Read Alladian 1 ROJA KÍDÍ 8 Bible Online

1 ROJA KÍDÍ 8 - Alladian bible

1 ROJA KÍDÍ 8

¹Delo RUUTUM ke Daapong Sondugem, Dabid ke doolung Jayonlok langa langkula Kumkeng Ekumlo medope Solomon rojabí Israelke miro kídí takamem, opín-miyong daadike ruutum kídí tabungem, pínmík kídíke gaku-gaam daadiem gogdumsuto.

²Bulu takam, dítak lokke poolo kínídna Ethanim poolo lokke Ippo Adeng-apelo Jirusalemlo píídumsuyinto.

³Edílo ruutum tabunge píídum suyintodí, delo miri kídíe Daapong Sonduk dem joorepla,

⁴Kumkeng Ekumlo joongato. Delo Lebi kídíelang abíd miri kídíde RUUTUM ke Tombu demteng, delokke Tombu aralo duuna ato-siro takamem Kumkeng Ekum delo giyin aato.

⁵Depe irodem roja Solomon lang Israel ke ruutum tabungde Daapong Sonduk keralo dumsudola sanamyimanam mér emla gooruem ipakpe líkto.

⁶Dekepe irodem miri kídarde Daapong Sonduk dem joola Kumkeng Ekum arang delokke Deeya Yalumna Moolop delo joolíkto.

⁷Joongala Serubim mimang annyi delokke alap yamtarna kídíde Daapong Sonduk demla, Sondukdem joonana daajong kídídem pokap bomto.

⁸Daajong kídí delokke tuubuem Deeya Yalumna Moolop delo dagaane kaapatuai, idola abíd lok kaapamato. Daajong kídíde silo peteng delo kadung.

⁹Ijipt amonglok gílenrongkuem Sinai díítumlo RUUTUMke Israel amilo Daapong ibosudodem líítam annyilo ngiitom atlíknam dem líítam annyidem Mosike Daapong Sonduk aralo melíknam petomde Daapong Sonduk arang delo kato. Delok kékon abídyang kamato.

¹⁰Edílo miri kídíde deena moolop delok gílentokudí, delo menang asak angun-abéna doomuge Kumkeng Ekum delo bííyambomto.

¹¹RUUTUMke angun-abée Kumkeng Ekumdem bííyam bomkolok miri kídarde buluke miri agérem ikan gemato.

¹²Delo Solomon bí kumto, “E RUUTUM no taleng telo doonyiem píla melígtung; idola no kaamona doomug aralo duudope tolíksukai.

¹³Supak ngo gai-gakoruna Kumkeng Ekumko, nokke agínpe duuyar pekoko mobitung.”

¹⁴Delo, deddína Israel milu-mibamke dagduem, roja Solomon bí bulukíng migmoe geka sudolangkula Shédíke utepooroem bulukíng kolík bidola,

¹⁵bí poto, “RUUTUM Israel ke Shédíme yidgelangka; kapeila ngokke abu Dabidke keralo bíkke togesunamem bí silo mesiisukai.

¹⁶Kapeila bí sikepe emsuto, ‘Ijipt lok ngokke amiem laalendoku delokke ila, ngom kumsupeko ekumem molíkdope Israel among arang lokke ngo doolung arang kídílo, doolung atelkote tomato. Idola Dabid nome ngo ngok ami kídíem yébodope ullensuto.’

¹⁷RUUTUM Israel ke Shédí me kumkeng ekumko mobipe emla ngokke abu Dabid bí aapílo míítuai.

¹⁸Idola RUUTUM bí bím poto, ‘No ngok legape kumkeng ekumko mobipe emla míínamde mííjito.

¹⁹Idola dem no momayé; nokke ayanpe, nokke agíke oosue kumkeng ekum dem moyé.’

²⁰Supak RUUTUM bí agí agomem mesiisukai. Ngo Israel ke rojape ngok abuem yétítkaku; delokke RUUTUM Israel ke Shédíme Kumkeng Ekum emte ngo mobito.

²¹Delok teyong deloteng Ijipt amonglok ngoluke buku-neku kídíem RUUTUM ke laalendoku delo, bíkke daapong ibosunamke líítam annyiem meko Daapong Sonduk emte mesiipekoem ngo ibito.”

²²Depe porodem ami kídí tabung keralo Solomon bí gíla runggu delo dagdola alag annyie teyope leedusula

²³bí kumsuto: “E RUUTUM Israel ke Shédí, nokke kísana Shédíko, teyong among loteng delokke tani among soteng kamang. No nokke daapong inamem nok ami keralo mesiinako, delokke nokke agom-aangem apíírupe igena teyonglo no ayarunako.

²⁴Ngokke abu Dabid ke teyonglo nokke togesunam takamem mesiisula, agom gompil tabungde siloke longeso apíng alongkai.

²⁵Sike sokke teyolo, RUUTUM Israel ke Shédí nom ngo popasula supak kumdung, ‘Dabid nokke oten siirek loope aapí-aange ngome míngkesula ngokke idongem, ayonem aipakpe bomgapyémílo, Israel ke roja palenglo agínpe duuyaryé,’ emla ngokke abu Dabid ke keralo nokke togesunam emte no mesiisulangka.

