Read Alladian 2 ROJA KÍDÍ 12 Bible Online

2 ROJA KÍDÍ 12 - Alladian bible

2 ROJA KÍDÍ 12

¹Israel lo roja Jehuke dítak kínídduem Joash bí Judah lok rojape ito. Bí dítak íying appiko Jirusalemlo rojape ito. Bík ane amíne Jibiah, bí Beersheba lokke.

²Joash bí agér takamem RUUTUM ke kaabang dope ito. Kapeila bím dítak takamlo miri Jehoiada poyil dungai.

³Idola moomem uyu kumpom kídíem ipak manam legape ami kídíe panam aman bila, kumnam meruem nyottídungai.

⁴Joash bí miri kídídem poto, “Míísat sunam amanlok paanam abal kídíem laadumsula RUUTUM ke Kumkeng Ekumlo mekumtoka. Mipilke nyogedola binam abal, delokke agíe míísatsula bomanam abal demte Kumkeng Ekumlo mesing langka.

⁵Dem abal kídíem mipil miriem bík agér gérbinam ami delok laamola Kumkeng Ekumem isi-simo penam kayéme imolangka.”

⁶Idola Joash rojake yégong dítak íying annyi kolang tagum loope Kumkeng Ekumdem atí isi-simo mato.

⁷Depeila Joash rojabí miri Jehoiada, delokke abíd miri kídíem tomla poto, “Kape supakpe nolu Kumkeng Ekumem isi-simo kuman? Murkong laanamem nolu bomyimapeka. Idola dem murkong kídídem Kumkeng Ekumem isi-simonape bilangka.”

⁸Miri kídíde dem tolíkto, delok teyolo Kumkeng Ekum emteng agíe isi-simo sumayé emla togesuto.

⁹Delo miri Jehoiada bí abal mekeng arem sondukko laala sonduk teyongdan delok arungko píyyato. Sondukdem Kumkeng Ekum aatak lamgé lakbík danlo runggu ampelo meto. Kumkeng Ekum dagbomna amide sonduk delo kumsupe aana kídíke binam abal kídíem líkto.

¹⁰Abale bojéko ido delo rojalok atgebona delang miri írnede sankípala nyogon kolo líkto.

¹¹Murkongdem saprongem, Kumkeng Ekum isi-simo kolo kaalíkpena dem bito. Delok abal delok bulu Kumkeng Ekum isi-simona mistri kídíem binato.

¹²Delok abal delok daabu roona, delokke simét agér inem bila, esing renala, lííbyang renala, Kumkeng Ekum isi-simo legape abíd-abíd igínglo inato.

¹³Kumkeng Ekumlo bomanam murkong kídí delok baldín lok pínam togu, asi purkat nana bati, bikul delokke abíd-abíd uun demangkom baldín ekurang renamang.

¹⁴Murkong kídídem Kumkeng Ekum isi-simona ami delokke isi-imokunana ekurang kídí petomlo ilíkto.

¹⁵Bulu murkong kídí legape isap kokumang, kapeila bulu deenamrupe aapí gena amieke.

¹⁶Doryannam aman emlang imem legape binam amanem Kumkeng Ekumlo bomamato. Kapeila de murkong kídíde miri kídíke.

¹⁷Delo Sirialok roja Hajael, Gad amongem rotkam pala Jirusalemem laape emla aabomto.

¹⁸Idola Joash rojabí bík buku kídí Jehoshaphat, Jehoram, Ahajiah delokke bík agísuke RUUTUM me amanpe bikumnam uun kídíem, delokke roja ekumlo duuna uun takamem laadumsula Siria roja Hajaelme bito. Delo Hajael Jirusalemlok gílat sukaku.

¹⁹Joash rojake yégang daggangem Judahlok Roja kídíke legang atkumko kitablo allík manía?

²⁰Bíkkíng yémín gena migom kídíe rukupla Joash rojame Silla bedanglok Beth-Millo emnam amonglo petto.

²¹Bím petnyokna migom kídíde Shimeath ke oo Jojakar lang Shomer ke oo Jehojabad. Joash rojake simangem bík abu kídíem yuko Dabidke doolunglo yuto. Bík méélamlo bík oo Amajiahme rojape imoto.