Read Alladian 1 ROJA KÍDÍ 6 Bible Online

1 ROJA KÍDÍ 6 - Alladian bible

1 ROJA KÍDÍ 6

¹Ijipt amolok Israel kídíke gílenrongku dítak língko appi kola tagying píínyiko doorongem, Solomonke dítak appi nanape roja irong lokke poolo annyinana Jib poolo lo Kumkeng Ekumem Solomon molento.

²Kumkeng Ekum arade 27 mitar ko bodonge, 9 mitar ko apee delokke 13:5 mitar ko kedone ito.

³Kumkeng Ekum delokke gíangko pírtekde 4:5 mitar ko eeríe, 9 mitar ko atage ila Kumkeng Ekum bortak delokke akamto.

⁴Kumkeng Ekum lokke líísak suppi kídí delo luyue ajokyala, arange atagyape ila kirki kadope ito.

⁵Kumkeng Ekum delokke luyu kela méélam danlokke itang etor delo 2:2 mitar kedondope pírtek angum kana líísak ekumeke molíkto.

⁶Ekum kídíke rumkíyalum pírtekde 2:2 mitar kope bortakla, raadang pírtekde 2:7 mitar kope bortakla, delokke teyong yalum pírtek de 3:1 mitar kope bortakto. Kumkeng Ekum delokke líísak etordem, teyongkem bésoryape delokke rumkíngkem bisamyape ilíkto. Depe ikolok pírtek kídíde gaang atí kamape etor delo duudasuyinto.

⁷Kumkeng Ekum delokke duudasukeng elíng kídíem gatlenko delo aipakpe kípala gatto. Depeila ekum dem molenduem martul, egíng demangkom arem atí-sirí demdud-demyud atí kamato.

⁸Líísak ekum delokke rumkíngyalum pírtekke aatage Kumkeng Ekum delokke sokko danlo kala, ebange pírtek annyinana delolang angumnana delo saanane kato.

⁹Dekepe Solomon rojabí Kumkeng Ekumem moto. Kumkeng Ekum delokke kumbangem sidar esing boronggang lokla siipang lok ito.

¹⁰Pírtek angumkana líísak ekumde 2:2 mitar kedonna miyongdem Kumkeng Ekum delokke luyulo pínam líísak etorlo modasuto, delokke dekedem sidar esing gaang lok píríksuyinto.

¹¹Solomon me RUUTUM bí poto,

¹²“No ngokke lulígnam emlang ayon takamem aipe igeyémílo, nokke abu Dabid ke teyolo íngkokodí ngo ipe emla togesutuadí, nok legape dem takam ngo iyé.

¹³Ngo ngokke Israel ami kídí aralo yémín gela nokke Kumkeng Ekum mobom duunam so ngo duuyé, delokke ngo edílote ngok ami kídíem mepakmayé.”

¹⁴Sikepe Solomon bí Kumkeng Ekumem moyinto.

¹⁵Kumkeng Ekum lokke ekum aradem bí sidar siipang lok kamporupe suppi lok ila kumbang loope pítlíkto, delokke rumkíngdem siinang esing siipanglok pulíkto.

¹⁶Kumkeng Ekum arang delokke méélam delo Deeya Yalumna Moolop dem píto. De mitar konangpe bodonakuai, delokke dem alop dem abíd pírtek kídílok sidar siipang lok among lokke kumbang loope pírkéto.

¹⁷Deeya Yalumna Moolop delokke kerang pírtek de mitar íying kolang píínyipe bodongna pírtekpe ito.

¹⁸Sidar siipang kídar dem morí-mojok líkla gíri pelang appunpe roklíkla iyinto. Kumkeng Ekum arang tabungdem sidar siipanglok iyin líkto. Depeikolok líísak elíng suppi kídíem kaapamato.

¹⁹Kumkeng Ekum delokke méélamdan delo arang pírtekko ingusuto. Delo RUUTUM ke Daapong Sonduk dem leedope ruulento.

²⁰De arang pírtek de mitar konangko apee, mitar konangko atage delokke mitar konangko kedone ito. Dem tabungdem uun lok ilum lumyinto. Runggudem sidar siipang lok iyinlíkto.

²¹Kumkeng Ekum lokke arang kídídem uun kootír lok iyinlíkla, arang pírtek aatak delote uun ikoli lok ilíkto.

²²Kumkeng Ekum delokke arang ato-siro tabungdem uun kootír lok ilík líkyinto. Deeya Yalumna Moolop delokke runggu demte uunlok ikap kapyinlíkto.

²³Olib esing lok Sérubim mimang annyiko 4:4 mitar kedon dope pípala Deeya Yalumna Moolop delo melíkto.

²⁴Kerang Sérubim delokke alap annyide 2:2 mitarpe bodongto, iname akon alap attíng lokke akon loope 4:4 mitar kope ito.

²⁵Sérubim akon demte kerang kísapakpe 4:4 mitarko idope ito. Depeila Sérubim annyide ape elang adonge akampakpe ito.

²⁶Sérubim annyi delokke kedonete 4:4 mitar kope ito.

²⁷Sérubim annyi dem, alap annyi attíng terenge tuprík sudope delokke alap annyi kone suppiem itet elen dope imopala Deeya Yalumna Moolop delo melíkto.

²⁸Bínyimte uun kootírlok pílumlíkto.

²⁹Kumkeng Ekum delokke pírtek botteyalumna demlang arangke pírtek kídíem, Sérubim noksalok, kejur esing noksalok delokke appun noksalok morí-mojok líkla ito.

³⁰Ale tupu rumkíng kídíemte uunpe píyinlíkto.

³¹Deeya Yalumna Moolop pírtek delo angko eyabem olib esing siipanglok annyi-annyipe ipumsula, teyongem kéényung gubríksuna kísa imoto.

³²Eyab kídí demte Sérubim noksalok, kejur esing noksalok, delokke appun noksalok morí-mojok líkla iyinto. Dem takam dem uun lok yolkap kapyin líkto.

³³Pírtek botteyalumna lokke eyabem olib esing lok kéényung appi kadope molíkto.

³⁴Siinang siipang lok pillanam eyab annyi koteng moto.

³⁵Demte Sérubim noksalok, kejur esing noksa lok delokke appun noksalok morí-mojok líkto. Dem takam demte uunlok kampope yolkap líkyinto.

³⁶Kumkeng Ekum pegong arang delokke kebang lupomdem, Kumkeng Ekum delokke kerang delo moto. Deme kampope nuyisunam elíng líítam lok lengum purumko pugeyéla, delok teyolo sidar gaang nunamlok purum atelko pulíkto.

³⁷Kumkeng Ekum delokke modasukeng gaang kídíem Solomon ke dítak appi nanape roja ido delo, delokke poolo annyi nana Jib poolo delo díílíkto.

³⁸Solomon rojake dítak íying kolang atelnanape roja ido delokke poolo píínyinana Bul poololo, Kumkeng Ekum dem kapekísa pakpedí míílen bomsutone, dekepakpe moyinto. Kumkeng Ekum dem mokolo Solomon bí dítak kínídko ibomsuto.