Read Alladian 1 ROJA KÍDÍ 7 Bible Online

1 ROJA KÍDÍ 7 - Alladian bible

1 ROJA KÍDÍ 7

¹Solomon bí agíke dungkeng ekumemte moto. Deme modoem dítak íying kolang angumko ibomsuto.

²Lebanon Moonamke Kumnede [2] mitar 44 ko bodonge, mitar 22 ko apee, delokke mitar 13:5 ko kedone ito. Delo sidar esing gaang kídíe orek angumko [3] kato delokke sidar esing daabe idasuyinto. Kumbang deteng sidar siipang lok ila kumsung loope ilíkto, delokke dekedem gaang kídíe tulbomto.

⁴Suppi kídí lokke arotkon elang arotkone, orek angum kope kirkie kato.

⁵Eyab kídí delang kirki kídíde arot konke orek kídíem geka suyinto.

⁶Maglíng lok ruutum dumsuko kumnede mitar 22 ko bodonge, delokke mitar 13:5 ko apee ito. Kumne delok kerang delo atagna baatumko kato, delokke gaang kídíe kala kumbang eteng kato.

⁷Roja paleng dungko pírtek dem kebang ekum emlate míndungai. Delo Solomon bí kelíng-kebangem lubidungai. Deme rumkílok ila kumbang loope sidar esing siipanglok ilíktuai.

⁸Kebang iko kumdang kékon delo Solomon bí agí dungko emte abíd ekum kísa mola duuto. Ijipt lokke Pharaoh rojake omem bí mimepe laala, mime delokke legapeteng bí abíd ekum akampe ekumem mobito.

⁹Ekum kídí takam delokke modasukeng kídí emlang ekum kídíke rumkíng duupu kídíem kamporuna elínglok repsalíkto. Lííbyang kídídem adi among elíng ilen kolo aipakpe kípala gatla arang emla luyuem korotlok kamporupe gatyisula iruto.

¹⁰Ekum kídí lokke duudasuko kídíem elíng gatpomlo bortak delokke bodongpe gatla iname. Elíng ayokon kídíde mitar angum kola arot kope bodongto, delokke ayokonde mitar appi kope bodongto.

¹¹Dekena elíng kídí teyong delo aipakpe ruubomdula améyape gatnam elíngelang sidar gaang kídíe kato.

¹²Kebang iko kumdang delang Kumkeng Ekum lokke arangke kumdang delokke Kumkeng Ekum delok aatak pírtek kídíde, gatnam elíng kumrek angum kolo sidar siipang kumrek atelpe dada ila suppie kayinto.

¹³Pitol agérlo ijingruna Huram emnam mistriko Tur doolunglo kato. Bíme Solomon rojabí tomto.

¹⁴Sikana bík abu deteng Tur doolung arang lokke pitol mistri akonpe iníai. Bík anede Naphtali opín lokke mimekuai. Huram bí kénna, iyit-sayitsuna mistrikuai. Bí pitol agér inam legí-sigang tabungem kaadu-tattokdope Solomon ke tomnamem toríksuto.

¹⁵Huram bí, mitar píínyi kedon pelang 5:3 mitar pírílpe pitol gaang annyiko píto. Deme bí Kumkeng Ekum lokke yapdang eyablo dííto.

¹⁶Pitol lok 2:2 mitar bodongpe daabe annyiko píla, deme bí gaang teyolo melíkto.

¹⁷Gaang kídí teyolo lang daabe kídí delo pitol lok ikolipe mopala kamporupe replíkto.

¹⁸Daabe kídíke abe kídí deloteng dalim noksape pitollok píla arep annyipe kamporupe replíkto.

¹⁹Daabe kídar de 1:8 mitar kedonpe ila, dekedem lili appun noksape píyinlíkto.

²⁰Dekedem ikoli moi-muape inam kídí teyong delo pegoope melíkto. Mipil daabe kídí delo adong apum annyi kope dada dalim noksape inam kídíe língko annyiko kato.

²¹Huram bí pitol gaang annyi deme Kumkeng Ekum delokke yabdang aatak delo díílíkto. Sokkodanke gaang dem Jakhin emla amínem mínlíkto, delokke línggíngdanke dem Boaj emla amínem mínlíkto.

²²Lili appun mimangpe pílíkname daabe kídí teyolo kayinto. Sikepe gaang kídíke agérem géryinto.

²³Pitol lok Huram bí asi téngkiko píto. De 2:2 mitarko eerído, 4:4 mitar apee, delokke 13:2 mitarko píríle ito.

²⁴Téngki delokke luyudan abedelo pitollok moi-muang eke orek annyi kope tengki dem píduem pítaksulíkto.

²⁵Dem téngki dem pitol lok pínam rubo íying kolang annyi mimang kídí teyolo dungkesudope ilíkto. Dekedem angum, angumpe lekope imola, mikmue luyudanpe idope ito.

²⁶Téngki delokke bisamde 75 mili mitar kope ito. Téngki delokke abede mog bati abe kísa ila lili appun tamlaatkuna ole kísa ito. Téngki delo 40,000 litar asie dungketo.

