Read Alladian 1 ROJA KÍDÍ 17 Bible Online

1 ROJA KÍDÍ 17 - Alladian bible

1 ROJA KÍDÍ 17

¹Gilead among lokke Tishbe doolung lokke kaaluna miri Elijah bí Ahab roja kíng gíla luto, “RUUTUM Israel ke turna Shédí, ngok agér ibinamke amín lok nom ngo podung, dítak taknyi tagum araso, ngokke pokumang teteloope among so tangar demangkom pedong atí kayimayé.”

²Delo Elijah me RUUTUM bí poto,

³“No menape sok sanggodanpe gílangkula Jordan korong sanggo danke Kherith roojik elo duusi sugetoka.

⁴Roojik delo no asi tííla ilangka, delokke ngo paak kídíem nome delo donamem ginga bidope lulígto.”

⁵RUUTUMke pokampe bí ito. Bí Jordan korong sanggodan delo gíla Kherith roojik delo duuto.

⁶Delo yume rohpe paak kídíe bíme adín emlang burna ettíngem boma bitíto, delokke rojik delok bí asi tííto.

⁷Longe ayoko irongem roojik delokke asie ongkai.

⁸Delo Elijah kíng RUUTUM ke agome pííto,

⁹“No menape Sidon among lokke Jarephath doolunglo gíla, delo duupo langka. Ngo delo nome donam-tíínam bidope meyéng konem lulígtung.”

¹⁰Depe lulíg kolok bí Jarephath lo ento. Edílo bí doolung delokke luyab delo píítodí, delo meyéng konem ereena esing nata godope kaato. Elijah bím gogla poto, “Ngome kaglaklo asi anyongko tíípenampe bomabi.”

¹¹Mimede laape gídokuem bí, “Ngome ereena ettíng alop koteng boma bilangkuka,” emla pomín geto.

¹²Dem tatla mimede poyansuto, “RUUTUM nokke turna Shédí kelok ngo pésula podung, ngokkíng pamnyunam ettíng atel kokom kamang. Ngokkíng petom ettíng lagyumko togu pekinglola olib tél anyongko kaklaglo kadung. Delokke supak, ngokkepelang ngok oo legape anyongko duuna sim donampe ingum dokupe emlamin esing ereena anyongko natagoodune. Si ngonyike dotílyalum pename, delokrongem kenoe ngonyim pínkayé.”

¹³Elijah bíme poto, “No atí pesomapeka. No ekumlo gílangkula ngok pokampe ilangkuka. Idola kerayalumpe améngona ettíngko no edítko kadudí delok mopala, ngome boma bilangka. Delok abídem nokke pelang nok oo kepe itokuka.

¹⁴Kapeila, RUUTUM Israelke Shédíbí sikepe podung, ‘Among so pedong omokumang adape togu peking delokke ettíng de kadan teteyé, delokke kaglag delokke télde kadan teteyé.’ ”

¹⁵Mimede gílangkula Elijah ke lukampe itoku. Delo loodí kítpe Elijah kepelang mime delokke legapelang oo delokke legape doname kabuto.

¹⁶Kapeila togu peking delokke ettíng deme doyinmato, delokke kaglag delokke tél demte iyinmato. Dekede Elijah keelok RUUTUM ke togesunam agompe ito.

¹⁷Longe ayokon méélam delo mime ane delokke oode kikai. Bík kinamde yago yayang ila, itíl-isa delo bí sikai.

¹⁸Mime anede Elijah me poto, “Shédíke amino ngok teyolo ingko koda aklí bomdun? No ngokke kerang paabem míípang sumolangkula, delokke ngok uem simope emlangía aatone?”

¹⁹Delo Elijah bí, “Nok uem ngom bitola,” emla pola simang dem ane kerang delok bola, bíkke dungko ekum teyongpe, pírtek delo bosa langkula bíkke ketkeng kyare delo simang dem leelíkto.

²⁰Depe ipala bí RUUTUM kíng kapgu-roguto, “E RUUTUM ngok Shédí, no ngokke dongko meyéng aneso bíkke uem simola adírem bilík dunía?”

²¹Depe empala bí koo simang teyong delo lengum kokai yamtarla gomjém bomla, RUUTUM kíng kapla kumto, “E RUUTUM ngok Shédí, koo sokke aidem aamolangkula bíme turmo langkuka.”

²²RUUTUM bí Elijah ke kumnamem tatbila, koo delokke aide aalangkula bí turkaku.

²³Delo Elijah bí koo dem borep langkula pírtek delok bola ekumpe boitoku. Bí koo dem ane delo bidola, “Kaatola nok oo si turkaku,” emto.

²⁴Delo mime anede Elijah me poto, “Supak lokke ila no Shédíke amiko emla ngo kénkai. Delokke nokke nappang lok lenna RUUTUMke agom de arorunge.”