Read Alladian 1 ROJA KÍDÍ 18 Bible Online

1 ROJA KÍDÍ 18 - Alladian bible

1 ROJA KÍDÍ 18

¹Longe ayorungko doorodem, dírí delokke toodí angumnana delo Elijah me RUUTUM bí poto, “Gíla no Ahab rojake keralo agíem lengkan sulangka; delokke ngo pedongem omoyéku.”

²Delo Elijah bí Ahab me kaaríksupe gíto. Delo longe kídí delo dírí-kenoe Samarilo yago alongto.

³Depeila roja ekum kídíem kaabomna Obadiah me Ahab bí tomto. (Obadiah bí RUUTUM me airupe míngke sunakuai.

⁴RUUTUM ke kaaluna miri kídíem Jejebelke mokaduem Obadiah bí buluke aralok midum língkoko rumnyokla, deme bupík arang annyi kolo midum íying pilngo pilngope rumnyokla, duunyok motula bulum donam-tíínamem bila ito.)

⁵Obadiah me Ahab poto, “Kaju, ngonyi among sokke kéényung-kéérung takamlo delokke asi siirung kako kídí tabunglo magoola, ngoluke guré kídí emlang gado kídí sim turmodope nesi-neyang atíem kanggo laju. Dekedem paamílo simon-sili kídísim mokapenam kamayé.”

⁶Depe tolík bosurodem, bínyi among dem orpansula Ahab bí moole konem, delokke Obadiah bí moole konem magooto.

⁷Obadiah ke gídungem bí Elijah me kaaríksuto. Obadiah bí Elijah me kangkénla, amongpe gubala kumsudola, “Ngok ruutum Elijah no aroya?” emla lupoto.

⁸Elijah poyansuto, “Aroe ngo moko. No gílangkuka nok rojem ngo si kadung emla polangka.”

⁹Obadiah bí poyansuto, “Ngo ingko imem koda iton? Supak ngo Ahabme kaarík sukumílo bí ngom moka langkom iyé.

¹⁰Nokke turna RUUTUM Shédí kelok podung, ngokke roja Ahab bí nome tani among arang sokke among takamlo mata motung. Edí-edílodí among ruutum kone, bíkke amonglo no kamang emla bím popayédí, delo dem among ruutumdem, nom kaamang emla pésumodung.

¹¹Sikepe iko teyolo no kadung emla ngome pokandope no míídunía?

¹²Ngokke nom mela gírongkuem RUUTUM ke Aide nome kénmang kolo bomnyok kumílo? Edílo ngo Ahab me so duudung emla pokan rongkuem bí nom matala mapaamayémílo, Ahab bí ngome arope mokayé. Ngo ngokke koo amélokkai RUUTUM me airupe míngkesunako.

¹³Edílo Jejebel bí kaaluna mirí kídíem moka gootodí, delo ngo bupík kídí aralo midum íying pilngope ipansula midum língkoko rumnyokla, bulum donam-tíínamem bila inamem, no agísue tatmanía?

¹⁴Sikena rego teyoloteng kape kísa no rojeme ngome kaaríksula Elijah bí si kadung emla pokandope lulígkan? Bí ngome arope mokayé.”

¹⁵Delo Elijah bí, “Ngokke agér ibinam turna RUUTUM kelok pésu dola silo ngo agísue Ahab rojake keralo aayé emla togesudung,” emla poyansuto.

¹⁶Dem tatla Obadiah bí Ahab roja kíng gílangkula bím kaarík sula legangem popabito. Ahab dem tatla bí agísue Elijah me kaaríkpe gíto.

¹⁷Edílo Ahab bí Elijah me kaarík sutodí bí Elijah me, “Israel aralo ebín along bona no mayasi,” emla luto.

¹⁸Elijah poyansuto, “Ebínrupe ibonade ngomang. Nomin! No lang nok abuemin. No RUUTUM ke lulígnamem tatmape Baal uyuke mimangem kumsudung.

¹⁹Karmel díítumlo ngome kaarík sudope Israel ami takamem gogdum sulangka. Delo Baal uyuke kaaluna 450 miri kídí demla Jejebel ke dokolo domín gena uyu mime Asherah ke kaaluna 400 miri kídí demte gogatoka.”

²⁰Depeila Ahab bí Israel tabung emlang Baal uyume kumna kaaluna miri tabungem Karmel díítum delo tomdum suyinto.

²¹Elijah bí ami kídarlo gíla luto, “Edít longe koda nolu aapí-aang annyi pénsamlo yétíyéne? RUUTUM bí Shédí aroe mílo, bíkkíng gímín gelangka; delokke Baal bí Shédí aroe mílo, bíkkíng gímín gelangka.” Idola ami kídíde asoope tatla agom atí poyansuna kamato.

²²Delo Elijah bulum poto, “RUUTUM ke kaaluna miripe ngo atel petom idung, idola Baal uyuke kaaluna mirie 450 amiko idung.

²³Rubo annyiko nolu bomato. Baal uyuke kaaluna miri kídíde rubo konem laala mokala deme tarongpe tekla ipala adínem ereena esing kumnam teyolo leelíktoka. Idola eme parlík mapeka. Rubo kon deme deke pakpe ngo iyé.

²⁴Depe irongem Baal uyuke kaaluna miri kídarde buluke Baal uyume kumsutoka, delokke ngote RUUTUM me kumsuyé. Bínyike arang lokke sékodí emelok kumsunamem toríksuyédí de Shédí aroe.” Dem tatla ami takamde, “Nokke ponam si aido,” emla tolíkto.

