Read Alladian 2 ROJA KÍDÍ 11 Bible Online

2 ROJA KÍDÍ 11 - Alladian bible

2 ROJA KÍDÍ 11

¹Edílo Ahajiahke ane Athaliah, bíkke oo dem petpape kaatodí, bí gílang roja edung-erang takamem petyansupe míírepkai.

²Idola roja Jehoramke ome, delokke Ahajiahke bírme Jehosheba bí Ahajiahke oo Joashme roja odong kídílok pyoonyokla rumsupto. Kapeila bím petnyokpe emla ruulenduai. Bí Joash melang bík nars dem ipko pírtek kolo mesupto. Depeila bím Athaliah bí petpe emla kaata kíramto.

³Athaliahke amongem yége bodo dítak akkédem Joash lang bík narsde Kumkeng Ekum delo duunyok geto.

⁴Dítak kínídnana delo Jehoiada bí melíkla rojem dagbomna sontori kídílok ruutum kídí, delokke roja ekumem dagbomna sipaying ruutum kídíem Kumkeng Ekum delo tomala pésumoto. Delo bí roja oo Joashme lengkanto.

⁵Delo bí bulum sipe ukum dola poto, “Nolu apéédí longelo sontori dagbomnam agérlo gíyém, angum aralok opéékone roja ekumem kaabomyé,

⁶opéékone Sur Eyabem kaabomyé, delokke opéé kone sontori dakko méélamke eyabem dakbomyé.

⁷Nolu séko bulu opéé annyi kope ila duuna longelo agér kamape ina kídíe, roja legape Kumkeng Ekumem kaabomyé.

⁸Mipile gíníng yoksa bomla rojaem gargoola daklangka. Nolu kelo aanínna amiko kayémílo petpak langka. Rojae ingkolo gíyédín, nolu bíkkíng mégíng-mésok yétímín langka.”

⁹Sipaying ruutum kídíde miri Jehoiadake pokampakpe ito. Mipile agí-agí ami kídíem gíbola, apéédí longe tosaknam agérlo gípena gípemana kídíe miri Jehoiada kíng aato.

¹⁰Delo Kumkeng Ekumlo mesiinam Dabid rojake gíníng tamkung kídíem laalenla sipaying kídídem bito.

¹¹Mipile agí-agí gíníng yoksaem alaglo bomla sontori kídíde Kumkeng Ekum arangke runggu ampeng delo rojadem gaargoola dakto. Bulu Kumkeng Ekum lokke sokkodan lokke ila línggíngdan loope dakbomkai.

¹²Delo Jehoiada roja oo dem gílen bola dumlubem lublíkla, bím rojape tolíknam daapong kakotkonem bito. Delo ami kídíe rojadem tosak dola tél molto. Delokke takame yapa pilíkdola, “Roje turyar langka,” emla éérdola gogto.

¹³Edílo Athaliah sontori, delokke ami kídíke ngomdud em tattodí bí Kumkeng Ekum delo ami kídíke bamdum suko delo lomaato.

¹⁴Bí aala kaaname rojade buluke idong akampe aane gaang ampenglo dakdo. Migom kídí elang bikul tapung mutna kídíe roja ampeng-ampenglo dakdo, delokke among delok ami takame bikul tapung mutla yidgedo. Delo Athaliah bík lukdorem bétsudola, “Rukupne! Rukupne!” emla ulo gogto.

¹⁵Jehoiada bí sipaying maglíng ruutum kídídem ukumto, “Bím ekum pénsamlo laalento; delo bíkkíng gímín gena kídíem mokalangka.” Kapeila miride pokai, “Bím RUUTUM ke Kumkeng Ekum aralo petmapeka.”

¹⁶Depeila bulu bím umla guré kídíke angko roja ekum gíídang delo petto.

¹⁷Jehoiada delo RUUTUM kelang ami kídí delokke rojake pénsamlo daapongko ila, bulu RUUTUM ke amipe iyéku emla tolík sumoto. Bí roja kelang ami kídí pénsam lokom daapongko iboto.

¹⁸Takam ami kídíe Baalke kumsu supom ekumlok runggu emlang mimang kídíem bénpakla Baal uyuke kumkeng ekumlok miri Mattanme runggu delo petlíkto. Delo miri Jehoiada bí sontori kídíem RUUTUM ke Kumkeng Ekumlo melíkto.

¹⁹Delo bí sipaying ruutum kídíem, rojaem dagbomna delokke roja ekum sontori kídíem, delo takam ami kídíem gíbola rojadem Kumkeng Ekum lok gílen bola Sontori Eyablok aala roja ekum delo gílíkto. Delo rojade roja dungko palenglo dungangkai.

²⁰Delokke among delok ami takame yidgeto, delokke luunede eetetto, kapeila Athaliahme roja yoksa lok pakato.

²¹Joash ke rojape ilendo delo bí dítak kíníddo.