²⁶Depeila supak, E RUUTUM Israelke Shédí, ngok abu Dabid ke keralo nokke pésunam agom kídí demte aromolangka.

²⁷“Idola E Shédía, tani among so no arope duulayénía? Teyong among tabungete nok legape atíímang. Depeila ngoluke Kumkeng Ekum mobinamsi nok legape atííyénía?

²⁸E RUUTUM ngok Shédí. Ngo nome agér ibine. Ngokke siloke nok keralo kumla rogunam sim tatbilangka.

²⁹Sim Kumkeng Ekum sim longe yohpe kaabomlangka. Kapeila nome kumdope emla tosaklíkko amonge si. Edí-edílodí ngo sim Kumkeng Ekum sim migmoe gekasula kumsuyéne, delo no tatbilangka.

³⁰Sim moolop sim gekasula edí-edílodí ngolang nok ami kídíe nome kumsuyéne, delo no airupe tatbila ngoluk imemem asampe mepak bilangka.

³¹“Edílo imemto emla tojét líknam amie sok Kumkeng Ekum sokke runggu keraso aala deenam-deemang eme deebínsupe pésuyédí,

³²E RUUTUM, teyong among telo no tatbila nok ami kídíem kebang lubi langka. Imemna dem ajéng ilangka, delokke imemmana dem deebín bilangka.

³³“Edílo nok ami kídíe nok ayonem igeyimape paab ila, mirue mimaklo ikumla iyédí, delo edílo bulu aapíe míímap sulangkula, so Kumkeng Ekumso, maab kuasulangkula kumaayékudí,

³⁴buluke roguem teyong among telo tatbilangka. Nok ami kídíke paabem maab bilangka, delokke buluke neku-bukuem asi among binamso bomalangkuka.

³⁵“Edílo nokke ami kídíe nome kangkidope paab ila, no pedongem omomape iyédí, delo ami kídíe imemto emla aapíe remyakla, nok keralo kapgu-rogu suyékudí, delokke sim Kumkeng Ekum sim ngébala nome kumyékudí,

³⁶delo no teyong among telo buluke kumnamem tatbilangka. Ami kídíkelang roja lokke paab imemem no asampe mepak bilangka. Ingkuedí aine, dekeme luyillangka. Dekepe irongem, E RUUTUM, nokke Israel amiem yéyar bomdope rubinam nokke among so lekoda pedongem omolangkuka.

³⁷Edílo among so dírí-kenoe kayédí, doli-talam silí-sidong kala, pamkina asare ali-ayém eredope mutbomyédí, demangkom pemír mírbame neyi-neyangem dokutyédí, demangkom miru kídíe nokke ami kídíem mimak aabomyédí, demangkom edílo ami kídílo kilii-ramlie aabomla iyédí,

³⁸delo buluke nokkíng kumla pokansunamem no tatbilangka. Edí-edílodí Israel amikone yagorupe adírla Kumkeng Ekumdan so alage yamtarla nome kumyédí,

³⁹delo no bíkke kumnamem tatbila, imemem asampe mepakbila igul langka. No petommin tanike aapí-aang mííyi-míísangem kénne. Mipil amike ségusupe no agérem gérbidakyika.

⁴⁰Sikepe no imílo, ngoluke neku-bukulo nokke asi-among rubinam so nokke ami kídar sokke duudu tetengem bulu nokke agom-aangem tatyé delokke nom pesola yéyé.

⁴¹Edílodí mibo-miying amie, mooteng amonglo duune, nokke botterupe agér inamem kaala, nokke Israel ami kídí teyolo nokke amín kanamem tatla,

⁴²so Kumkeng Ekumso nome kumaape aayédí, delokke Kumkeng Ekum danpe agí yétalo yélateng ngébala kumsuyédí,

⁴³delo buluke kumnam emteng no tatbilangka. Teyong among, nokke dungko telo no duudula, mibo amike rogunamem tatbila agérem gérbilangka. Depe ikolok Israel kídíke nome mínggenam kísa, tani amonge nome kénla, mibo-miying daadie nokke ayonem igela idope. Delo bulu takam ngokke Kumkeng Ekum mobinam si nome kumsukue emla kényé.

⁴⁴“Edílodí nokke ami kídíem miru kídí teyolo mimak momín sudope no igulla iyédí, delo ingkona amonglo bulu yédola, nok Kumkeng Ekum danpe ngébala, delokke nokke ullensunam Jirusalem doolung luunedanpe migmoe ila nok ami kídíe kumsuyédí,

⁴⁵teyong among telok no buluke kumnamem tatbila mimagem ikum molangka.

