Read Alladian 1 ROJA KÍDÍ 20 Bible Online

1 ROJA KÍDÍ 20 - Alladian bible

1 ROJA KÍDÍ 20

¹Siria lokke roja Ben-Hadad bí, bíkke maglíng takamem leemo geyéla bím igulna roja íying angum kolang annyi kídí delokke gurédak guré gaaridak takamem gíbola, Samari em mirolpe rola bomla mimakpe iabomto.

²Bí, Israel roja Ahab kíng kotokí melíkla agom sim lulígto, “Ben-Hadad bí sipe podung:

³‘Nokke baldín delo uun kídíde ngokke. Nokke mime kampona kídí delang ome-oo kídídeteng ngokke.’ ”

⁴Dem tatla Ahab bí, “E ngokke ruutum roja! Nokke pokampe, ngolang ngokke ato takamsi nokke,” emla poyansuto.

⁵Kotoki kídíde leko aalangkula potoku, “Ben-Hadad bí sikep podung: ‘Nokke baldín emlang uun kídíem delokke mime ome-oo kídíem ngokkíng bilangka emlamin políktone.

⁶Nyampo supakke moodípaklo ngokke migom kídíem melíkyé. Bulu nokke ekum kídíem matala ingko-ingkoem no gairupe are kanape mííbomdudí, deke takamem bulu giibomyéku.’”

⁷Dem tatla Ahab rojabí among takam delokke ruutum delokke miro kídíem kebang gogdumsula bulum popato, “Si amisi ebínko kadorupe emla matadung. Bíkke, ngome mime ome-uem delokke baldín emla uun kídíem kododem ngo atí lutum mato.”

⁸Delo miro takamde, “Bík agomem tatmapeka delokke bíkke konamem bimapeka,” emla Ahab me lutumto.

⁹Depeila bí Ben-Hadadke kotokiem poyansuto, “Ngokke ruutum rojame sipe polangka: ‘Nokke kerang konam dem ngo ibilado, idola nokke lennyinape popang kunam sim ngo ila bimayé.’ ” Delo bulu gílangkula Ben-Hadadme popabitoku.

¹⁰Delokrongem lekoda Ben-Hadadbí agom biyatoku, “Nokke doolung dem bénpakla, ngokke ami kídí alaglo doolung delokke singol-sisol loope joobom kumape imayémílo, uyu kídíe ngome moka dakyika.”

¹¹Ben-Hadadke kotokidem Ahab bí poyansuto, “Ben-Hadadme sipe polangka: ‘Miram aro komílo lukímem mimak irongem lulangka, delokke mimak imang adape lupomapeka.’ ”

¹²Ben-Hadad bíla bíkke angong kídarde buluke notkolo apong tííla duudungem, Ahab rojake poyansunam agomem tatto. Delo bí maglíng kídíeme mimak idope, leemo lendope ukum bito.

¹³Dekepe ido delo kaaluna mirikone Ahab roja kíng aala poto, “RUUTUM bí sipe podung: ‘Siria kídíke deddína maglíngem kaala pesomapeka. Silo bulume nokke alag aralo ngo ruulíkyé. RUUTUM bí ngo emla delo no kényé.’ ”

¹⁴Ahab bí ííto, “Séko mimagem ikok geboyéne?” Kaaluna miride poyansuto, “RUUTUM bí sipe podung: ‘Distik miyongke gobornor rumkílo yéna, yaamé sipaying kídíde agér dem igeboyé.’ ” Delo Ahab bí lekoda, “Sékoda maglíng aro tuurík dem igeboyén?” emla ííto. Kaalu miride, “No moko,” emla poyansuto.

¹⁵Depeila distik maglíng ruutum aralo yéna yaamé sipaying kídíem Ahab bí gogdumsuto. Bulu midum 232 amiko kato. Delok kékon delo abíd Israel kídíem laadumsuto. Takamem idumsula midum 7000 ko kato.

¹⁶Bulu longe raadang dem gílento. Dekepe iduem Ben-Hadad lang roja íying angum kolang annyide tíngír along sula buluke notko delo duudo.

¹⁷Yaamé sipaying kídarde kerayalumpe magroem rogeto. Ben-Hadadke melíknam rokang goona ami kídíde, “Samari lok maglínge lendung,” emla popatoku.

¹⁸Ben-Hadad bí bulume, “De ami kídíde ai-kampope lendumílo turdope umlangka, delokke mimakpe lendumíloteng turdope umlangka,” emla lulígto.

¹⁹Yaamé sipaying kídíde mimak idope len-gela buluk méélamlo maglíng arode píímín geto.

²⁰Bulu mipile buluke pamín sunam tabungem moka kayinto. Delo Siria ami kídíde duggela bulume Israel kídíe yagorupe monmín geto. Ben-Hadad bí gurélok, bíkke guré sipaying ayoko lekope dugnyok gela dugpí sugeto.

²¹Ahab rojabí mimakdem iyabola Siria kídíke guré gaari, guré sipaying kídí teyolo ijét aabomla Siria maglíng teyolo ikumla bulum bojérungko nyokmoto.

²²Méélamdem kaaluna miride Ahab kíng aala poto, “Nokke maglíng tobom pekuem aipakpe kaasi-kaamotoka, kapeila aapena donggup telo Siria rojabí lekoda nome mimak aabomyéku.”

²³Roja Ben-Hadad ke migom kídíde bím sipe poto, “Israel ke uyu kídarde dííte lokke uyu kídíe, depeila ngolum ikumto. Among yiibelo mimak imínsumílo ngolu arorupe bulum ikumyé.

