Read Alladian 2 ROJA KÍDÍ 16 Bible Online

2 ROJA KÍDÍ 16 - Alladian bible

2 ROJA KÍDÍ 16

¹Remaliahke oo Pekahke Israel rojape takying kolang dítak kínídduem, Jotham ke oo Ahaj Jirusalemlo rojape ito.

²Ahaj bí rojape idodelo takying annyido. Bí takying kolang dítak akkéko rojape ito. Bík abu Dabidke aina séguem imín gemape bí RUUTUM ke kangkolo atírumape yéto.

³Bí Israel roja kídíke yékampe yéla, agí oo emteng emelo RUUTUM ke Israelke keralok monpaknam belumrunampe ina opín kídí delok inam kísa romnam amanpe romlíksuto.

⁴Bí romnam aman bila moomem uyu kumsu supomlo meru nyotlíkla, delokke esing tarbyana takamlo, delokke díítum ponyuk kídílo kumsudungai.

⁵Delo Siria lok roja Rejin, delokke Israel roja Remaliahke oo Pekah Jirusalemem mimakpe aabomla, Ahaj ke yétaem rotkamto, idola bím ikum laamato.

⁶Delo Siria lokke roja Rejin Judah ami kídíem monpak pala Elath amongem Siria keepe laalat sutoku. Delok rongem Edom ami kídíe Elathlo byaklíkla dungkai.

⁷Assiria lok roja Tiglath Pileser kelo amiko melíkla Ahaj sikepe políkto, “Ngo nok béérange, delokke arík iresula yéne. Aalangka, Siria roje lang Israel roje ngom mimakpe aabomdung. Bínyike alaglok ngom mopít sudope ngom no igultoika.”

⁸Ahaj Kumkeng Ekum lokke baldín, uun kídíem, delokke roja kumsunglo duuna murkong kídíem laala Assiria lok rojeme tomtatpe bito.

⁹Assiria rojade Ahajke rogunamem tatbila Damaskas em mimakpe aabomla amongem rotpala, Kir lok ami kídíem abílpe umbomtoku, delokke Rejinme petto.

¹⁰Delo Ahajbí Damaskaslo gíla Assiria roja Tiglath Pileserme kaaríksuto. Bí Damaskaslo rungguko kaala, delok noksangem akampakpe atla miri Uriah kíng melíktoku.

¹¹Depeila miri Uriahbí noksang bilík kunam kísapakpe rungguko Ahajke aalat sukumang adape moyinto.

¹²Edílo Ahaj aalat sutokudín, bí anípe runggu moyinnam dem kaala,

¹³bí romnam aman, delokke ali-ayé amanem runggu delo bila, tíínam amanem delo purlíkla, delokke panam aman iyyi kídíem batkat líkto.

¹⁴RUUTUM kelo tosak líknam pitol lok pínam runggude Kumkeng Ekum kelang anípe monam runggu pénsam delo kato. Dekepeila, Ahaj bík aní runggu línggíng danlo dem metoku.

¹⁵Delo Ahaj rojabí miri Uriahme sikepe ukumto, “Anípe pínam bottena runggu delo rokom romnam aman delokke yume ali-ayé amanem bilangka. Roja lok romnam aman, bík ali-ayé aman, delokke among so duuna ami kídílok romnam aman, delokke tíínam amanem bilangka. Runggu so pénam aman iyyiem purjé líklangka. Idola ngo pitollok pínam runggudem íngkí-tatkí sukepe iyé.”

¹⁶Miri Uriahbí kape kísa roja Ahaj bí ukumtodí, dekepakpe ito.

¹⁷Ahaj rojabí ampengke kingkap dem laabín pala asi tíkang kengem laadung laatok iponam dakkeng delok ibínto. Bí asi téngki dem pitollok pínam rubo mimang kídí delok laabínla, dabulok pínam notko kolo leelíkto.

¹⁸Bí Sabbath longelo roja ekumlo tamlíknam egedem laabínla, Assiria rojalok legape roja aadung aatok lamgédem ibínto,

¹⁹Ahajke abíd-abíd legangem Judah roja kídíke legang atkumko kitablo atkumtung.

²⁰Ahajke sirongem bím bík buku kídíem yuko Dabidke doolung delo yuto. Bík oo Hejekiah bí Judahlok rojape ikaku.