTUM Israel ke Shédíke marnamem bínyi ipaalento.

¹⁴Elah ke inam legang kídíem, Israel ke roja kídíke dooying kitablo attung.

¹⁵Judah lokke roja Asake takying annyi kolang dítak kínídko roja idoem, Tirjah lo Jimri bí longe kíníd kope Israel rojape ito. Dekepe Jimri ke ido delo Israel maglínge Philistia doolung Gibbethon em mimakpe iabomduai.

¹⁶Edílo Jimri bí rukupla, Elahme mokala rojape ikai emnam agomem Israel maglíngde tattodí delo bulu, buluke maglíng ruutum Omrime Israel ke rojape parlíkto.

¹⁷Depe irongem bulu Gibbethon lok enlat sulangkula Tirjah doolung deme mimakpe aabomtoku.

¹⁸Edílo doolungde buluke alag aralo angkai emla Jimri bí kaatodí, bí roja ekum arangyalum lokke ekum delo aala, ekum dem eme rílíkla, bí agísuete gukasukai.

¹⁹RUUTUM ke mirolpe bíkke paab inam legape bí sikepe sikai. Bíkke kerangke roja Jeroboam ke kísa, bí agí paab agér loklang Israel em paab ibola RUUTUM me kangkimoto.

²⁰Jimrike inam tabung emla bíkke rukupnam legangem Israel ke roja kídíke dooying kitablo attung.

²¹Israel teyolo roja igalo Israel kídíe opéé annyi kope ito. Ayokone Ginath ke oo Tibni me roja idope elíkto, delokke ayokone Omrime.

²²Méélam delo Omrime elíkna opééde ikumto. Tibni bí sila, Omri bí Israel ke rojape ito.

²³Depeila Judah lokke roja Asake dítak íying angum kolang dítak atel kope roja iduem, Omri bí Israelke rojape ito. Bí takying kolang taknyiko rojape ito. Kerang dítak akkédem bí Tirjahlo duuto.

²⁴Depe iro deme bí, Shemer emnam ami kologe Samari díítum dem baldín nokdi éjar akkélok rela díítum deme líísak etor torgola doolung luune kope isala, among atope ituana Shemerke amínlok doolung amín demte Samari emla mínlíkla bí duungabomto.

²⁵Kerangke Israel roja kídíem pemílo Omri bí pakyape paab agér iyato.

²⁶Bíkke kerangke roja Jeroboamke kísa bí paab agér ila, ami kídíemte paab ibola, delokke uyu mimanglo kumgoobola, RUUTUM Israelke Shédíme yagorupe marmoto.

²⁷Omrike inam tabungem Israelke roja kídíke dooying kitablo atkumtung.

²⁸Omri bí sila bík simangem Samarilo yuto. Bíme bíkke oo Ahab bí rojape yétíttoku.

²⁹Judah lokke roja Asake takying angum kolang dítak píínyi kope roja iduem Omrike oo Ahab bí Israelke rojape ito. Bí Samarilo takying annyi kolang taknyiko rojape ito.

³⁰Bíkke kerangke roja kídíem pemílo bí pakyape paab inam petomlo bí irísumape,

³¹bí Sidon lokke roja Ethbaal ke ome Jejebel me mimepe laala Baal uyume kumsuto.

³²Bí Samarilo Baal uyuke legape kumko ekumko mola, rungguko píla runggu dem kumko ekum arang delo pílíkla Baal uyume kumsu lento.

³³Dem petommang, delok teyong deloteng bí uyu mime Asherah ke mimangem píla kumsuto. Bík keralo edítko Israelke roje yétodí, bulum pemílo pakyape bí atímape ila, RUUTUM Israelke Shédíme yagorupe marmoto.

³⁴Bíkke longelo Bethel lokke Hiel bí Jeriko em doolungpe ireptoku. Nun ke oo Joshua kelok RUUTUM ke polu-poornam agompe, Jeriko doolungem isadíku longe delo Hielke oo abíyalum Abiram bí sikai, delokke bíkke oo aníyalum Segub bí, Jeriko doolung delokke líísak etor eyabem ilendoem sikai.