Read Alladian 1 ROJA KÍDÍ 22 Bible Online

1 ROJA KÍDÍ 22 - Alladian bible

1 ROJA KÍDÍ 22

¹Israel kela Siria ke pénsamlo dítak annyi kope aapí eetede kabosuto.

²Idola dítak angumnana delo Judah lokke roja Jehoshaphat bí Israel ke roja Ahab me kaape gíto.

³Ahab rojabí migom kídíem poto, “Gilead lokke Ramoth doolungem Siria roja alag aralok laalen dokupe ngolu kape atí imatone? Doolung de ngolukemin!”

⁴Delo Jehoshaphat me Ahab bí íngkísuto, “Ramoth doolungem mimak aabom kolo no ngokkíng enmín geyén?” “Aiyé, no edílo enpe emla mííyédí delo ngo enmín geyé,” emla poyan sudola poto, “Ngokke sipaying kídíelang guré maglíng kídíete enmín geyé.

⁵Idola kerayalumpe RUUTUM me íngkísulajun.”

⁶Delo Ahab bí kaaluna miri kídíem tomdumsuto. Bulu midum língko appiko ido. Bulume bí ííto, “Ngo Gileadke Ramoth doolungem mimakpe aabom míloya, ma aama míloya?” “Mimakpe aabom langka,” emla bulu takame podola poto, “RUUTUM bí ikumdope nome ruulíkyé.”

⁷Idola Jehoshaphat íngkíto, “RUUTUM kíng luposudope miri konko kamanía?”

⁸Ahab pobito, “Ako kadung. Bí Imlah ke oo Mikaiah. Idola bím ngo kangkidung, kapeila bí agínpe ngokke atímang legang kodada bí kaalu agomlo lutídung. Bí edílokom aina agom lukímang.” “No depe emmapela,” emla Jehoshaphat Ahab me luto.

⁹Delo Ahab bí kebang migomem lulígla Mikaiah me menape tommoto.

¹⁰Roja annyide, Samari lokke doolung yabgo eyab luyuke ali-aam kétpom delo roja ege-galugem gela roja paleng tere delo duubo sula duuto. Bínyike keralo kaaluna miri takamde kaalu agomem lula ito.

¹¹Buluke arang lokke akonde, Khenaanah ke oo Jedekiah bí aremlok arengpe ila Ahab me poto, “RUUTUM bí sipe podung, ‘Sikesoge no Siria ami kídíem mimak imínsula apíírupe ikumyé.’”

¹²Bíkke akampe kaaluna miri tabungde, “Ramoth doolung dem mimak iyangtoka, no ikumyé, kapeila RUUTUM bí nome ikumdope ruuyé,” emla tolíkmínla kaalu agomem poyinto.

¹³Depe iduem, Mikaiahme kaarík supe gína migomde Mikaiah me kaaríksula poto, “Kaaluna miri tabungem roje ikumyé emla man-yindung. Dekepe tatbang dope pomílo aiyépe.”

¹⁴Idola Mikaiah poyansuto, “Turna RUUTUM ke amínem míndola ngo podung, bí ingkuem podope emyédí dem petom ngo poyé.”

¹⁵Edílo Mikaiah bí Ahab rojake keradelo píítodí, Ahab bíme íngkíto, “Roja Jehoshaphat ngonyi Gilead lokke Ramoth doolungem mimakpe aabom mílodí, ma aabom mape imílodí?” “Mimak iyatoka, no ikumyé. RUUTUM bí no ikumdope ruulíkyé.”

¹⁶Idola Ahab bím poyansuto, “Edílo no RUUTUM ke amínlok ngome luposuyédí, aroem polangka. Edítko nome ngo sikepe potípe aiyén?”

¹⁷Delo Mikaiah bí poyansuto, “Kaabomna kamana mér kísa díítum kídílo Israel maglínge dukpit-dukyit sugodope ngo kaadung, delokke RUUTUM bí podung, ‘Sim ami kídísim yébona kamang iname bulume ekumlo enpan sumolangkuka.’ ”

¹⁸Dem tatla Jehoshaphat me Ahab bí popato, “Nom ngo pomanía? Si ami si agínpe ngok atímang legang tetengem potíyé. Bí edílokom ngom aina legang pokímang.”

¹⁹Mikaiah bí podan tete dola poto, “RUUTUM bí ingko kodí podune dem tattola! Ngo teyong among telo RUUTUM me bíkke agí roja palenglo duudope, delokke bíkke abelo teyong kotoki kídíem dagdupe kaato.

²⁰Bulume RUUTUM bí íngkído, ‘Ramoth doolunglo moka kosudope Ahab me séko yatyéne?’ Delo teyong kotoki ayokone atíkonpe delokke ayokone atíkonpe lubosukai.

²¹Méélam yalum delo aidkone RUUTUM ke keralo dagala poto, ‘Ngo Ahab me yatyé.’

²²Delo, ‘kape kísa,’ emla RUUTUM bí ííto. Delo aidde, ‘Ngo gíla Ahab ke kaaluna miri kídíem menam agom lumoyé,’ emla poyansuto. Dem tatla RUUTUM bí, ‘No gíla bíme yatlangka. Dem agér dem no kényé,’ emla bíme lulígto.”

²³Delo Mikaiah bí poyindola poto, “Si sikepe moko. RUUTUM bí nokke kaaluna miri kídar sim nome yatmotung. Idola bí agísue nokke tong-aryang penamem lubitung.”

²⁴Delo kaaluna miri Jedekiah bí Mikaiah kíng aníndola bíme mikmolok pidola luto, “RUUTUM ke aide ngokkelok gíla edíloda nokkíng agom potone?”

