Read Alladian 2 ROJA KÍDÍ 15 Bible Online

2 ROJA KÍDÍ 15 - Alladian bible

2 ROJA KÍDÍ 15

¹Israel roja Jeroboam II ke takying annyi kolang dítak kíníd duem Amajiahke oo Ujjiah bí Judahlok rojape ikai.

²Bík roja ido delo takying kolang dítak akkédo, delokke bí takying pilngo kolang taknyiko rojape ito. Bík anelok amíne Jekoliah, bí Jirusalemlok mimeko.

³Bí bík abu Amajiah kísa RUUTUM ke kaabang mííbang dope yétuai.

⁴Idokom moomem uyu kumsu supom kídíem ibín manam legape ami kídíe delo panam aman bila, mesing meru nyotla kumsu sutídungai.

⁵RUUTUM bí bím tííd kinam melíkla, bík sidoloope de kinam de bíkkíng kato. Méélamdem ekum kolo bí duungusula, bíkke oo Jotham legang takamem kangge bodungai.

⁶Ujjiah rojake yégang takamem Judah roja kídíke yégang dooying atkum kolo atkumtung.

⁷Ujjiahke sirongem bík simangem Dabidke doolunglo bík abu kídíem yupomlo yuto. Bíkke oo Jotham bík sirongem rojape iyan kai.

⁸Judahlok roja Ujjiahke takying angum kolang dítak píínyi duem Jeroboam II ke oo Jekhariah bí Israellok rojape Samarilo ito. Bí poolo akké petomko rojape ito.

⁹Bí bík abu lok inam kísape RUUTUM ke kaabang manampe yéto. Bí Israel kídíem Nebatke oo Jeroboamke kísape yémem bopala míílatsu bokumato.

¹⁰Jabeshke oo Shallum Jekhariah me mirupe ito. Bí ami kídí kangkolo Jekhariahme Ibleamlo pettola agíe rojape ikai.

¹¹Jekhariahke abíd legang kídíem Israel roja kídíke yégang dooying atkumko kitablo atkumtung.

¹²Sikepe RUUTUM ke Jehume, “Nok otíng-oyin kídíe Israel lok rojape siirum appiko iyé,” emnam agome apíngkai.

¹³Judahlok roja Ujjiahke takying angum kolang dítak konang duem Jabeshke oo Shallum Israel rojape ila, Samarilo poolo atelko ito.

¹⁴Delo Tirjahlok Gadike oo Menahem Samarilo aato. Bí Shallum me petpala Israel rojape duuyanto.

¹⁵Shallumke yégang takamem Israel roja kídíke yégang dooying atkum kolo atkumtung.

¹⁶Delo Menahem Tirjahlok ilenla Tiphsah em mimakpe aabomto. Tiphsah lok doolung luune delok ampenglo duuna kídíem bí ikumto. Bulu bím luuyabem siyya bimape ikolok, bí Tiphsah em lakyakpala nganga gena mime kídíemteng akiiem joksal salyinto.

¹⁷Judahlok roja Ujjiah ke takying angum kolang dítak konang duem Gadike oo Menahem Israellok rojape ito. Bí takyingko Samari lo rojape yéto.

¹⁸Bí RUUTUM ke kangkolo atímape yéto. Kapeila bík sido loope bí Nebatke oo Jeroboam ke Israel opínem yémem bonamem kaayiisula, yéto.

¹⁹Delo Assiria lok roja Pul bí Israel amongem mimakpe aabomla Menahem bí baldínlok íying angum kolang appi tonko Pulme bila, bík among delo edíngpe duunana igulem matato.

²⁰Sim abal sim Menahem Israel kídílok laalentoku. Miremna ami mipile baldín nokdi íying pilngope dorla Assiria roja Pulme bidope ito. Depeila Assiria rojade gílat sukaku.

²¹Abíd-abíd Menahemke yégangem Israel roja kídí yégang atkumko kitablo atkum manía?

²²Menahemke sirongem, bík abu kídíem yupomlo yuto. Bík sirongem bík oo Pekahiahbí rojape yéyan kaku.

²³Judahlok roja Ujjiahke takying pilngo duem Menahemke oo Pekahiah Israel rojape ito. Bí Samarilo taknyiko rojape ito.

²⁴Bí RUUTUM ke kaabang mape yéto. Nebatke oo Jeroboamke yérukpe bí Israel ami takamem yémem boto.

²⁵Bík maglíng lok migom kon Remaliahke oo Pekah bí mirupe ilenla, Gileadlok midum íying pilngoko leko bosudola, Samarilo roja ekumlo aala, Argob melang Arieh me pettak sula Pekahiahme petto. Delo Pekah rojape ikai.

²⁶Abíd-abíd Pekahiahke yégangem Israel roja kídíke yégang atkum kolo atla memanía?

²⁷Judahlok roja Ujjiahke takying pilngo kolang taknyi duem Remaliah ke oo Pekah Samarilo Israel rojape ito, delokke bí takying annyiko rojape yéto.

²⁸Bí RUUTUM ke kaabang mape yéto. Bí Nebatke oo Jeroboam ke Israel kídíem paab ibonamem imín geto.

²⁹Israel roja Pekahke yédo delo Assiria roja Tiglath Pileser aala Ijon, Abel Beth, Maakah, Janoah, Kedesh, Hajor, delokke Gilead, Galil delo Naphtali among kídíem laayin pala delok ami kídíem abílpe umnyoktoku.

³⁰Delo Elahke oo Hoshea bí Remaliahke oo Pekahme rungkupto. Bí Ujjiahke oo Jotham ke dítak íying annyi nanape roja dodoem, Pekah me petpala rojape iyanto.

³¹Pekahke yégang, abíd-abíd legangem Israel lok roja kídí yégang atkum kolo atkumtung.

³²Remaliahke oo Israellok roja Pekahke taknyinana delo Ujjiahke oo Jotham bí Judahlok rojape ikai.

³³Bík rojape yélendo delo dítak íying annyi kolang dítak pilngodo, delokke bí takying kolang dítak akkéko Jirusalemlo rojape yéto. Bík ane amíne Jerusha, bí Jadokke ome.

³⁴Bí bík abu Ujjiahke yékampe RUUTUM me pesola yéto.

³⁵Idola bí moomem uyu kumsu supom kídíem ipak kumala ami kídíe delo panam aman palíkla, mesing-meru nyotlíkla idungai. Jotham bí RUUTUM ke Kumkeng Ekumlok Línggíng Luyabem píne.

³⁶Jothamke yédo delok legí-sigang takamem Judahlok roja kídíke yégang atkum kolo atkum manía?

³⁷Delo longe kídí delo RUUTUM bí Siria roja Rejin mela Remaliahke oo Pekahme Judah rojem mirolpe ruulíkto.

³⁸Jotham sila, bíkke simangem Dabidke doolunglo abu kídíem yupomlo yuto. Bík oo Ahaj bík sirongem rojape yéyankai.