Read Alladian 2 ROJA KÍDÍ 10 Bible Online

2 ROJA KÍDÍ 10 - Alladian bible

2 ROJA KÍDÍ 10

¹Samari amonglo Ahabke otíng-oyine íying kínídko kato. Jehu bí shitiko atla Jejreellok migom botte delokke doolung miro, Ahab ke otíng-oyin kídíem duubona kídílo melíkto. Shiti delo bí sikepe atto:

²“Noluk ruutum Ahabke oo kídíem nolu kaabomdung; delokke nolukíng guré-gaarie, gurée, mimak ekurange, delokke yabgo kumgong sunam doolunge kayindunade, sim shiti sim paayém menarupe,

³noluk ruutumlok ami aroyalumna oo akonem ullenla bík abulok roja inam sim imín gedope melíklangka. Delo noluk ruutumke legape mimak maglangka.”

⁴Idola bulu bím pesola sikepe pobosuto, “Roja annyi ekai motum lamanam dem kape kísa ngolu ilayén?”

⁵Dekepeila, roja ekum dem kaabomna migom delang luune dem kaabomna migomde abíd miro kídíem dumsula, sikepe Jehume agomko melíkto, “Ngolu nokke béérange, no kape poyédí, depe ngolu iyé. Ngolu séko memkom rojape imodope tolík lamang. No nokke mííbape ilangka.”

⁶Delo Jehu annyinape shitiko atla bulum bito: “Nolu ngok magpéépe idumílo, delokke ngok ponamem tatpemílo, noluke ruutumlok oo kídí lokke dumpongem bomla ngokkíng Jejreello nyampo supak kísaem aalangka.” Roja otíng-oyin adong kídíe íying kínídko doolung delok mirope yédungai. Jehuke shitidem paarongem,

⁷miro kídíde roja odong kídí takamem tomdum supala íying kíníddem pakato. Buluke dumpong kídídem kiirolo líkpala Jejreello Jehume melík bito.

⁸Tomlíknam amide pííla Jehume poto, “Bulu roja oo kídíke dumpongem gebitung.” Delo Jehu ukumto, “Dumpong kídídem apom annyi kope doolung luyab delo rokom loope melangka.”

⁹Rokom dem Jehu gílenla, ami kídí kerang delo dagdola poto, “Nolu takam edo tarí kamang. Ngo moko agí ruutumem rungkupla petne, idola séko bulum takam petne?

¹⁰Kéntola demílo, Ahabke ekum erang legape RUUTUM ke pobinamde asam mayé. RUUTUM bí bík béérang Elijahme kape pobitodí, deke pakpe ito.”

¹¹Dekepe Jehu, Jejreello duuna Ahabke edung-erang, angong-arum, otíng-oyin, delokke bík míngkesunam migom takamem petyinto.

¹²Delo Jehu gílenla Samaripe ento. Mér Kaabomna Notko emnam among delo,

¹³bí Judahlok roja Ahajiahke edung-erangeke kaaríksula íngkíto, “Nolu séko bulu?” Bulu poyansuto, “Ngolu Ahajiahke edung-erangeke, delokke ngolu rojalok méng ome-oo delokke rani ane em kaape so tokdung.”

¹⁴“Bulum turdope umtoka,” emla Jehu ukum rodem bulum turdope umpala, kobung ampeng delo midum íying appi kolang annyi dem mokalíkto. Bí mitel koteng meturmato.

¹⁵Delok bí gílangkula bím ríksupe aana Rekhabke oo Jehonadabme kaaríksuto. Delo bím yamrík dola Jehu pokai, “Ngo nom jonbo supe míínam kísa, nokom ngom jonbosupe míídunía?” “E, ngokom jonbosupe míídung,” emdo delo Jehu bí pokai, “Demílo nok alag dem kolo.” Bí delo agí alagdem bisu dodem, bí bím guré-gaarilo sosang dola,

¹⁶“Ngokkíng aatola, delokke RUUTUM kíng ngo edítko erapdun dem kangkítola,” emdola bím agí guré-gaarilok dugboto.

