Read Alladian 1 ROJA KÍDÍ 2 Bible Online

1 ROJA KÍDÍ 2 - Alladian bible

1 ROJA KÍDÍ 2

¹Dabidke sidí longe píínínrodem, bík oo Solomon me tomala méélamyalumpe luyilem poto:

²“Tani among sok ngo gídakku. Nok aapí-aange edíílangka, mijin-hakjinla yélangka.

³RUUTUM nokke Shédíbí ingkuem lulígyédín dem ilangka. Mosike ayonlo atnam takamem igelangka. Depe imílo nokke yétíng takamlo, agér itíng takamlo no utepooroem paayé.

⁴No RUUTUM ke agom-aangem tatla yémílo, kapekísa bí, nokke oten-siirek loope buluke aapí-aange RUUTUM ke lulígem aipakpe iyar geyémílo, Israel amongem ruutum ayar bomyé emla togesutodí, dem togesunam dem RUUTUM bí bomgap biyé.

⁵“Sok teyoloteng maglínglok ruutumpe ituana Jether ke oo Amasa melang Ner ke oo Abner bínyim Joab bí mokala ngok teyolo bíkke atímang inamem no kénsudung. Midu-mimak lokke mokanamem aapí eetet doku longelo emmumpe bínyike teyolo Joab bí edo rayan sulangkula bínyim mokakunam dem no míípang sutokuka. Aiyope yésuna amiem bí mokato. Deke delokke daie ngok teyoso aalangkula, bíkke imem legape ngo ankang along sukaku.

⁶Nokke gyan kénnampe bíme kaalangkuka. Idola bíkke pemongna dumpongem Sheollo eetetpe tokmo mapeka.

⁷Idola Gilead lokke Barjillai ke oo kídíem no ayalangka, delokke nokkelo lekope dobo-tííbo sumolangka, kapeila nokke bíro Absalom keelok ngokke dugnyok gedagem bulu ngom igulto.

⁸Benjamin among lokke Bahurim doolungke Gera ke oo Shimei me aipe kén-gaplangka. Ngokke Mahanaim doolunglo gído longe delo, bí ngom yagorupe lula bééto. Idola edílo bí ngom Jordan koronglo kaarík sutokudí, delo ngo RUUTUM ke amínem mínbom dola moka mayé emla pésuto.

⁹Idola no bím edo rakumape imapeka. No gyan kana amie, nokke ipenam agérem kénsune. Bíme mokalangka.”

¹⁰Dabid bí sila bíme Dabid ke luune delo yuto.

¹¹Bí dítak íying appikope Israelke rojape ito. Hibronlo dítak kínídko rojape ito, delokke Jirusalemlo takying angum kolang tagumko rojape ito.

¹²Solomon bí, bíkke abu Dabidme rojape yétíttoku, delokke bíkke roja yétaem edíírupe ilento.

¹³Longe konem Haggith ke oo Adonijah bí Solomon ke anelo Bathsheba kíng aato. Delo Bathsheba bí, “No ai-kampopía aadun?” emla ííto. Delo bí, “Em, ai kampope,” emla podola potemto,

¹⁴“Nom ngo legangko pobosupe míídung.” “Ingkokoda?” emla Bathsheba ííto.

¹⁵Bí poyansuto, “Ngo rojape ipeníai. Israel tabunge dekepe míílíktuai, idola legí-sigange angula, ngokke bíroe rojape ikai, kapeila ato-siro takam si RUUTUM ke míínampe ikai.

¹⁶Supak ngo nome roguko kodung, no deme tatbimape imapeka.” “Ingko koda?” emla Bathsheba ííto.

¹⁷Bí poyansuto, “Shunem doolung lokke mime koo Abishagme ngokke mimepe idope roja Solomon kíng no rogu bilangka. Bí nom ma emmayé.”

¹⁸Bathsheba poyansuto, “Ngo nok legape rojaem pobiyé.”

¹⁹Depeila Adonijah kepe agom pobipe, bí roja delo aato. Bím kaala rojade dagrepla ashéng lupoem poríkla, bík keradelo gubadola roja paleng delo dungatoku. Delo bí ane delokke legape palengko bíkke lakbík danlo joongamola delo Bathsheba bí dungato.

²⁰Depe irodem Bathsheba bím lupoto, “Nom ngo aména roguko kadung. No dem ma emmapeka.” “Ngok ane, nok míínamem potola, ngo deme bimape imayé,” emla rojade poto.

²¹Anede poyansuto, “Nokke bíro Adonijah ke mimepe Abishag me no tolíktoka.”

²²Delo rojade bím poto, “Abishag me bíkkíng mimepe tolíkdope kape no pokan? Bíme bidope among yéta simte no ngokkíng kobilado. Aroe, kapeila bí ngokke abínge delokke miri Abiathar lang Joab bí bíkke opéépe idung.”

²³Delo Solomon bí RUUTUM ke amínlok pésuto, “Sikepe Adonijah ke agom legape ajéngem bík yénam teyolo ngo edo ramayémílo RUUTUM bí ngok teyolo atírumape idakyika.