²⁴Supak roja íying kolang angumdem maglíng ruutumpe imomape angukon migom kídílok imotokuka.

²⁵Depe irodem nokke kerangke maglíng gíbonam kísana mibamko irung lenlangkula, guré kídíem, gaari kídíemte kerangke kísa paknako irep langkula itokuka. Ngolu Israel kídíem so irumso yiibelo mimak ikupe aiyé, delo ngolu arorupe bulum ikumyé.” Dekena agom-aang delo roja Ben-Hadad bí olíkla, buluke agompe ito.

²⁶Dongguplo bí maglíngem gogdumsula, Israel em mimak ipe Aphek doolunglo dumsumoto.

²⁷Israel kídíemte gogdumsula, mimak leemoem irung sumoto, bulu gílenla opéé annyikope ila Siria maglíngem notko iríksuto. Siria maglíngde among tabungem bííbomto. Bulum lang Israel kídíem kaapesuyém, Israel kídíe améngona sobén bénbam annyi kísanakope kaato.

²⁸Kaaluna miri kone roja Ahab kíng aala poto, “RUUTUM bí sipe podung: ‘Siria ami kídíe ngome dííte lokke uyue, delokke yiibe lokkemang emla lunam legape nolang nokke ami kídíe RUUTUM bí ngo emla kangkéndope, buluke sanam yimanam maglíng teyolo nolum ikum moyé.’”

²⁹Longe kíníd kope Siria ami delang Israel kídíde migmoe kaaríksula agí-agí notkolo duuto. Longe kínídnana delo mimak irep bosula longe lotel deloi midum éjar língkoko Siria maglíngem petto.

³⁰Petngong kídíde Aphek doolupe dugang getuai, idola doolung delokke líísak etore bénla bulum midum 27,000 amiko okato. Ben-Hadadte delo dugnyok anggela ekum kolokke méélamyalumlo runyokgeto.

³¹Bíkke migom kídíde bíkkíng aala bím poto, “Israel roja kídíe ayaneke emla ngolu tatdung, kaju ngolu ankí gasorem uugílo gin-gela, dumelem dumpolo kegela gílaju. Depe imílo nome mokamape turmolangkom iyépe.”

³²Dekepe bulu embosula ankí gasorem uugílo gin-gela, delokke dumelem dumpolo gela Ahab kíng aala, “Nokke agér ibina Ben-Hadad bí simomayika emla rogudung,” emla roguto. Ahab poyansuto, “Bí supakteng turdunía? Aido! Bí ngokke bíro kísane.”

³³Ben-Hadad ke migom kídíde aina séguem kaatala duudungem Ahabke, “Bíro kísane,” emnam dem tatla bulu menape agom dem luyansula, “Nokke ponampe arope Ben-Hadad bí nokke bíro kísane,” emla manmín geto. Delo Ahab bí, “Bíme so bomato,” emla lulígto. Edílo Ben-Hadad píítodí, Ahab bí, bíkke guré-gaari delo bíme tomato.

³⁴Ben-Hadad bíme lupoto, “Ngokke abue nok abulok edítko doolungem laatodí dem takam ngo nom bilatsuyéku. Ngok abue Samarilo kape kísa itodí, dekepe no Damaskas lo pesi-koret ipeko doolungko ireplado.” Ahab bí dem tatla, “Sok tolík bosunam agom sok imílo nome ngo melík ladoku,” emla bíkkíng bonying ibosula bím gímotoku.

³⁵RUUTUM ke lulíglok kaaluna miri kídar aralokke akone, miri akonem ekurang bomnamlok demdope poto. Idola akonde deme tatmato.

³⁶Delo bí agom tatmanadem luto, “RUUTUM ke lulígem no tatmape ikolok, no ngokkíng gílen rongkuem myomure nome rekkayé.” Arope edílo de amide gílentokudí myomurko aala bíme rekkato.

³⁷De kaaluna miri pakde akon kolo aala, “Ngome demtoi,” emla lukolok amide tolpe demla tarí moketto.

³⁸Delo kaaluna amide tarídem egelok ngotkom sugeyéla, ami kangkén madope irugeyéla, bedanglo Ahab rojame kayayatíto.

³⁹Ahab rojake bedang delok gídungem kaaluna miride bím tomla poto, “E ngok ruutum, ngom mimak imínsula idungem sipaying kone umnam miru koneme aabola ngome poto, ‘Sim ami sim kaabom langka. No bím dugnyok mokumílo bík ayanpe nok yénamem laayé, demangkom nokdi abal éjar angumko ajéngem dorpe aido.’

⁴⁰Idola ngo abíd agér kolo ingesudungem de amide dugnyok kaku.” Dem tatla Ahab roja bí luto, “Nokke nappang agomde nom agísuem lukasukai.”

⁴¹Delopak amide migmo ngotkap sunamdem taabínsuto. Depe irodem kaaluna miri akone emla Ahab bí kangkénto.

⁴²Delo kaaluna miride Ahab rojame luto, “RUUTUM bí sikepe podung: ‘Ngokke mokadope lulígnam amidem no dugpí sudokupe melígnam legape, delok ayanpe nok yénamem doryan bipe aiyé. Bíkke maglíngem ipítsudope imonam legang ayanpe nokke maglíngem nyokyin moyéku.’ ”

⁴³Dem tatla roja Ahab bí aapí-aange aklíng-silínge ila míídírla Samaripe entoku.