¹⁷Edílo Jehu bí Samarilo píílík tokudí, bí RUUTUM ke ami Elisha me políknam kísa pakpe delo duuna Ahabke edung-erang takamem petpak yinto.

¹⁸Delo Jehu ami takamem laadum supala poto, “Ahab bí Baalme anyong petomko agér gérbito, idola Jehu bí bojéko agérem gérbiyé.

¹⁹Supak Baalke kaaluna kídídem, bím kumsuna kídídem, delokke miri kídídem tomtoka. Mitel koteng mepitmape tomlangka, kapeila ngo Baalke legape botterupe soboko pabipe míídung. Séko so aamape iyédí bí turmayé.” Idola Jehu bí Baalke miri kídíem petyinpe emla bulum rukupla tomdumsuto.

²⁰Jehu poto, “Baalke amínlok duusumko gogdum sutoka.” Delo bulu Jehuke ponamdem takamdem pogoto.

²¹Bí Israel ami takamlo pogong monam legape Baalke miri takame aayinto. Bulu Baalke kumsu supom ekumlo bíísétpe aadum suto.

²²Jehu bí kumsu supom ege-galuk biyana dem poto, “Baalke miri kídí legape lukdorlok laatoka.” Depeila bí buluke legape lukdorlok laabito.

²³Delo Rekhabke oo Jehonadab lang Jehu bínyi Baalke miri kídí dem sipe poto, “Kanggong sutola, Baalke miri kídí kékonlo RUUTUM ke amiyang kamang.”

²⁴Bulu delo pabinam aman delokke romnam amanem bipe aralo aato. Kumpom ekum luyu delo midum íying píínyiko dakbom mola Jehu bí sikepe ukum líkto, “Séko keelok arangke ami kídí sim lenmo yékudín, bík ayanpe lenmokuna dem petyanyé.”

²⁵Jehu bí romnam amanem birongem ekumdem dakbomna sontori kídídem ukumto, “Gíkala supak atel koteng mepitmape petyin langka.” Depeila bulu yoksalok bulum paka kayinto. Sontori kídíe simang kídídem luyulo elpak pakyin pala, Baal kumpom ekum meromlo aato.

²⁶Bulu Baal uyu kumsu bomnam líídung dem joolenla rompakto.

²⁷Kumbomnam líídung dem benpakla Baalke kumpom ekum demteng bénpakto. Bénpaknam ekum dem silo loope ami kídíe esi-regum ikengpe idung.

²⁸Sipe Jehu Israel kídí aralo Baal uyume kumnamem itumto.

²⁹Idola Nebatke oo Jeroboam ke Israel ami kídíem ige bonam Bethel lolang Danlo gooru ruoem kumbonam paabem Jehu bí imín geto.

³⁰RUUTUM bí Jehume poto, “Ngok mííbangpe, Ahab melang bík edung-erang kídíem no ito, depeila nok otíng-oyin kídíe siirum appi loope Israelem rojape yéboyé.”

³¹Idola Jehu bí Israel lok RUUTUM ke ayonem aipe mínggap mape ito. Bí Israelem paab igebona Jeroboamke paablok míílat sukumato.

³²Delo longe kídí delo, RUUTUM bí Israel among yétaem anyong molento. Israellok among takamem Hajael ikum aabomto:

³³Jordan sanggodanlo duuna, Gilead, Gad, Reuben delokke Manasseh kídíke amongem, Arnon yiibe ampengke Aroer lok ila Gilead lokke Bashan loope.

³⁴Jehuke abíd-abíd agér inam emla yégang-daggang delokke bík miram legangem Israellok Roja kídíke Dooying Kitablo atkummanía?

³⁵Jehuke sirongem bík abuem yuko Samari amonglo bím yuto. Bík sirongem bík oo Jehoahaj bík ayanem yébomkai.

³⁶Jehu bí Israel rojape Samarilo takying annyi kolang dítak píínyiko ito.