²⁴RUUTUM bí edíírupe ngok abu Dabidke roja palenglo ngom duumokai. RUUTUM bí agíke togesunamem mesiisula among yétasim ngom lang ngok otíng-oyinlo ruulíkbito. Ngo turna RUUTUM ke amínlok pésudung, siloke longeso Adonijah bí siyé.”

²⁵Depeila roja Solomon bí Benaiah me lulígto. Bí gíla Adonijah me mokato.

²⁶Depe iro delo miri Abiathar me roja Solomon bí poto, “Nokke agíke Anathoth doolunglo gísulangkuka. No moka penampe ituai, idola supak nom ngo mokamayé. Kapeila no RUUTUM ke Daapong Sondugem kaabomla ngok abu Dabidke ankí-keno tabunglo ankíbosula yéto.”

²⁷Depe lupala Solomon bí Abiathar me RUUTUM ke agér ikolok igétoku. Depeila miri Eli kela bíkke otíng-oyin teyolo RUUTUM bí kape kísa Shiloh doolunglo lutuadí deme apíng moto.

²⁸Sikena legí-sigang kídíem Joab bí tatto. (Bí Adonijah me igul bosuto, idola Absalom me imato.) Depeila bí RUUTUM ke Tombu ekum delo dugala runggu delokke kéényung kídídelo gagdasula dagto.

²⁹Dekepe Joab ke duknyok gela Tombu delokke runggulo dunggedung emla koborem edílo roja Solomon bí paatodí, delo bí Joab kíng kotoki ko lulígla kape bí runggu delo dugang gekan, emla íímoto. Solomon me pesolok bí dekepe igedung emla Joab bí poyansuto. Delo Solomon bí Benaiah me lulígla Joab me mokadope melíkto.

³⁰RUUTUM ke Tombu delo bí aala Joab me lupoto, “Roja nom lenlangkuka emla podung.” “Ma, ngo so siyé,” emla Joab poyansuto. Delo Benaiah bí Joab ke agomem gílangkula roja deme popatoku.

³¹Solomon bí lulígto, “Bík pokampe ilangka. Bím mokala yulangka. Delomino, siidum-dengepe yésuna amiem Joabke mokanam daie ngokkíng lang Dabidke otíng-oyin teyolok kaimayéne.

³²Dabid ke atí kénmape Joab bí amiem emmumpe mokato. Joab mempemílo gaiyana, siidum-dengepe yésuna Israel ke maglíng ruutum Abner delokke Judah lokke maglíng ruutum Amasa bínyim, bí mokato.

³³Dekepe mokanam dai paab ajénge Joab kílang bíkke otíng-oyinlo kayaryé. Idola Dabid ke roja palenglo duuna, Dabid ke otíng-oyin teyolo RUUTUM bí agínpe utepooroem ruulíkyé.”

³⁴Delo Jehoida ke oo Benaiah bí gíla Joab me mokala, yépol mooruk amonglo bíkke agí ekumlo bím yuto.

³⁵Depe irongem rojade Joab ke ayanpe Benaiah me maglínglok ruutumpe imola delokke miri Abiathar ke ayanpe Jadok me miripe ilíkto.

³⁶Dekepe irodem rojade Shimei me poto, “Jirusalem so aala ekum molíkla duulangka, delokke doolung sokke luyulo gílen mapeka.

³⁷No doolung sok gílenla Kidron roojik kékonlo gínamko kamílo nom mokayé, delokke nokke sinam ajénge nok agí dumpong sulo aasuyé.”

³⁸Shimei poyansuto, “E, ngokke ruutum roja, nokke ponam si aidung. Nokke pokampe ngo iyé.” Depeila Jirusalemlo deddína longeko Shimei bí duuto.

³⁹Idola dítak angum méélamlo Shimei ke abíl annyiko Gath doolung ke roja Maaka ke oo Akhis kíng dugnyok aato. Edílo bínyi Gathlo duudung emla Shimei bí tattodí,

⁴⁰bí agíke gadolo resala Gath lokke roja Akhis kíng bík abílem matanampe ento. Bínyim bí mapaala ekumlo aabotoku.

⁴¹Shimei ke depe inam dem Solomonke tatrodem,

⁴²bíme tomala luto, “RUUTUM ke amínlok pésudola, nome Jirusalem lok gílen mapeka emla lutumtuai. No dekepe inamko kayémílo no siyé emla nome lutorto. No deme elíkla ngok ponampe iyé emla elíkmanía?

⁴³Kapeila no agíke agomem mesumape ngok lunamem ipéésukan?

⁴⁴No agíe aipakpe ngok abu Dabid me nok aimape inam kídíem kényin sudung. RUUTUM bí deke legape nok teyolo edo rayéku.

⁴⁵Idola RUUTUM bí ngome delokke Dabid ke yétaem edíímope utepooroem ruulíkyé.”

⁴⁶Delo rojade Benaiah me lulígla, bí gíla Shimei me mokato. Dekepe irongem Solomon ke among yétade edíírupe bíkke alag aralo kakai.