Read Alladian 2 ROJA KÍDÍ 14 Bible Online

2 ROJA KÍDÍ 14 - Alladian bible

2 ROJA KÍDÍ 14

¹Israel roja Jehoashke taknyinape roja idoem Joashke oo Amajiah Judahlok rojape ikai.

²Rojape ido delo bí takying annyi kolang takngodo, delokke bí takying annyi kolang dítak konangko Jirusalemlo rojape yéto. Bík ane amíne Jehoaddin, bí Jirusalemlok mimeko.

³Amajiah RUUTUM me kaabang mííbangdope yénako, idola bík abu Dabidke kísape imanako. Iyi-isang takamem bí bík abu Joash ke ikampe ito.

⁴Bí moomem uyu kumpom kídíem ipak manam legape ami kídíe deke delo panam aman bila, kumnam mesing-meru nyotbila idungai.

⁵Bík rojape iname edíngkai idodelo, bí bík abuem petna kídíem pettoku.

⁶Idola buluke oo kídíem bí atí imang, kapeila Mosike atnam ayonlo sipe attung, “Abu kídíem buluke ome-oo imem kolok petmayé, dekepe ome-uemteng abu kídí imem legape petmayé. Mipile agí-agí paab imem sukolok sisuyé.”

⁷Bí Alo Yiibelo Edom lok ami jaryingem ikumla, Sela em laalangkula deme silo loope Joktheel emla amínem míndung.

⁸Delo Amajiah bí amiko Israel roja Jehoash kíng melíkla, “Aatola, ngom migmoe ngéérík sulangka,” emto.

⁹Idola Israel roja Jehoash bí Amajiahme sipe poyansuto, “Lebanon lokke appun alek kone Lebanon lok mongku siilung konem sikena agomko políkdung; ‘Nokke ome dem ngok oo sok mimepe bilangka.’ Delo Lebanonlok monkírko dem appun alekdem tudíp-tuyip bomkai.

¹⁰No arope Edomem ikumto. Supak no adum soledung, nok ikum amíne teyong saadung. Nokke paanamlo aange apíngla, ekumlo duusulangka. Kape agí legape lang Judah ami kídí legape adírem tomsudun?”

¹¹Amajiah bí tatmanam legape Jehoash bí maglíngpe aabomto. Israel roja Jehoash lang Judahlok roja Amajiah bínyi Beth Shemesh emnam moolop delo ríksuto.

¹²Judah ami kídídem Israel kídíe ikumla, Judah ami kídíe agí ekumpe dukyin getoku.

¹³Beth Shemesh delo Israel roja Jehoashbí Judahlok roja Amajiah me umto. Delo Jehoash bí Jirusalemlok luuyab kídíem Ephraim Luuyab lok ila Kéényung Luyab loope mitar língko annyi píítana kope bénpakto.

¹⁴Bí RUUTUM ke Kumkeng Ekum delok uun, baldín, delokke abíd-abíd murkong ekurang emteng roja kumsunglok laato. Bí ami kídí emteng béérangpe bojéko Samarilo enbotoku.

¹⁵Jehoashke abíd-abíd yégang, midu-mimak inam legang takamem Israel lok roja dooying atkumko kitablo atkumtung.

¹⁶Jehoashme bík sidokuem Samari amonglo bík abu kídíem yukolo yuto. Bík sirongem bík oo Jeroboam II rojape ikai.

¹⁷Israel roja Jehoashke sirongem Amajiah bí dítak íying kolang takngoko turto.

¹⁸Amajiah ke yégang takamem Judahlok roja kídílok dooying kitablo atkumtung.

¹⁹Ami kídíe bím Jirusalemlo mirupe ila bí Lakhishpe dugnyokto. Idola bulu Lakhishlo ami melíkla bím petto.

²⁰Bík simang dem gurélok geang langkula Jirusalemlo Dabidke doolunglo abu kídíem yupomlo yutoku.

²¹Delo ami kídíe Amajiahke takying kolang takkéna oo Ujjiahme rojape imoto.

²²Bí bík abu sirongem ikumpala Elath em morep langkula Judah aralo laangangtoku.

²³Judahke roja Amajiahke takying kolang takngoduem Jehoashke oo Jeroboam Israel rojape Samarilo ito. Bí dítak íying appi kolang dítakko rojape ito.

²⁴Bí RUUTUM ke kangkolo atímape agér ila yéto. Delokke edílokom míílat sukumape Nebatke oo Jeroboamke itungem ila Israelem nyokmoto.

²⁵Bí Israel among rísu kídíem RUUTUM Israel ke Shédíke, Gath Heperlok kaaluna Amittai ke oo Jonah kelok lurung bínam kísa Hamath lokke ila Arabah Siyéng loope laayintoku.

²⁶Israel amonglo abíldak ruutumdak takame yagorupe adír paanamem RUUTUM bí kaato. Bulum sékote igul pena kamato.

²⁷Idola RUUTUM bí edílokom, bí taleng rumkíng sok Israel miliem nyokyin momayé emnam legape bí bulum Jeroboam II keelok turnamem paadokupe ruulíkto.

²⁸Jeroboam II ke inam takamem, bík miram legangem, kape kísa Judah kídí keepe ituana Damaskas emlang Hamath em Israel keepe ikum tokudín, delokke abíd-abíd legangem Israel roja kídíke dooying atkum kolo atkumtung.

²⁹Jeroboam II sila, bík simangem bík abu kídíem yupomlo yuto. Bík sirongem bík oo Jekhariahbí rojape iyan kaku.