Read Alladian 1 ROJA KÍDÍ 4 Bible Online

1 ROJA KÍDÍ 4 - Alladian bible

1 ROJA KÍDÍ 4

¹Solomon rojabí Israel tabungke teyolo rojape ito.

²Sikesi bíkke bottena migom kídíe: Jadok ke oo Ajariah bí miri írnepe ito.

³Shisha ke oo annyi: Elihoreph la Ahijah bínyi kebang ekumlok atgebonape ito. Ahilud ke oo Jehoshaphat bí legang atkumnape ito.

⁴Jehoiada ke oo Benaiah bí maglíng tabungke ruutum yalumpe ito. Jadok la Abiathar bínyi miripe ito.

⁵Nathan ke oo Ajariah bí distik gobornor kídí ke ruutum yalumpe ito. Nathan ke oo miri Jabud bí rojeme luyil-poyil bosunape ito.

⁶Ahishar bí roja ekumlo agér ina kídíke ruutumpe ito. Abda ke oo Adoniram bí abíl kídíke ruutumpe ito.

⁷Solomon bí Israel aralo midum íying kolang annyiko distik kídíke gobornorpe ullíkto. De migom kídíde mipil-miyongpe roja kela bíkke ekumlo duuna takamem, dítak aralo poolo-poolope orpansula donam-tíínamem ngiibi-rebbito.

⁸Rumkíso atnam kídísi buluke amín kídíelang buluke yébomnam distik amín kídíe: Adi among Ephraim lokke Benhur bí.

⁹Makaj, Shaalbim, Beth Shemesh, Elon delokke Beth Hanan doolung kídí lokke Bendeker bí.

¹⁰Arubboth, Sokoh delokke Hepher lokke deego-yiilong kídí takam ke doolung kídí lokke Benhesed bí.

¹¹Dor among tabung lokke, Solomon ke ome Taphath me mimepe bomna Benabinadab bí.

¹²Taanakh, Megiddo delokke Beth Shan ke dei-degong among kídíke doolung kídí, Jarethan doolung abe lokke kídí, Jejreel doolung ke sokkodanke Abel Meholah loope delokke Jokmeam doolung kídíke, Ahilud ke oo Baana bí.

¹³Gilead among lokke Ramoth doolung delokke Manasseh opín kíng lenna Jair opínke yébomnam Gilead lokke doolung kídí, Bashan lokke Argob amolo duuna pitol lok yapgo eyabem píla, doolungem líísak língkum lok kumgo sunam doolung luune íying akké kídíke, Bengeber bí.

¹⁴Mahanaim distik lokke Iddo ke oo Ahinadab bí.

¹⁵Naphtali among lokke, Solomon ke ome akon Basemath me mimepe bomna Ahimaaj bí.

¹⁶Asher among lokke lang Bealoth doolung lokke, Hushai ke oo Baana bí.

¹⁷Issakhar among lokke Paruah ke oo Jehoshaphat bí.

¹⁸Benjamin among lokke Ela ke oo Shimei bí.

¹⁹Bashan lokke roja Og keela Amorit ke roja Sihon ke rojape yétuako Gilead among lokke Uri ke oo Geber bí. Buluke midum íying kolang annyi teyolote botteyana gobornor ko kato.

²⁰Judah kelang Israel ami kídíe siyéng robeng lokke sulli kísa bojé alongto. Bulu dola-tííla ashéng alongto.

²¹Solomon rojabí Euphrates korong lok ila among tabungem delokke Philistain amo tabung emla sokko lokke among rísu loope rojape yébomto. Among takam delokke ami kídíe bíme kajana bila Solomonke turdung tete deloope bíkke rumkílo yéyinto.

²²Solomon rojake longe-longeke donam-tíínam lo sikesi kadungai: kampope kétnam atange éjar pilngo kilogramko, delokke dobín tíímoe éjar íying kilogramko;

²³guallo menam ngelna ruboe íyingko, neyi-neyang dotagoomonam gooru-sobénem íying annyiko, delokke sisuk, sidum, pejab, perok abíd abíd kékon loteng mérem língko ko padungai.

²⁴Solomon roja bí Euphrates korong robelo duuna Tiphsah doolung lokke ila Euphrates korongke anggodan among yéta takamem bomla anggo keralo duuna Gaja doolung loope ruutum bomto. Euphrates korongke anggodan yéta takam lokke roja kídíe Solomon ke rumkílo yéyinto. Bí bíkke yébonam among lokke dei-degong among yéta tabulo ai-kamporupe ibosula aapí eetetpe yéto.

²⁵Solomon ke turdu teteng delo Israel kela Judah lokke ami takame eetet-monetrupe yéla agí-agí onggur ríkséng emlang pik [1] esing baariem bomyinsuto.

²⁶Solomon roja bí, bíkke guré-gaari legape guré pakpome éjar íying appiko kato. Mimak inana guré kídíe éjar íying kolang jarnyiko kato.

²⁷Bíkke gobornor íying kolang annyide poolo-pooloem, roja Solomon keela bíkke roja ekumlo edítko amie kadudí, buluke dope-tíípenamem iru-saaru bito. Roja lokke míínam tabungem bulu kangge bito.

²⁸Sike petomem imape Solomon ke mimak guré kídíke lang gaari gena guré kídíke pete gobornor kídíde nesi-neyang delokke sapa-anyat kídíeme agí-agíke teyonglo panlíknampe bomabitíto.

²⁹Saplayimanam siyéng robenglo sulli kanam kísa Solomonme kénnamem, delokke míípííyimanam gyanem, Shédí bí bito.

³⁰Sanggo among lokke gyankana ami kídíemla Ijipt among lokke gyankana amiem pemílo Solomon gyan kayato.

³¹Solomon ke gyande: Ejrahit ami Ethan ke gyanem pemílo, delokke Heman, Kalkol delokke Darda emnam Maholke oo kídíke gyan kídíem pemílo gaiberok yato. Depeila bíkke amíne deddína sigong-kogolo byargooto.

³²Bí ngiitom sirung agomem éjar angumko ilento, delokke miri baarieme éjar ngatna kokai ilento.

³³Bí esing-ééng, nesi-neyangke legangem ngiitom sigla, Lebanon ke sidar esing lok ila etorlo manggoona hissop neyang loope ngiitomem siglíkto. Bí simon-sili, kebung-pettang, angkenglok eggoona, engo daadi legang ngiitom emte siggeto.

³⁴Tani among sokke roja kídíe bík kénnam gyan legangem tatyinla, dekeme tatyilsudope bulu amiemte melígla ito.