Read Alladian 1 ROJA KÍDÍ 21 Bible Online

1 ROJA KÍDÍ 21 - Alladian bible

1 ROJA KÍDÍ 21

¹Jejreel doolunglo, Ahab rojake ekum anínlo Naboth emnam ami lokke onggur aríkko katuai.

²Longe konem Nabothme Ahab bí tomla poto, “Nokke aríksi ngokke ekum anínso kanam legape nom ngo roguko idung, no ma emmape nokke arík sim ngome bitola. Ngo among sim oying ríkséngpe idope míídung. No tolíkmílo aiyana aríkko sokke ayanpe bisuyé, demangkom aipe areme bila ngo reyé.”

³Dem tatla Naboth bí, “Si arík si ngok buku kídí lokkai ibomname. Bulu kelok ngo ibomdope paatung. Iname RUUTUM bí ngom ayang dakyika, ngokke buku kídíke among sim ngo nome bilamayé.”

⁴Naboth ke agom-aang delok aklíng-buulíngla Ahab bí ekumpe aatoku. Bí kyare delo ketlangkula suppilo migmue ila atí doma-tíímape ito.

⁵Bíkke depe inamem kaala bíkke mime Jejebel bí bíme, “Kape no adírdun? Kape no doyi-tííyimape idun?” emla ííto.

⁶Ahab bí Jejebelme poyansuto, “Naboth ke agomde ngome díkkai. Ngo bíkke onggur aríkdem repe emtuai, demangkom delok ayanpe ako biyanyé emlateng potuai. Idola bí ngome tolík sényimato.”

⁷Jejebel bím luto, “Israel lokke roje no. Sikepía nok ségue idune? No kyare delok darep tokula, delokke aapíe ashéng tokula. Ngo Nabothke aríkdem nome laabiyé.”

⁸Delo bí shitieke ayoko atla, Ahabke siilem tuplíkla, dekedem mite-migom kídí lolang Jejreel lokke miro kídílo oorgoto.

⁹Shiti delo sipe atto: “Doma-tíímape longeko nyolangka. Delo takam amiem gogdumsula, kebang delo Naboth me gai-gakong runa duupomlo duumola ilangka.

¹⁰Delo bíírík-hamgomana ami annyiko matala bínyime kebang keradelo, Shédí melang rojeme béénam legape Nabothme lukaa-lulé molangka. Depe irodem bím doolung luyulo gílenbola dabulok gepet motoka.”

¹¹Jejreel lokke miro kídí delang mite-migom kídíde Jejebelke lulígnampe agérem ibito.

¹²Bulu doma-tíímape nyola longeko duudope gogying gogla, ami kídíeme kebanglo tomdumsula, Naboth me gai-gakongna dungkolo duumoto.

¹³Delo kebang kerang delo daadi tabunge tatdupe bíírík-hamgomana ami annyide Shédí melang rojeme béénam legape Naboth ke teyolo lukaa-luyéla lumoto. Depe lumo geyéla Naboth me doolung luyulo gíbola dabulok gepetto.

¹⁴Depe irongem, “Naboth bí sikai,” emla agomem Jejebel kíng polík toku.

¹⁵Jejebel bí kobor dem paarodem menape Ahab kíng gíla poto, “Naboth bí sikai. Nome remomape biramnam arík deme no laato langka.”

¹⁶Delo menang asak Ahab bí gíla arík deme laato.

¹⁷Delo Tishbe lokke kaaluna miri Elijah me RUUTUM bí lulígto,

¹⁸“No Samarilo duuna Israel roja Ahab kíng menape gílangka. Bí Naboth ke arígem supak laape emla aadung.

¹⁹RUUTUM bí nom ludung emla bíme polangka. ‘Tani dem petpala bíkke ekurang teyoloteng alage mengadunía?’ Ngokke sim agom sim bíme lubilangka: ‘Ingkona moolop lo ekiie Naboth ke iyyiem yaktodí, delopak nokke iyyiemkom ekiie yakyéku.’ ”

²⁰Edílo Ahab bí Elijah me kaatodí, delo bí bíme luto, “Ngok miru no, ngome paaríksuto ai?” “E, nom ngo paato,” emla Elijah bí poyansudola poto,

²¹“RUUTUM ke kangkolo no atímana agér tetelo itídung. Dekepeila, RUUTUM bí nome sipe podung, ‘Nok teyolo ngo situ-dorpong kupenamem ruulíkyé. Ngo nome nyokmola nokke erang takam aralok edítko milokonge kadudí, dem takam nyokyinmoyé. Bulu abílpe ilai ruutumpe ilai, mimík-horík loope siyinyé.

²²Nokke edung-erange Nebat ke oo, roja Jeroboam ke edung-erang kísa pelang Ahijah ke oo, roja Bashaa ke edung-erang kísape iyinyé. Kapeila no Israelem paablo itíbola ngome yagorupe aklíng mokai.’

²³Sok teyolo Jejebelke legangem RUUTUM bí sipe ludung: ‘Jejebel ke amílem bíkke doolunglo ekiie doyé.

²⁴Nonyike ali-atod kídí aralo séko bulu doolung aralo siyédí deme ekiie doyé, delokke séko bulu moonamlo sinyok yédí deme kebung-pettange doyé.’ ”

²⁵(RUUTUM ke amig kangkolo mime Jejebelke agom-aangem tatla atí sényi rumana agér mílílo itína Ahab rojake kísana ami kamato.

²⁶Israel kídíke kerang kerape RUUTUM ke monpak binam Amorit ami kídar kísa, uyu mimangem kumsula annyirunam deemayalumna paab agérem Ahab rojabí ito.)

²⁷Edílo Elijah agomem poyintodí, delo Ahab rojabí agíke egem bétsula laabín supala ankí gasorem gela pogeto. Bí donamemte lutumsula ankí gasor delo ipla, atuk migmue adírlok roggela magong geto.

²⁸Delo RUUTUM ke agome Elijah kíng pííto.

²⁹“Ngok keralo Ahab bí edítko bursula aapíe míímé sukakun? No kaadunía? Bíkke sikepe bursukunam legape, bíkke yéduso ngo adírem langaamayé. Bíkke oo kídí longelo dem dug-adír kídíem ngo laangayé.”