Read Alladian 2 ROJA KÍDÍ 18 Bible Online

2 ROJA KÍDÍ 18 - Alladian bible

2 ROJA KÍDÍ 18

¹Israel roja Elahke oo Hosheake tagumnana delo Judahlok rojape Ahajke oo Hejekiah bí ito.

²Bí rojape ilendoem takying annyi kolang takngodo delokke Jirusalemlo bí takying kolang dítak konangko rojape ito. Bík ane amíne Abijah. Bí Jekhariahke ome.

³Bí bík buku Dabid ke inamem imín gela, RUUTUM ke kaabape yéto.

⁴Bí moomem uyuem kedon kolo kumsukeng kídíem bénpakla, kumbomnam elíng líídung kídíem tummíkla, kumbomnam Asherah gaang emteng teeletto. Mosike pitollok pínam tabí mimang demteng bí petkyakto, kape ila delo longe deloope Israel ami kídíe delok rumkíng delo eme mesing nyotla kumsudungai, delokke dem Nehushtan emdungai.

⁵Hejekiah bí RUUTUM Israelke Shédí kelo airupe míngkesuto. Judah roja kídí aralo bíkke kísa míngkesuna kerang-méélampe kamato.

⁶Bí RUUTUM me melut sényimape míngkesuto. Bí Mosi kelok políknam lulígnam takamem apíírupe igela yéto.

⁷Dekepeila RUUTUM bí agínpe bíkkelo yémín gela, ingkona agérko idokom dem ipíng píílídungai. Bí Assiria lok rojem mirolpe imínsula bík rumkílo duunamem tomape ito.

⁸Bí makro dungko tongi lokke ila líísak etor loope, Philistain ami kídíem ikumla Gaja, delokke sokko among rísu loope ikumla yéto.

⁹Hejekiah rojake takpinana delo, delokke Israel roja Elahke oo Hosheake dítak kínídnana delo Shalmaneser emnam Assiria rojade Samariem mimakpe aabomla rotto.

¹⁰Dítak angumnana delo Assiria kídíde Samari em laato. Delo Hejekiah dítak akké nanape roja ido, delokke Hoshea bí dítak konang nape roja dodo.

¹¹Assiria rojade Israel ami kídíem Samari among lok Assiriape byakmola Halahlo, Gojan distik lokke Habor Korong robenglo, delokke ayokonem Medes doolung luune delo duumoto.

¹²Kapeila, RUUTUM buluke Shédíke lulígem tatmape, RUUTUM ke Mosi kíng lulígnam daapong takamem ipéésuto; bulu tatbimang delokke igemang.

¹³Roja Hejekiahke dítak íying kolang takpi delo, Assiria roja Sennaserib líísaklok etor torgo sunam Judah amongem mimakpe aabomla rotkamto.

¹⁴Delo rojade sikepe Assiria rojem Lakhishlo políkto, “Ngo imemto. Ayasula no sok gígéé langkuka. No edítko koyédí dekepe ngo murkongem biyé. Delokke no kape ilangka emyédí, ngo depe iyé.” Dekepe Hejekiah rojame Assiria rojade ton íying kolang atelko baldínlok delokke ton atelko uunlok bilangka emto.

¹⁵Konam kídí sim Hejekiah bí RUUTUM ke Kumkeng Ekum loklang bík roja kumsunglok laalenla bito.

¹⁶Hejekiah rojabí Kumkeng Ekum eyab kídílo, gaang kídílo kyamlíknam uun kídíem laalen langkula Assiria rojame bito.

¹⁷Assirialok rojade bík mimak ruutum migom botteyalumna, delokke bík mimak makbilo ruutumpe yégebona kídílo sipaying abamko Lakhish lokke Jirusalemlo Hejekiah kíng melíkto. Bulu Jirusalemlo pííla, ege etna arík emnam patat delokke línggídan asi pooyinglo dooto.

¹⁸Bulu roja dem tomlen dodem; legang kaadung kaatok bona Hilkiahke oo Eliakim, addung attok bona Shebna, delokke legangem atkumbona Asaphke oo Joah bulu angume kaaríksupe lento.

