Read Alladian 1 ROJA KÍDÍ 19 Bible Online

1 ROJA KÍDÍ 19 - Alladian bible

1 ROJA KÍDÍ 19

¹Elijahke inam legí-sigang tabungem, bíkke Baal uyuke kaaluna miri kídíem mokanam legang takamem Ahab rojabí, bíkke mime Jejebel me popatoku.

²Jejebel bí Elijah kíng agomko políkto, “Kaaluna miri kídar dem kape kísa no itodí, deke pakpe nomkom ngo nyampoke longelo imayémílo uyue ngom mokadakyika.”

³Dem tatla Elijah bí pesola, bíkkíng yémín gela agér ibinem tomsula, Judah among lokke Beersheba doolunglo dugnyok geto. Delo píírodem, bíme agér ibinadem mepala,

⁴bí agísue longe rubuung enbomsunam bedang kope moonamlo enla, esing ugyum arang kolo apééla, “E RUUTUM, ngo ankang along sukabong, ngokke buku kídíem pemílo ngo aiyana amimang, ngok yénam sim laabín langka,” emla bím simodope bí kumsuto.

⁵Depe kumrongem, esing rumkíng delo bí kedala ipto. Menang asak teyong kotokikone bím ugdola, “Gerepla dotola,” emla utrepto.

⁶Bí darep langkula kanggong sutoname bíkke dumpong anín delo burna ettíng alem kolang asi kaglakko kaapato. Bí dem dola-tííla ipala ibatoku.

⁷Lennyinape RUUTUM ke kotokide bím udalangkula poto, “Gerepla dotola, nokke bedang enpenamsi deddíko kadung.”

⁸Depe emkolok bí darep langkula dola-tííla ito. Donam delok bí amíle ralge langkula looying appi kolang yoying appiko enbomsula Shédíke dííte Sinailo [8] pííto.

⁹Delo bí bupík arang kolo aala yohdem duuto. Delo RUUTUM ke agome Elijah kíng pííto, “Elijah no kape idun?”

¹⁰Elijah poyansuto, “RUUTUM Ralya yalumna Shédíke legape ngo yagorupe erla agér ito. Idola Israel kídíe nokkíng daapong ibosunam ayonem mepak langkula, nokke runggu kídíem benla, nokke kaaluna miri kídíem mokala ito. Supak ngo petom turdung. Ngomteng bulu mokape ibomdung.”

¹¹RUUTUM bí bíme poto, “No sok gílenla dííte ponyuk telo, ngokke keralo dagalangka, kapeila ngo aadak.” Delo yagorupe botteruna gumnam asare mutla dííte dem barkémola elíng kídíeme yoppan-yopransula ito. Idola RUUTUM bí gumnam delo kamato. Gumnam asar kékon delo taron bottenako tonto, idola taron delo RUUTUM bí kamato.

¹²Taron kékon delo eme aato, idola eme deloteng RUUTUM bí kamato. Eme kékon delok eetet-remelona agomko aato.

¹³Edílo Elijah deme tattodí, bíkke ege delok bíkke migmoem polumsula, bupík arung angko delo daglento. Delo agomde bím ííto, “Elijah no so ingko koda idun?”

¹⁴Elijah poyansuto, “RUUTUM Ralya yalumna Shédíke legape ngo yagorupe erla agér ito. Idola Israel kídíe nokke daapong ayonem igeyimape ila, nokke runggu kídíem benpakla, nokke kaaluna miri kídíem mokala ito. Supak ngo petom turdung. Bulu ngomteng mokape emla matadung.”

¹⁵RUUTUM bí bíme poto, “No ingkolok aatodí, delok gílat sulangkuka. Damaskas ke anín moorukpe gílangka. Edílo no delo pííyédí, doolung delo aala Hajael me Siria rojape pídé líklangka.

¹⁶Delokke Nimshi ke oo Jehume Israel ke rojape, Shaphat ke oo Elishame kaaluna miripe, nome yétít dokupe pídélíklangka.

¹⁷Hajael ke yoksalok dugnyok genako kayémílo, deme Jehubí mokayé, delokke séko-sékodí Jehuke yoksalok dugnyok geyéne deme Elisha bí mokayé.

¹⁸Idolateng Israel aralo Baal uyuke keralo gubala kumsumane, delokke bíkke mimangem mumpup kímana midum éjar kínídko ngo mesiisuyé.”

¹⁹Depe lulígrodem Elijah delok gílangkula Shaphat ke oo Elishame kaaríksuto. Delo Elisha bí aal gurduai. Gooru pumsu íying kolang atelko bíkke keralo aal gurgela, bí íying kolang annyinape aal gurtíl yalum míndo. Elijah bí bím kaala, bíkkíng gíala, agíke galuk genamem Elisha kíng ilíkto.

²⁰Depe irodem Elisha bí Elijah ke méélamlo agíke aal gurnamem mepak geyéla dugmín geto. Bí píímín gedola lupoto, “Ngokke ane-abulo yépan-dagpan sugape bínyim mumpup dope gímopongkui, delokrongem nokkíng ngo mamín geyéku.” Dem tatla Elijah poto, “Aiyé, gípong kalangku. Ngo nome lutummang.”

²¹Delo Elisha bíme megeyéla, gílat sulangkula bíkke gooru pumsu deme pala, nangol-jungoli kídíem esingpe takla rudíndem keenala ami kídíeme dodope orto. Depe irongem bí Elijah kíng gímín gela bím igulnape yémín gekai.