Read Alladian 2 ROJA KÍDÍ 13 Bible Online

2 ROJA KÍDÍ 13 - Alladian bible

2 ROJA KÍDÍ 13

¹Judahlok roja Ahajiahke oo Joashke dítak íying annyi kolang tagumko iduem Jehuke oo Jehoahaj bí Samarilo Israel rojape ito. Bí takying kolang dítak kínídko rojape yéboto.

²Bí Nebatke oo Jeroboamke yérukpe RUUTUM ke kangkolo atímana agér ila yéto. Bí Israel takamem yémembola míílat sukumato.

³Depeila RUUTUM ke marname Israel teyolo pííla, RUUTUM bí Siria roja Hajael, delokke bík oo Ben-Hadad ke rumkílo duumoto.

⁴Delo Siria rojake rumkílo Israel opín kídíe yégípnam legape Jehoahaj bí RUUTUM kíng ayang igulem matato.

⁵RUUTUM bí laalen kupenako melíkla Israel kídíem Siria rumkínglok laalentoku. Dekepeila Israel ami kídíe kerang yékampe agí ekumlo eetetpe duusutoku.

⁶Idola bulu Jeroboamke yérukdem mepakmape yéyar bomto. Delokke Asherahke uyu mimangde Samari amonglo duudan teteto.

⁷Jehoahaj bí íying pilngo guré sipaying, guré-gaari íying, delokke éjar íying alelok gína sipaying delok kékonlo abíd maglíng kamato, kapeila abíd kídíem aam yikyém pemug gyanam kísa Siria lok rojade petyinto.

⁸Jehoahaj ke abíd-abíd agér inam kídíem roja yégang-daggang atkumko kitablo atkumtung.

⁹Jehoahaj sila, bík abuem yuko ampenglo Samarilo yuto. Delo bík oo Jehoash rojape iyankai.

¹⁰Judahlok roja Joashke takying angum kolang dítak kíníd duem Jehoahajke oo Jehoash Israel rojape Samarilo yéboto. Bí takying kolang dítak akkéko rojape yéto.

¹¹Nebatke oo Jeroboamke kísape bíkom RUUTUM ke kaabang manampe yéla edíloteng míílat sukumang. Dekepe bí Israel kídíem yémem botuai.

¹²Jehoashke roja yégong kídílo agér inam, Judahlok roja Amajiahme mimak imín sunam takamem Israel roja kídíke yégang-daggang atkum kolo atkum manía?

¹³Jehoashke sido delo bík simangem Samari amonglo roja yupomlo yuto. Bík ayanpe bík oo Jeroboam II rojape iyanto.

¹⁴Delo Elisha sigenana kinam kolok sita simang ikai. Israel roja Jehoash bí Elishame kaatokla delo yagorupe kapto. Bí “Ngok abua! Ngok abua! Israel lok guré-gaaria, Israellok guré dugbonía,” emla kapto.

¹⁵Elishabí delo pokai, “Iyyi kolang epuklok ayoko laatoka.” Jehoash arope iyyi kolang epuklok laabito.

¹⁶Elisha poto, “Iyyidem nok alag delo bomto.” Edílo iyyidem alaglo gagbomtodí, delo Elisha bí bík alagem Israel roja alag delo uktetto.

¹⁷“Sanggodan kirki dem siyyato,” emla Elishake pokolok arope siyyato. “Aplíkto,” emla Elishake pokolok bí aplíkto. “RUUTUM ke ikum bonapena epuge, Siria kídíem ikum bonana yogmoe! Kapeila no Apheklo Siria ami kídíem bulum petyin madoloope mimak imínsuyé,” emla Elisha poto.

¹⁸“Epuk kídíem laala amonglo aplíkto,” emla Elisha ukumkai. Delo rojade arope epuk kídídem laala amonglo lengumko aplíkto.

¹⁹Delo Shédíke amide bím marla pokai, “No amonglo lemngo lemkéko aplík pename, delomin no Siria kídíem ikumla petyin berokyane. Idola supak no Siria kídíem lengum petomko ikumyé.”

²⁰Elisha sila bím yuto. Dekepe ido delo Moablok ami kídíe dongguplo maglíngpe Israel amongdem aayar bomdungai.

²¹Longeko Israel ami kídíde ami simangko yupe ido delo bulu Moab lok maglíngko kaala pesolok simangdem Elishake ago delo yoplík pala dugtoku. Simangde Elishake simang along dem itet kayane turlang kula dagreptoku.

²²Siria roja Hajaelbí bík roja yédungem Israel kídíem agínpe ríakla yédungai.

²³Idola RUUTUM bí Abraham, Isaak delokke Jakobme daapong ibosukampe Israel kídíem mííbala ayang igulem iyarto. Supak loope depe bí bík amiem míínyok sumang.

²⁴Siria roja Hajaelke sirongem bík oo Ben-Hadad rojape ikai.

²⁵Delo Jehoashbí bík abu Jehoahaj kelok rotkamnam doolung kídíem Ben-Hadad keelok rotkamtoku. Lengumko Jehoashbí Ben-Hadadme mimaklo ikumla kerape Siria rojalok Israel among rotkamnam kídíem laalat suyintoku.