Read Alladian 1 ROJA KÍDÍ 3 Bible Online

1 ROJA KÍDÍ 3 - Alladian bible

1 ROJA KÍDÍ 3

¹Ijipt lokke roja Pharaoh kelo bí bonyingko ibosula bík omeme mimepe laato. Mimedem laasala, Jirusalemem líídung etorpe kumgongma tetelope, delokke Kumkeng Ekumem moyinma tete deloope, delokke bíkke roja ekumem moyinmang tete deloope, bíme Dabid ke doolung luune delo mepooto.

²Delo longe kídí delo RUUTUM ke amín legape Kumkeng Ekumko kamanam legape ami kídíe rego miyong kumpom lokke runggu kídílo ipak ila ipoto.

³Solomon bí RUUTUM me ayato, delokke bíkke abu Dabid ke luyilnampe yéto, idokom abíd kumpom kídílo ipak igola nampona atoem romgolateng bí ito.

⁴Moodí koneme Gibeonlo, kumpom tabungem pemílo amín kayayalumna kumpom delo Solomon bí ipak ipe gíto. Amín kana runggu delo Solomon bí éjar romnam aman ipagem ilíkdungai.

⁵Delo yoh delo, RUUTUM bí immalo Solomon me lengkan sudola bíme íngkíto, “Ngo nom bidope, no íngko atoko míídon, dem kolangka.”

⁶Solomon bí poyansuto, “Nome agér ibina, ngokke abu Dabid ke teyolo no botterupe ayangem lengkanto. Kapeila bí deenampe yéla, aapí-aange jonla nome míngkesula, bíkke roja palenglo siloke longe soope duudope no oo ko bíkkíng ruulenla itung.

⁷Supak, E RUUTUM ngok Shédí, ngokke abu Dabidke ayanpe roja dodope nokke agér ibina ngome no rusutung. Idola ngo supak koo améng aloodung delokke among yétasim yégebope ngo ikénsumadung.

⁸Supak sankén geyimape bojéruna delokke botteruna, nokke ullen sunam ami kídí araso ngo kadung.

⁹Depeila nokke ami kídar sim ngo yébodope no ngome kénnam gyanem bilangka, delokke ainemlang atímanem kaapan-kénpan sumodakyika. Demamílo siddína nokke ami sim ngo kape kísa yébolayén?”

¹⁰Solomon ke sikepe rogunam legape RUUTUM bí airupe míngkai.

¹¹Depeila Shédí bí bím poto, “No bojéko turdope demangkom nokke mirem legape demangkom nokke miru kídíke sinam-nyoknam legape rogumape deke delok ayanpe aipe ami kídíem yébodope kénnam gyanem rogunam legape,

¹²nokke konam sim ngo biyé. Nokke kísana amie kerang yétonam loteng delokke méélam yépenam loteng yékí-ikímanam, kénkímanam kénnam gyanem nokkíng ngo bojérupe kadope ruulíkyé.

¹³Delok teyong delo nokke rogumanam: mirem emlang yidnamem, abíd roja kídílo ruupe sukanmadope, no bojérupe paadope nokkíng ngo ruulíkbiyé.

¹⁴Nokke abu Dabid ke inam kísa no ngokke agom-aangem tatla, ngokke lulígnamem tatla, ngokke bedanglok gíla, ayon kídíem igeyémílo nom ngo deddína yénam longem yédope biyé.”

¹⁵Solomon bí darngo sulangkula Shédí bí bíme immalo luposuto emla kénsuto. Depe irodem bí Jirusalempe enlat sulangkula RUUTUM ke Daapong Sonduk keralo dagala romnam aman emlang aapí eetet aman ipagem ito. Depe irodem bíkke rumkílo yémín gena migom-mite tabungem domanko doboto.

¹⁶Longe konem notii annyikone aala Solomon rojake keralo dagato.

¹⁷Bínyike akone pokai, “E ruutum, si mimekon sila ngo ekum atello duubosudung. Ekum delo bíkke duudungem ngo oo ko oto.

¹⁸Ngokke oo dem orong loonyi méélam delo si mime site oo ko oto. Dekepe ido delo ekum delo ngonyike kékon sékoteng kamato.

¹⁹Yoh ko bí, ansumape imempe bík oo teyong delo ketjémsula koo dem ketpetsuto.

²⁰Depe irong delo, yoh raajang delo ngokke keralok ngok koo dem bí bosiito. Bí depe ipala bíkke sina oo deme ngok keralo bolík geyéla, ngokke turna oo deme bík keralo ketbotoku.

²¹Roh deme ngo koo deme anyun sunpe emla darepdo delo koo deme sidope ngo kaato, ngo aipakpe kangítoname sina koo de ngokkemang.”

²²Idola mime akonde, “Ma, turna koo si ngokke min, delokke sina demin nokke,” emla pokai. Delo kerangke mimede poyansuto, “Ma, sina koo demin nokke, delokke turna koo si ngokke min.” Dekepe bínyi roja kerang delo lumínsuto.

²³Delo roja Solomon bí kebangem lubito, “Si mime si, ‘Turna si ngokke ue delokke sina si nokke,’ emdung. Akonete, ‘Nok ue sikai, ngokke min turdune,’ emla ludung.”

²⁴Depe popala rojade, “Ngome yoksako laabi,” emla lulígla yoksako roja dem bomabito.

²⁵Delo rojade poto, “Turna koo sime tarong annyikope tekpan sugeyéla arotkonem akonem, delokke arotkonem akonem bilangka.”

²⁶Delo turna oo delokke ane arode oo teyonglo yagorupe ayala roja deme, “E ngok ruutum, aiyé turna koo sime bíme bilangka! Koo sim moka mapeka!” emla roguto. Idola akonde, “Nokom koo sime paape aimang, delokke ngokom paape aimang. Tarong annyikope ipansupe aido!” emla poto.

²⁷Delo Solomon roja bí bíkke kebang agomem lubito: “Koo dem paka mapeka. Kerangke mime sim bilangka. Bí koo sokke ane aroe.”

²⁸Dekepe Solomon rojake kebang lunamem Israel tabunge tatyin rodem bulu bík teyolo airupe mínggekai. Kapeila deepít binam pénsam kebangem lujidope Shédíke kénnam gyane bíkkíng kadung emla takame kangkénkai.