Read Alladian 2 ROJA KÍDÍ 17 Bible Online

2 ROJA KÍDÍ 17 - Alladian bible

2 ROJA KÍDÍ 17

¹Judahlok roja Ahajke dítak íying kolang taknyinape ido delo Elahke oo Hoshea Samarilo Israel rojape ito. Delokke bí dítak konangko rojape yéto.

²Bí RUUTUM ke kaabang mape yéto, idola bík yétítnam Israel roja abíd kísa rorímang.

³Assiria roja Shalmaneser bí bím mimakpe aabomla, Hoshea bík rumkínglo aalíkla, bím dítak tabunglo kajanang bidungai.

⁴Idola Assiria roja Shalmaneser bí kénkí kuname Hosheabí mirupe idung. Kapeila Hosheabí Assiria rojaem togesunam dítak-dítaklo dorpenam dem doryimang, delokke ami melíkla Ijipt roja So kíng ajon jonpe ito. Depeila Shalmaneser bím umla pateklo meto.

⁵Assiria roja mimak iyabomla Samari amongem rotkamla dítak angumkope bomto.

⁶Hosheake dítak konangdo delo Assiria rojade Samari amongdem langkam pala Israel ami kídíem Assiria amonglo umbomtoku. Bí bulum Halah, Habor Korong abelo duuna Gojan, delokke Medes emnam doolung luune delo duumoto.

⁷Si adír kídísi Israel ami lokke bulum Ijipt amonglok Pharaohke rumkínglok laalenkuna RUUTUM, buluke Shédíke keralo paab imemnam legape ikai. Bulu abíd uyuem kumsula,

⁸buluke ségu-siange Israel roja kídíke ilen bonam, RUUTUM ke monpak kunam ami kídílok ségu-siangpe ikai.

⁹Israel ami kídíe RUUTUM buluke Shédíke kaabang manam agérem supnampe ila yétíto. Makro dungko tongi lokke ila língkum etor kídí loope bulu moomem uyu kumpomem molíkto.

¹⁰Bulu elíng gaangem supnampe tíkumla, delokke Asherah gaangem gíípong takamlo, delokke esing rumkíng takamlo dííyin líkto.

¹¹RUUTUM ke mon-gé kunam ami kídí ikampe, bulu moomem uyu kumpom takamlo arí nampona nyotlík gooyinto. Buluke atímana agér inam kídíde RUUTUM me marmoto.

¹²Bulu RUUTUM ke sikepe lutumnam, “Nolu sikepe imapeka,” embomnam uyu kídarem agér gérbito.

¹³RUUTUM bí Israel, delokke Judah ami kídíem bík kaaluna ami kídíem melíkla sipe lutor bitungai, “Nolu atímana lokke míílat sulangkuka. Noluke buku kídílo ngok kaaluna ami kídílok lulígnam luyil-poyil takamem tatla igelangka.”

¹⁴Idola bulu atí tatmape buluke buku yénam kísa RUUTUM buluke Shédíke ngiitomem tatmape ipéésula yéto.

¹⁵Bulu bíkke ngiitomem akpésula, delokke buluke buku kídarem daapong ibosunam, delokke bulum lutor binam kídarem ipatsula yéto. Bulu agér kamana mimang kídíem kumla buluteng agér kamanape ikai. Bulu buluke ampeng amlenglo duuna ami kídí yékampe yéla, RUUTUM ke buluke yékampe yémapeka emnamem ipatsuto.

¹⁶Bulu RUUTUM buluke Shédíke ngiitomem ipatsula aremlok ruo nganga mimang annyiko delokke Asherah gaangko píto. Bulu takar kídíem kumsula, Baal uyume agér gérbito.

¹⁷Bulu agíke ome-oo kídíem moomem uyuke amínpe emelo romlíkla, moya-montrong ina emla kerang yépenamem poto subina kídíem íngkíla RUUTUMke kangkolo aimana petomem itíkolok RUUTUM me yagorupe marmoto.

¹⁸Depeila Israel teyolo RUUTUM marla bulum bík keranglok ipakla, Judah opín petomem duudope ito.

¹⁹Idola Judah kídíekom RUUTUM buluke Shédíke ayon lubinampe yémato. Bulukom Israel kídí lokke igebonam ayonem imín geto.

²⁰Dekepe ila RUUTUM bí Israel takamem mepakla, mimak magbipe aana kídí alaglo melíkla petkut moto.