¹⁹Mimak magbi ruutum kídíde bulum pokai, “Hejekiah me polangka. ‘Botteruna Assiria roja bí sipe podung. No íngkona legang lok míídasula agíem míídíng sudune?

²⁰Agompe de mimak ségu elang ralname emla no míídunía? Séko kelo no míídasula ngom mirolpe imínsupe idun?

²¹Supak kangkítola, no Ijipt teyonglo míídasudung, idola nokke míída sukengde aar kana dolbum kísa umdasuna takamem gatyé. Dekepe Pharaoh roja bíkkíng míídasunem idung.

²²Delokke nolu RUUTUM noluke Shédíkíng míídasudung empene, RUUTUM me kumkeng kídíem Hejekiahbí bénpakmanía? Judah kídí emlang Israel ami kídíem, “Nolu Jirusalemlo, so runggu kídíso kumsu langka,” emmanía?

²³Supak aatola, ngok ruutum Assiria rojame lurek-porek bosutola. No dukbompena ami malík lapemílo, ngo nom guré éjar annyiko biyé.

²⁴No Ijipt teyolo guré-gaari legapelang dugbopena legape míídasudula, kape kísa ngok ruutumke améyalumna migom emteng lupak laayén?

²⁵Delok teyolo RUUTUM ke ukum kamape, ngo kape kísa sim among sim mimakpe aabomla lakyakyén? RUUTUM bí agísue ngom sim among sim mimak ila lakyakdope lulíkdung.’ ”

²⁶Delo Hilkiahke oo Eliakim, Shebna, delokke Joah bulu poyansuto, “Ayasula noluke béérang kídí sim Aramaik agomlok lupotoika, ngolu dem tatkéndung. Etor anínso duuna ami kídí tatkolo ngolum Hibru agompe lupomayika.”

²⁷Sipaying ruutum kídíde poyansuto, “Sim agom kídí sim nolum lang noluke ruutum petomem podope ngoluke ruutume lulígtung emla nolu míídunía? Dekemang, agom kídí sim etorlo duuna, noluke kísape agí tayém dosula, agí esiem tíísula ipena ami kídí simteng pokandung.”

²⁸Delo sipaying ruutum kídíde Hibru agompe bottepe pokai, “Assiria lok botteruna rojalok ponamem tattola.

²⁹‘Si rojalok poname: Nolu Hejekiahme yatko sumapeka. Bí ngok alaglok nolum mopít lamayé.

³⁰Nolu Hejekiahke, “RUUTUM bí depekom ngolum mopítyé, sim doolung luune sim Assiria roja alaglo bimayé,” emnamlo tatmemsula doonge sumapeka.

³¹Hejekiahke agomem tatmapeka. Assiria roje sipe podung: Nolu lenla ngok rumkínglo yédope tolík sulangka. Delomoko nolu agíke onggur ayém, agíke tapang ayém dosula, agíke deerung lok asiem tíísula,

³²ngo nolum noluke among kísana, ali-ayé yagorupe goobina among kon kolo tomlíkla duumo kumang adape, nolu simape turla duudope imoyéne. Hejekiahke agomem tatmapeka, “RUUTUM bí ngolum miru alaglok mopítyé,” emla bí ami kídíem yémem modung.

³³Supak loope ingkona kumsunam shédíe bík among delokke ami kídíem Assiria roja alaglok mopíttun?

³⁴Ingkoloda Hamath lokke lang Arpadlok shédí kídare? Ingkoloda Sepharbaim, Hena, delokke Ibbahlok shédí kídíe? Samariem ngok alag lok bulu mopíttonía?

³⁵Sok among kídísok ingkona shédíe buluke amongem ngok alaglok mopít laaton? Dekemílo noluke RUUTUM bí kape kísa Jirusalemem ngok alaglok mopít layén?’ ”

³⁶Idola ami kídíde atí poyan sumape nyogapto, kapeila rojade bulum kerape ukumto, “Nolu sékokom agom poyan sumapeka.”

³⁷Delo Hilkiahke oo, roja ekumem kaadung-kaatok bona Eliakim, roja lok atgebona Shebna, delokke Asaphke oo, legang atkumbona Joah, agí-agíke ege galugem bétsula, Hejekiah roja kelo gíla sipaying ruutum kídí ponamem pobito.