⁴⁶Edílo nok ami kídíe nome kangkidope paab iyédí, delokke midum atelkoteng paab imana kamayédí, delokke buluke dekena paab legape no marla bulum itung-irédope miru alaglo no ruulíkla; delo miru kídíde bulum abílpe kénpíng yimanam amonglo umbomlangkula iyédí,

⁴⁷delo buluke aapíe míílat sulangkula, nome kumsuyékuem no tatbi langka. E RUUTUM, buluke atírumana paab imemem ponkan sulangkula airupe nokkíng rogugugap yékuem no arorupe tatbilangkuka.

⁴⁸Edílo bulu dekena mibo amonglo aropakpe aapí míílat sulangkula ngoluke neku-buku kídíem ruubinam among sime, nokke ullensunam Jirusalem doolung luune sime, delokke ngokke monam Kumkeng Ekum sime buluke migmo kídíe gekasula nokkíng kapgu-rogu suyékudí,

⁴⁹nokke teyong ekum delok buluke kumnamem tatbila buluke paab kídíem asampe mepak bilangka, delokke buluke teyolo ayalangkuka.

⁵⁰Nok teyolo buluke mirolpe rolnamem, paab deemangem no ayala asampe mepak bidola buluke miru kídíem buluk teyolo yagope idír momape, ai-kampope ségu-siangem imolangka.

⁵¹Kapeila bulu nokke agí amisue delokke eme meyope írsana Ijipt among lok nokke laalen sukuname.

⁵²“E Ralya yalumna RUUTUM, nome agér ibina ngokkelang nokke Israel ami kídíke rogunam tabung sim ayasula nok amige kaabidakyika, delokke edí-edílodí nokkíng igulem roguyédi, no tatbilangka.

⁵³Kapeila tani among sokke opín-buang daadi aralok no bulume ullensuto. Bulu nokke atekrusupe mííbomsunam amie. Sim legasim, edílo no ngoluke neku-buku kídíem Ijipt among lok laalen sutodí, delo no Mosi kíng lukan suto.”

⁵⁴RUUTUM kíng Solomonke kumnamem kumyin rodeme, bíkke lebíng kooníla alage leedusula kumko runggu kerang delok darep langkula,

⁵⁵ami kídí takam teyolo RUUTUMke utepooroe kadope yagorupe érla bí poto,

⁵⁶“RUUTUM me yidgelangka. Kapeila bíkke agí togesunampe bí agí ami teyolo aapí eetetem ruulíkkai. Bíkke agér ibina Mosi ke teyolo togesunam tabungem ai-kamporupe bí igela agom-aangem mesiisukai.

⁵⁷Ngoluke neku-buku kídí teyolo kape kísa bí yémín getodí delok kísape RUUTUM ngoluke Shédíbí ngoluke teyolokom yémín gelangka. Bí ngolum mepaksula demangkom ngolu kelok mooteng kumapeka.

⁵⁸Ingkona ayon kídíem bomgapdope ngoluke neku-bukulo lulígtodí, deke tabudem ngolu bomgapla bíkke míídupe ngolu yédope, bí ngolum agom-aang tatna amipe ruubi sudaklangka.

⁵⁹Sim ngokke siloke kumla rogunam sim RUUTUM ngoluke Shédí bí agínpe míípang suyardakyika. Loodíkítpe ngoluke míínam atoem bí kaapíbila, ngokke teyololang Israel ami teyolo agínpe bík ayange duuyardakyika.

⁶⁰Depe imílo tani among sokke opín-buang daadie RUUTUM petommin Shédíe delokke anguyang kamang emla kényinyé.

⁶¹Siloke kísape Israel ami takam nolukom RUUTUM ngoluke Shédíke ayon takamem, idong kídíem delokke lulígnam tabungem agínpe igapgela bíme míngkesula yéyarlangka.”

⁶²Depe irodem roja Solomonlang delo dumsuna ami takame ipak ila RUUTUM me yidgeto.

⁶³Solomon bí 22,000 gooru kolang 120,000 mér sobénem aapí eetet amanpe ipaklíkto. Sikepe roja delo Israel tabunge Kumkeng Ekum dem tosaklíkto.

⁶⁴Delo longe pak delo Kumkeng Ekum kerangke gíídang demte bí kumlíkto. Depe irodem bí romnam amanem, ali-ayé amanem, simon-sili kídíke una kídíem, lekobosu amanpe romlíkla ipakto. Sikesim bí gíídang delo ito, kapeila deke takam dem ipak líkdope pitol runggude améng alongto.

⁶⁵Delo Kumkeng Ekum delo, Solomonlang Israel ami tabunge longe kíníd kope Ippo Adeng-apeme ila, delokke longe kínídkon koteng nyola idumsue looying kola loopiko ilíkto. Dekena gíídí-siipe longe kídí delo Hamath Gééjong línggíng lokke ila sokkodan Ijipt lokke Wadi lok deddína amie píídumsuto.

⁶⁶Longe kékon delo bí ami kídíem enmotoku. Israel ami kídí teyololang, RUUTUM me agér ibina Dabid ke teyolo utepooro takamem ruulíknamem ami kídí tabunge kaayinla, buluke aapí-aange ashérula rojem airupe yidgela agí-agí ekumpe enpan suyintoku.