²¹Edílo bí Israel opínem Dabidke ekumlok pekngu sutodí, delo bulu Nebat ke oo Jeroboam me buluke rojape ullík bosukai. Jeroboam Israel ami kídíem RUUTUM ke mebinam ayon lokke yépat subola botterupe paab iboto.

²²Israel kídíe Jeroboamke igebonam paab agérem imín getíto, delokke bulu aapí míílat sukumape ila,

²³kerapekai RUUTUM ke kaaluna miri kídarlok lutor binampe, Israelem bík amig keralok ipakyinto. Dekepeila silo loope Israel ami kídíe agí among lok umnyoknampe Assiria amonglo duudung.

²⁴Assiria lok rojade Babilon, Kuthah, Abba, Hamath delokke Sepharbaimlok ami kídíem Israel ami kídí ayanpe Samari doolung luune kídílo duuyin moto. Bulu Samariem toríksula doolung kídíem duuyin aabomkai.

²⁵Buluke duutí-dunggo delo bulu RUUTUM me kumsu manam legape bí myomur simyo kídíem melíkla ami ayokonem petto.

²⁶Dekepeila, Assiria roja dem sipe pokanto, “Nok Samari ami kídíem monpak pala duuyan monam ami kídí si among sok shédíe ingkoko matadudí dem kénmadung. Dekepe ikolok, bí myomurem melíkla ami kídíem doyin modung, kapeila bulu bík míínamem kénmang.”

²⁷Delo Assiria rojade sikepe ukumto, “Ngoluke Samari lok umnam miri kídí delok miriko Samarilo, among sokke shédíke míínamem poyil dope melíktoku.”

²⁸Dekepeila Samarilok kerape umnyoknam Israel miri ako aalat sumo langkula Bethello duulangkula, RUUTUM me kape kísa kumsuyén, dem takam ami kídarem iyilto.

²⁹Idola moolop atellok aana opín mipile agí-agí uyu mimang em bomsula, kerape duuna Samari ami kídíke moomem uyuem kumsu supom kídí delo byakbuk aana kídí deteng kumsu supomem iyin líkto.

³⁰Babilon ami kídíde Sukkoth Benoth ke mimangem, Kuthah ami kídíde Nergal ke mimangem, Hamath ami kídíde Ashima ke mimangem,

³¹delokke Abbit ami kídíde Nibhaj kela Tartakke mimang kídíem píla, Sepharbaim ami kídíde buluke kumbomnam uyu Adrammelekh kílang Anammelekh kíng buluke ome-oo kídíem emelo romlíkla kumsuto.

³²Bulu RUUTUM meteng kumsudungai, idola buluke aku yéyonpe agér gérbo penalok moomem uyuem kedon kolo molíknam kumsu supom kídí takamlo mirilok ullíkla medungai.

³³Dekepe bulu RUUTUM me kumsuto, idola buluke kerape dungko kídílo duudungem yébomnam yéyon emkom edílote mepakmato.

³⁴Silo loope bulu aku yéyonem yébomla duudung. Bulu RUUTUM me kumsumang, delokke Israel emla mínlíknam Jakobke otíng-oyinem bíkke ayon emlang lulíg binam kídíem igemang.

³⁵RUUTUM bulum daapongko ibosudola sikepe lulígtuai, “Ngok kékonlo abíd uyu kumsumapeka, uyu keralo gubamapeka, uyuem agér gérbi mapeka, delokke uyuem atí aman bimapeka.

³⁶Idola pauar lokla ralnamlok, nolum Ijipt amonglok laalen kuna RUUTUM petomme nolu kumsu langka, delokke aman bigíngem bilangka.

³⁷Nolu agínpe ngokke nolum atbinam ayon kídí emlang lulígnam kídíem iyar gelangka. Abíd uyu kumsu mapeka.

³⁸Ngokke nolum ibosunam daapongem edílote mitpan sumapeka. Nolu abíd uyu kumsu mapeka,

³⁹idola RUUTUM noluke Shédíme kumsu langka, delokke bí nolum noluke takam miru alaglok mopítyé.”

⁴⁰Dekepe ilateng bulu tatmape, buluke aku yéyonem itíbomkai.

⁴¹Dekepeila, de ami kídíde RUUTUM me kumsudola buluke kumtí bomnam uyu mimang emteng kumdungai. Silo loope buluke ome-oo kídíe delokke oten kídíe, buluke abu kídíke itungem iyargedung.