²⁵Delo Baal uyuke kaaluna miri kídar dem Elijah bí poto, “Nolu alung-abamyape idungnade, nolu kerayalumpe rubo koneme langge langka. Deme ngokke potonampe irongem noluke uyueme nolu kumlangka, idola esing kídí delo eme parlík mapeka.”

²⁶Delo bulu bulum binam rubodem laala, irung geyéla roh lokke longe raadang loope Baal uyuke amínem mínla kumtíto. Bulu érla, “E Baal, ngoluk kumnamem tatbiyika,” emla gogla, buluke pítunam runggu deme miri paksongpe songgo bomla itíto. Idola buluke kumnam kídídem poyan-luyansuna agom-aang, adud atí kamato.

²⁷Longe raadang delo Elijah bulume, “Éérdukyala kumtola! Bí de uyu komin! Bí míídír ladí duudune, demangkom momang along ladín idune, demangkom en-gong gígong kanadí! Demamílokom bí ipdunadí? Nolu bím utpe aiyépe!” emla luyé-luléla luto.

²⁸Delo bulu yagoyape kumdukla buluke idongsupe buluke amíl lok iyyie bilendupe yoksiklok, delokke yoksalok amíl-amoem pésula, gatsula ito.

²⁹Doonyi tuyotduem buluke ulo jérla ankírupe kumsunam kídíde yume dan ipak idí loope ilík lateng buluke kumnamem atí tadbimato, delokke atí adud-ayud koteng kamato.

³⁰Delo Elijah bí ami kídíem, “Ngok anín so aatola,” emla tomnín suto. Bulu takam bík anínlo aanínla gargo bosuto. Delo bí RUUTUM ke runggu aku bénna konem isi-simo langkula ito.

³¹Depe ipala RUUTUM ke, “Nokke amínem Israel emyé,” emla mínnam Jakob kelok lenna opín íying kolang annyi amínpe dabu íying kolang annyiko laala delok,

³²RUUTUM ke amínlok rungguko pípala, runggu dem bilgodope, delokke litar íying kolang appina asie bííbom lana déébíkko bíggoto.

³³Runggu teyong delo esingem kumlíkla delo rubo dem tarong-tarongpe tekpala esing teyong delo leelíkto. Depe ipala ami kídí deme, “Bottena asi kaglag appi kolo asi kalíkpala adín teyong solang esing kídí teyong so asi kídíem purlíktoka,” emla lulígto.

³⁴Ami kídí delokke depe irodem bí “Lekoda purlíktoku,” emla lulígla purlík motoku. Delok teyong delote, “Lekoda lengum nanape purtem líktoku,” emla lulíg langkula ami kídíde ibitoku.

³⁵Dekepe ikolok asie runggu delok bitboola déébík deloteng biilíkto.

³⁶Adeng dan ipak idí delo Elijah bí runggu anín delo aadola kumsuto, “E RUUTUM, Abraham keela, Isaak keela, Jakobke Shédí, siloke longeso nomin Israel ke Shédí aroe, delokke ngo nome agér ibine, delokke legang takam si nokke lulíglok idung emla kényin modaklangka.

³⁷Sim ami kídí sime no aapí míílat sumodungku emla kénsudope, delokke RUUTUM no petommin Shédí aroe emla ami kídí si nome kéndokupe ngok kumsunam sim no tatbilangka.”

³⁸Delo RUUTUM ke eme otokla ipak ilíknam adín tarong kídíem, esing kídíem, elíng kídíem, kédéng kídídem guyin bomla déébík delokke asi demte ereng modanto.

³⁹Edílo deme ami kídíe kaatodí, bulu amonglo gubala, “RUUTUM bímin Shédí aroe! RUUTUM petommin Shédíe!” emla ulo jérla kumto.

⁴⁰Delo Elijah bulum lulígto, “Baal uyuke kaaluna miri kídíem umyinto. Séko memkom dugnyok kumomapeka.” Delo ami kídíde bulume umyinla, Elijah bulume Kishon Koronglo gíbola moka kayinto.

⁴¹Dekepe irodem Ahabme Elijah bí lupoto, “No supak gílangkula, dola-tííla itolangku. Ngo yagorupe pedong uanam adudem tatdung.”

⁴²Ahab ke dodo-tíídokupe gídokuem Elijah bí Karmel dííte teyolo resala, bíkke lebíng annyi pénsamlo bík dumpongem ila amonglo gubala duungato.

⁴³Depe igeyéla bím agér ibinadem, “Gíla no siyéng danpe kaatoka” emla lulígto. Delo amide gíla kaadola, “Ngo atí kaapamang,” emla poyansuto. Dekepe lemkíníd kokai Elijah bí agér ibinadem “Gíla kaatoka,” emla lulígto.

⁴⁴Lemkíníd nanadem agér ibinade, “Tani alag kísa pakna aména doomugko siyénglok saadung,” emla pobito. Delo Elijah bí, “Nokke guré-gaariem leemola pedonge otummang adape menape ekumlo gílangkuka emla Ahabme polangka,” emla agér ibina amidem lulígto.

⁴⁵Dekepe ila anyongko doorodem, taleng dem yorana doomuge bííbomla, gumname mutla yagorupe pedonge uangkai. Ahab bí, bíkke guré-gaari delo reesala Jejreelpe dugtoku.

⁴⁶Delo RUUTUM ke tolnam-ralname Elijah kíng aala, bíkke egeme edíírupe uugílo ginlíksula Ahab rojake kerang kerangem duggela Jejreel loope dugto.