Read Alladian 1 ROJA KÍDÍ 5 Bible Online

1 ROJA KÍDÍ 5 - Alladian bible

1 ROJA KÍDÍ 5

¹Tur lokke roja Hiram bí agínpe Dabid ke angongpe idungai. Depeila edílo Solomon bí roja dokai emla tattodí delo bí Solomon kíng kotoki melíkto.

²Buluke píírongem, Solomon bí Hiram kíng sim rogu agom sim lulígto:

³“Ngokke abu Dabid ke longe delo miru ami kídíem rego mipílo midu-mimak mílípe itímín sukolok, RUUTUM ke ayalok, bíkke miru kídíem, bíkke ale rumkílo laayin aamang tete deloope, bí RUUTUM ke amínlok Kumkeng Ekumko mola mato, dem no aipe kéndung.

⁴Idola supak rego miyong loope RUUTUM ngokke Shédí bí eetet-monetpe yénamem ruulíkkai. Supak ngo miru ami kamang, depeila mimak kayé emla aapí-aange lompenam kamang.

⁵RUUTUM bí ngokke abu Dabid me sikepe togesuto, ‘Nokke méélamlo, ngokke rojape imokupenam nokke oo kone ngok legape Kumkeng Ekumem mobiyé.’ Depeila RUUTUM ngokke Shédí me kumsudope dem Kumkeng Ekumdem ngo molenpe míídung.

⁶Depeila nok amiem Lebanon lo ngok legape Sidar esingem beedope lulíg bilangka. Ngok ami kídíe bulum igulyé, delokke nokke míngkorpe nok ami kídíke longe loodum areme ngo doryé. Kapeila nokke ami kídí kísape ngok ami kídíe Sidar esingem aipe beejina kamang, dem no aipe kénsudung.”

⁷Solomon ke agomem paarongem Hiram bojérupe ashéto. Depeila bí sikepe yidgeto, “Silo RUUTUM me yidgedung, kapeila bímin botteruna opín-buang konem yébodokupe gyankana oo ko Dabid me ruubisutone.”

⁸Depeila Solomon kíng Hiram bí sim agom kídí sim melíktoku: “Nokke lulígnam agomem ngo paato. Ngo nokke lukampe Sidar esing kídí emlang Siinang siipong kídíem edítko no mííyédí, deddíko ibiyé.

⁹Lebanon lokke siyéng robeng loope siipong kídídem ngok ami kídíe, nokke kumdope luko mooloplo, suppípe pala níítok biyé. Delo ngok ami kídíe dekedem taapan surongem, nok ami kídíe dem laala bomladoku. No ngok ami kídíke donam-tíínamem kaabitoka.”

¹⁰Sikepe Hiram bí, Solomon ke aapí míínampe Sidar emlang Siinang siipongem iru-saarubito.

¹¹Solomon bí Hiram ke ami kídíke donam-tíínam legape atang lok éjar annyi ton kolang deena olib télem éjar língko appi litar ko dítak-dítagem irubila bulum bito.

¹²RUUTUM bí agíke togesunam adupe, Solomon kíng kénnam gyanem ruulíkto. Hiram kelang Solomon ke pénsamlo airupe dengom bosula bínyi bonying emte ibosuto.

¹³Roja Solomon bí Israel tabunglok midum éjar íying angumko agér idope ullento.

¹⁴Buluke teyolo kaabom dope Adoniram me ruutumpe bito. Adoniram bí dem midum éjar íying kope dada ipan sulenlangkula, opéé angumkope ipansuto. Depe ipala opéé konem Lebanonpe poolo ko melíkto, delokke poolo annyiko ekumlo duumotoku. Sikepe opéé miyongdem imoto.

¹⁵Solomon bí midum jarying píínyiko díítelo elíng gaddope delokke midum jarying kínídko joodope lulenla agér imoto.

¹⁶Bulum kaadung-kaatok dope kaayana amiem midum éjar angum kolang língko angumko Solomon bí lulento.

¹⁷Solomon rojake ukum lok bulu Kumkeng Ekum moda sukepe biisam dola bortak dope elíngem kamporupe gatlenla ito.

¹⁸Solomon kelang Hiramke mistri ami kídíelang Biblos luune lokke ami kídíe esing emla elíngem gatla Kumkeng Ekum legape iru-saaruto.