Read Alladian 1 ROJA KÍDÍ 9 Bible Online

1 ROJA KÍDÍ 9 - Alladian bible

1 ROJA KÍDÍ 9

¹Solomon rojake Kumkeng Ekumem, agí ekum kídíem, delokke abíd-abíd ekum mopenam kídíem moyinrongeme,

²Gibeonlo inam kísape RUUTUM bí lekoda lengkansula Solomon me lupoto,

³“Ngo nokke kumla rogunam kídíem tatto. Ngome kumsu ayardope nokke Kumkeng Ekum mobinam sim ngo pídéto. Agínpe ngo deme kaabom ayarla atímana ato-siroem kamomayé.

⁴Nokke abu Dabid ke kísape no aro aapí loklang jonna bedanglok ngome agér ibiyémílo, delokke ngokke ayon emlang lulígnam kídíem igeyémílo,

⁵ngokke nok abu Dabid ke teyolo, Israel kídíem agínpe bíkke oten kídíe ruutumpe yéyar bomyé, emla pélíksunam agom dem apíngmoyé.

⁶Idola nolang nokke otíng-oyine ngokkíng yémín geyimape, ngokke ayonem betla, ngokke nok teyolo lulígem tatmape ipéésula angukon uyueme kumsuyémílo,

⁷ngo Israel kídíem ngokke asi-among ruulíknam lok laabínla mibo-minnompe [4] imoyé. Ngome kumsudope Kumkeng Ekum monam simteng, ngokke pídésunam moolop simteng ngo mepakyé.

⁸Si Kumkeng Ekum siteng dírtu-díryula kumrukpe iyé. Sokke abelok gína tabungde deme kaala mamamsula míngkén yimape mííbom suyé. Bulu dekepe mííla, ‘Kapedí RUUTUM bí sikepe among simla Kumkeng Ekum sime itone?’ emla bulu íímínsuyé.

⁹Delo ami kídíde, ‘Bulu buluke buku-neku kídíem Ijipt amonglok laalenkuna RUUTUM buluke Shédíme mepak sugeyéla angukon uyu kídíem kumsu-joosula, buluke opéépe ibosukolok, sikena atung-aréé eme buluke teyolo RUUTUM bí bomatune,’ emla lubiyé.”

¹⁰Solomon bí, agíke ekum kídíemlang Kumkeng Ekum dem mokolo takying annyiko ilíkto.

¹¹Tur lokke roja Hiram bí, Solomon me sidar esing kídíemlang siinang esing kídíem irung bila, delokke agér legape Solomon ke míínampe uun kídíem bito. Agér-anam tabungem iyinrongem, Galil dei-degong among lokke doolung íying annyiko Solomon bí Hiramme amanpe bito.

¹²Hiram bí dekedem kanggola bí míímato.

¹³Depeila bí Solomon me poto, “E ngok bíroa, si doolung kídísiya nokke ngom biname!” Depeila dem among kídídem supak loope Kabul[5] emla mandung.

¹⁴Hiram bí Solomon me 4000 kilogram kokai uunem bito.

¹⁵Solomon rojabí, agí ekum kídíem, Kumkeng Ekumem, doolung língkum etorem, delokke doolung sanggo danem kédéng gelíkkolo agér ina amiem bojéko ilíkto. Dem agér ina ami kídídem, Hajor, Megiddo delokke Gejer doolung kídíemte morepnatoku.

¹⁶(Ijipt lokke roja Pharaoh bí Gejer em mimakpe iala, delo duuna Kaanan ami kídíem moka kayinpala, dem doolung dem bíkke ome, Solomon ke mimepe bomnam dem nyamran amanpe bito.

¹⁷Deme Solomon bí lekoda doolung dem ireptoku.) Bíkke agér yébonam kídíem yébola Sokko Beth-Horon emte ireptoku delokke,

¹⁸Baalath emla Judah mongku-mooruk lokke Tamar doolung kídíemte ireptoku. Solomon bí kumsung kídíemte moyin goola, guré kídíem pakkoemte, delokke guré gaari kídíemte mesing pekoem moyin goola,

¹⁹ingko-ingko kodí bí Jirusalemlo, Lebanonlo, delokke bíkke among yéta aralo ipe míítodí, deke tabungem bí iyinto.

²⁰Edílo Israel ami kídíe Kanaan amongem aabomtodí, delo ayokon Kanaan amiem bulu mokamape turmoto. Deke delokke otíng-oyin kídíem Solomon bí agér ibina amipe imoto.

²¹Deke ami kídar aralo Amorit, Hittit, Perijjit, Hibit, delokke Jebus ami kídíe kato. Buluke otíng-oyine silo melo peteng agér iyana abílpe yédung.

²²Solomon bí Israel amiem sékometeng abíl agér imomato. Bulu sipaying agérlo; sipaying ruutumpe, migompe, guré gaari ruutumpe delokke guréem dukbomnape yéyinto.

²³Solomon ke atí-atípe ekum mokolo agér ibina kídíem kaabom dope 550 amiko kaabomna migompe yéto.

²⁴Solomon ke mime, Ijipt lokke Pharaoh rojake omede Dabid ke doolunglo, Solomon ke bíme ekum mobirodeme giisala, ekum delo duungarong deme doolung delokke sanggodan deme Solomon bí kédéngpe gebííto.

²⁵RUUTUM kíng bíkke runggu píbinam delo, dítaklo lengum kope, romnam aman emlang aapí eetet kunana amanem ipak líkdungai. Sikesok teyoloteng Solomon bí nampona aríkanem RUUTUM kíng romlík bidungai. Sikepe bí, Kumkeng Ekumke agér ipenamem ipíng bidungai.

²⁶Solomon rojabí Edom amonglok Akuaba Siyéng robenglo duuna Elath doolung abe lokke Ejion Geberlo deddína asi jajiem píla maglíngem leeto.

²⁷Siyéng jaji legangem aipakpe kénna amiem Hiram rojabí agíke asi jaji ami kídílok ullenla, Solomon ke amiem yébosudope melíkto.

²⁸Bulu Ophir among loope yutgoola 14,000 kilogram ngatnako uunem bojéko Solomon me bomabitoku.