²⁷Huram bí pitol lok gulung kísana íyingko píto. Takamde 1:8 mitar bodonge, 1:8 mitar apee, delokke 1:3 mitar ko kedone ito.

²⁸Deke kídí dem neying aloosupe delokke kéényung appi kadope ito. Delok teyong delo, deke delo gaang kadope pílíkto.

²⁹Gaang pílíknam pénsamke gulung kísana amíl kídí delo, Serubim, myomur simyo, delokke rubo mimangem pílíkto. Dekena mimangem gaang kídí deloteng pílíkto. Gulung kísana delokke rumkíng teyope, mimang kídí pénsamlo morí-mojok líkla ilíkto.

³⁰Gulung kísana takamde pitol lok monam kelonge kayinto, delokke pitol lok monam kelong dakkengete kayinto. Kéényung appi delo ekung kísaneke kato. Dem ekung kísana kídíke dakkeng kídí demte pitol lok morí-mojoklíkla ito.

³¹Ekung kídí dem gakbomdope, pírílna kelong kísaneke ekung kídí teyodelo kato. Dekede gulung kísana delok 45 séntimitar kope saato, delokke 18 séntimitar kope tokto. Deke demte pegoope morí-mojok líkto.

³²Kelong kídarde 66 séntimitar kedonto. Dekede gulung kísana rumkílo kato. Kelong dakkeng dem gulung kísana delo lekope pítaksulíkto.

³³Kelong kídíke guré-gaari kelong ségupe ito, delokke kelong dakkeng suko kelong agísude, delokke abíd-abíd kelong ekurang kídíde pitolpe iyinto.

³⁴Gulung kísana kídí delokke kéényung appide gaang kayinto, delokke dekedem gulung kísana amíl delo lekope pítaksulíkto.

³⁵Gulung kísana kídíke teyong delo 22 séntimitarna pegoope ina atoeke delo lekope pítak sulíknameke kato.

³⁶Gaang kídí demlang ekung kídídem Serubim, myomur delokke kejur esing mimang lok pílíkto, delokke mimang pénsam kídíem atí-atípe morí-mojok iyinlíkto.

³⁷Sikepe gulung kísana kídídem píto. Buluke amíl-amo tabungde delokke bodong, apee, kedon takamde akampakpe iyinto.

³⁸Huram bí mipil gulung legape eerína ekung íying koteng pílento. Eerídope ekung pínam kídí delokke apee 1:8 mitar kope ito, delokke deke delo 800 litar asie aato.

³⁹Bí gulung kísana pilngo dem Kumkeng Ekum lokke sokko danlo delokke pilngokon dem línggíng danlo meto. Téngki dem bí sanggo sokko kéényung danlo leelíkto.

⁴⁰Huram bí eerína peking kídíem, egugem delokke metbu tupnana bélsa kídíemte píto. RUUTUM ke Kumkeng Ekumlo, roja Solomon ke agérem ibila ato-siro takamem iyinto. Sikesi bíkke pínam kídíe:

⁴¹Bottena pitol gaang annyiko. Gaang kídí teyong delo leedope daabe annyiko. Daabe kídílo ikoli kísape kamporupe mopala replíknam kídí.

⁴²Daabe kídíke abe kídílo arep annyipe dalim noksape língko appiko kamporupe replíknam kídí.

⁴³Gulung kísana íying delang eerína ekung íying de.

⁴⁴Téngki bottena delang téngkidem gena rubo mimang íying kola annyide.

⁴⁵Eerína peking, egug delokke metbu tupnana kídíde. Roja Solomon kepe, RUUTUM ke Kumkeng Ekum lok takam ekurang kídí sim aipakpe títkutnam pitol adínlok píyinto.

⁴⁶Sim takam sim Jarethan kelang Sukkot ke pénsam, Jordan korong yiibelo yolla roja Solomon bí píyinmoto.

⁴⁷Sike tabung sokke tebegem roja Solomon bí bekkímato, kapeila sanam alooyimala pitol kídí sokke tebegem kíkímape meyamto.

⁴⁸RUUTUM ke Kumkeng Ekum delokke legape Solomon bí uun ekurang emte pímoto. Dekede: uun runggude, RUUTUM kíng tosaknam ettíngem mekeng tébulde,

⁴⁹Deeya Yalumna Moolop kerang delo menam sérak nyotkeng íying kídíde. Dekede pilngoe línggíng danlo delokke pilngoe sokkodanlo kato. Appun kídíde, sérak kídí delokke lukung bodongna kídíde.

⁵⁰Delokrongem bati kídíde, lotsép kídíde, iyyi kuujénana ekung kídíde, arí nampona mekeng, írna mekolem joonana, delokke Deeya Yalumna Moolop delo angko eyab keelang Kumkeng Ekum lokke aatak luyu eyab kídíke kobja kídíde. Sim takam uun kootír lok píyinto.

⁵¹Edílo Kumkeng Ekum lokke ato-siro tabungem roja Solomon bí píyin todí, delo bíkke abu Dabidke RUUTUM kíng tosaklíknam uun, baldín delokke abíd-abíd ekurang kídíem laalenla Kumkeng Ekum lokke kumsunglo mesiitoku.