²⁵“Edílodí no ekum pírtek aralo runyok gepe emla gíyédí, delo no kényé,” emla Mikaiah bí poyansuto.

²⁶Delo Ahab rojabí, bíkke migom koneme lulígto, “No Mikaiah me umla doolung lokke gobornor Amon kíla roja oo Joashke keralo gíbo langkula,

²⁷bulume pateklo bíme tumlíkmola, burna ettíng lokla asi lok bila, ngokke aipe angkuma tetelope memolangka.”

²⁸“No aipe aayékumílo,” emla Mikaiah bí lulen dola poto, “RUUTUM bí ngokkíng agom pomang,” depe emdola bí potemtoku. “Nolu mipil-miyongpe ngok agom kídar sim airupe míngíng bomlangka.”

²⁹Dekepe irodelo Israel lokke roja Ahab lang Judah lokke roja Jehoshaphat bínyi Gilead lokke Ramoth doolungem mimak iyabompe ento.

³⁰Bedang delo Ahab bí Jehoshaphat me poto, “Ngonyi mimak iyéme, ngo angukon leemo irusula iyé. Idola nodan nokke roja leemoem gelangka.” Depe bínyi embosula Ahab rojabí angukon leemo iru sula mimak delo gíto.

³¹Siria lokke rojade bíkke midum íying angum kolang midum annyi maglíng ruutum kídídem, “Abídem mimak aabom mape Israel ke roja petomem aabom langka,” emla ukum líkto.

³²Depeila edílo bulu roja Jehoshaphat me kaatodí, bulu bíme Israel ke roje emla kaamemla bulu takam bíme mimak igobomto. Edílo Jehoshaphat ulo gogtodí,

³³delo bí Israel rojamang emla kénlangkula, bulu mimak inamdem mepoto.

³⁴Idola Siria sipaying kone yogmolok, roja Ahab me mimak galuk abe pénsam pak kolok aapto. Delo bí, “Ngo tarí gekai,” emla bíkke guré gaari dukbonadem pola, “Duglat sutoku, menape mimak ikosok duglen langkupe,” emla lulígto.

³⁵Mimak delokke idu tetedelo roja Ahab bí guré gaari delo, Siria maglíng kídíem migmo gekasula, tapdasula dagtíto. Bíkke tarí delok iyyie biilenla gaari rumkíng delo biidumsuto. Yumedan deme bí sikai.

³⁶Doonyi uang ayír delo, “Mipil-miyongpe agí-agí among sulo, delokke doolung sulo enlangkuka,” emla Israel maglíng arang delo gogyingem gogto.

³⁷Sikepe Ahab roja bí sikai. Bík simangem Samarilo bomlangkula yusitoku.

³⁸RUUTUM ke agom ludu pakpe bíkke guré gaaridem notii mime ursu supom Samarike asi paatanglo arbínla, delo ekiie iyyiem yakto.

³⁹Ahab rojake legí-sigang tabungem, delokke bíkke ekumem sita areng lok kampope replíknam kídíem, delokke bíkke doolung ilennam tabungem, Israel roja kídíke dooying kitablo atkumtung.

⁴⁰Bíkke siro delo, bíkke oo Ahajiah bí bíme rojape yétítto.

⁴¹Israel lokke roja Ahabke dítak appi nanape roja ido delo, Asa ke oo Jehoshaphat bí Judah lokke rojape ito.

⁴²Bíkke roja ilen delo bíkke dítage takying angum kolang tagngoko ito. Bí Jirusalemlo takying annyi kolang tagngoko rojape ito. Shilhi ke ome Ajubah bí bíkke ane.

⁴³Bíkke abu Asa kísape, bíte RUUTUM ke amig keralo kaabape yéto. Idola mibo ami uyu kumpom kídíem bénpak mato, depeila ami kídíe deke delo nampona aríkanaem romgo líkla ipak ila itíto.

⁴⁴Jehoshaphat bí Israel rojeme aapí eetetpe yébo sudope bonying ibosuto.

⁴⁵Jehoshaphat ke agér inam-hanam tabungem, bíkke miram agér inam kídíem, bíkke mimak inam kídíem Judah lokke roja kídíke dooying kitablo atkumtung.

⁴⁶Bíkke abu Asake longe delokke uyu kumpom ekum kídílo milokong, delokke mime notiipe ina kídíem bí ipak pakyintoku.

⁴⁷Delo longe delo Edom amongde roja kamato. Iname Judah lokke rojake ullíknam gobonor amie among dem yébomto.

⁴⁸Roja Jehoshaphat bí asi jajiem píla Ophir amonglok uunem matadope yutgomoto. Idola dekede Ejion Geber lo dírmíksula siyénglo yutgomato.

⁴⁹Israel lokke roja Ahajiah bí Jehoshaphat ke amilo lekope yutgo bosudope agí amiem bisutuai. Idola roja Jehoshaphat bí deme tomato.

⁵⁰Moodíe píírodem Jehoshaphat sila, bík simangem Dabid ke doolung lokke roja agolo yuto. Bík sirodem bíkke oo Jehoram bí bíme rojape yétít bomkai.

⁵¹Judah lokke roja Jehoshaphat ke rojape takying kolang dítak kínídko ido delo Ahab ke oo Ahajiah bí Israel ke rojape ito. Bí Samari lo taknyiko rojape ito.

⁵²Israelem paablo ibona roja Jeroboam ke kísapelang, bíkke ane Jejebel keelang bíkke abu Ahab ke atírumana bedanglok bíte gímín gela RUUTUM ke kangkolo aimana agérem ito.

⁵³Bí Baal uyume kumsula, agér ibila, bíkke abu ikam pakpe ila RUUTUM me yagorupe marmoto.