Read Alladian 2 ROJA KÍDÍ 1 Bible Online

2 ROJA KÍDÍ 1 - Alladian bible

2 ROJA KÍDÍ 1

¹Israel kídílok Ahabke sirongem Moab kídíe Israel kídíem mirolpe irep bomkai.

²Ahajiah bí Samari amonglo teyong pírtek lok ogírsutoku, delo bí delok ogír sunam delok siyédí, ma aiyékudí, dem Ekron kídíke uyu Baal-Jebub kíng kangkí-tatkí dope amieke melíkto.

³Delo Shédíke kotokide Tishbe lok ami Elijahme pokai, “No gíla Samari rojake melíknam amidem kaaríksula sikepe polangka, ‘Israelke Shédí kaimape ilangía nolu Ekron kídíke uyu Baal-Jebubme luposudope gídune?’

⁴Depeila RUUTUM bí sipe podung, ‘No berokpe siyé.’” Depe Elijah lulígnamdem pobipe emla gílenkai.

⁵Melíknam ami kídí delok enlat sukunamem rojade kaala íngkíto, “Nolu kapeda enlat sudungkune?”

⁶Bulu poyansuto, “Ngolu bedang elo amiko kaaríksune, bí ngolum sikepe podo, ‘Nolu nolum lulígna roja kelo enlat sukalangku, delokke bím polangka, RUUTUM bí sikepe podung, Israelke Shédí kaimanía? Deke legapía, no Ekron kídílok uyu Baal-Jebub kíng ami melíkdun? Delok legape no supakke ketko delok edílokom darep kumayé, no berokpe siyé.’ ”

⁷Delo rojade íngkíto, “Kape kísana amikone nolum kaaríksula dekepe podon?”

⁸Bulu poyansuto, “Amide nambí genako, delokke soyolok inam uug genako.” “Demílo de abídmang, Tishbelo duuna ami Elijah min,” emla rojade pokai.

⁹Delo rojade bíkke sipaying íying pilngo kolang képténko Elijahme kaarík sudope lulíkto. Elijahke dungko díítum ponyuk delo saala képténde Elijahme poto, “Shédíke amia! Roje nom sok oitokula emdung.”

¹⁰Elijah bí sipaying képtén dem poyansuto, “Ngo Shédíke amie mílo teyong among telok eme otokla nomla nokke sipaying íying pilngo sim gupak daklangka.” Delopak teyong telok eme otokla képtén demla bík ami kídar dem guka kayinto.

¹¹Rojade lekoda képtén kolang sipaying íying pilngoko Elijah kíng melíktoku. Képténde Elijahke dungko dííte ponyuk delo saala poto, “Shédíke amia, si rojalok ukume, ‘Menape díítum sok oitoku!’ ”

¹²Elijahbí poyansuto, “Ngo Shédíke amiemílo, teyong telok eme otokla, nomla nokke íying pilngo sipaying kídí sim guka daklangka. Delo arope teyong telok eme otokla képtén demlang bík ami kídar dem guka kayinto.”

¹³Lekoda rojade lengumnape képtén kolang sipaying íying pilngoko Elijah kíng melíktoku. Lengumnana delo képténde díítum ponyuk delo saala, Elijahke kerang delo lebíng kooníla rogudola poto, “Shédíke amia! Nok béérang kídí ngoluke turpenamem ayang bidoyika.

¹⁴Kaatola, eme teyong telok otokla kerangke so aana sipaying képtén annyi emlang bík ami kídíem guka kayinto. Supak ngokke turpenamem ayang bitoyika.”

¹⁵Delo teyong kotokide Elijahme pokai, “Bíkkíng gímín gekalangku. Bím no pesomapeka.” Delo Elijah gerepla bíkkíng gímín getoku.

¹⁶Elijah bí pííla rojadem sikepe poto, “RUUTUM bí sikepe podung, ‘Israelke Shédíe kaimanía; no nokke amíl kinam legape Ekron kídíke Baal-Jebub me luposudope kape ami melíkdun? Nok sikepe imemnam legape nokke ketkeng ippu delok no edílokom gerep yimayé. Nok sinamde berokdung.’ ”

¹⁷Delo RUUTUM ke agomem Elijah ke pokampe rojade sikai. Ahajiah bí oo kamape sinam legape, bík sirongem bík bíro Joram rojape ikai. Dekepe ido delo Judahlok roja Jehoshaphatke oo Jehoram dítak annyinape rojape idobong.

¹⁸Ahajiah rojake abíd yégang-daggangem Israel lok roja kídíke legangem atkumko kitablo atlíkmanía?