Read Alladian 2 ROJA KÍDÍ 19 Bible Online

2 ROJA KÍDÍ 19 - Alladian bible

2 ROJA KÍDÍ 19

¹Edílo legang kídí sime Hejekiah rojabí tattodí, delo bí ankílok egem bétsula, ankí gasorem gela RUUTUM ke Kumkeng Ekumlo gíto.

²Delo bí roja ekumem kaabomna Eliakim melang kebang atgebona Shebna, delokke miri ruutum kídíem ankí gasorem geyin moge yéla Amoj ke oo kaaluna miri Isaiah kíng lulígto.

³Bulu bíme Hejekiah bí sipe podung emla lukanbito: “Siloke longe si, okii kila koo oramna mime kísa ngolu takamke legape gomké lukosula, adír runa, delokke annying runam longe kope ikai.

⁴Assiria rojabí agíke maglíng ruutumem melíkla turna Shédíme lupu-lulé along pakto. RUUTUM nokke Shédíbí dekena lupu-lulé em tatla, dekepe luna bím edo radaklangka. Dekepeila, turla duuna legape Shédí kíng kumbilangka.”

⁵Hejekiah rojake agomem Isaiah edílo tattodí,

⁶bí bulum sipe poto, “RUUTUM bí sipe podung, ‘Assiria rojake maglíng ruutumke ngome lupu-lulénam, noluke tatnam agom kídí legape nolu pesomapeka.

⁷Tattola, bíkke teyonglo ngo aidko ruulíkla, mepe-menam legí-sigang eke tatmoyé, delo bí agí amongpe enyéku. Delo ngo bíme yoksalok pakamoyé.’ ”

⁸Edílo Assiria roje Lakhishlok gílen langkula Libnah doolungem mimak imín sudung emnamem kéntodín, delo sipaying ruutumde delok gílen langkula rojadem lurík sudokupe gítoku.

⁹Ethiopia among lokke roja Tirhakah bí Ijipt kídíke maglíngem gíbola Assiria em mimak imínsupe saadak emnamem Assiria roja de edílo tattodí, delo bí Hejekiah kíng kotokiko sim agom kídar sim ludokupe lulígto:

¹⁰“Judahke roja Hejekiahme sim agom sim polangka, ‘Assiriake alag aralo melíkmayé,’ emna noluke Shédíke yadnamlo nolu míída sumapeka.

¹¹Assiria rojake mimak iabomla deddína among yétaem nyokpak monamem nolu tatdung. Nolu delok elok ipíí suyénía?

¹²Ngokke buku kídíe Gojan, Haran, Rejeph delokke Telassarlo duuna Bethedenke ami kídíem peyyinla dekena doolung kídíem nyokyin moto. Deke delokke uyu kídíe bulum ipíttonía?

¹³Supak ingkoloda Hamathke, Arpad kelang Sepharbaim, Hena demangkom Ibbah kídíke roja kídíe?”

¹⁴Kotoki delok Hejekiahbí shitidem laala porito. Delo bí deme bomla Kumkeng Ekum delo aala RUUTUM ke keralo shitidem taayala mela,

¹⁵delo kumto, “E RUUTUM, Israelke Shédí, Serubim pénsamke palenglo duuna no petommin tani amongke yéta takam lokke Shédíe. Nomin taleng emla among sim píne.

¹⁶E RUUTUM, nok agí nyorunglok tatbilangka, delokke nok agí amiglok kaabilangka. Turna Shédí nome Sennaserib ke lupu-lulénam agomem tatlangka.

¹⁷Deddína among yéta tabungem Assiria roje kuruk alongla deddína opín-buangem nyokyinmola arope idung.

¹⁸Buluke uyu kídí takamem emelo romnyokyinto, kapeila dekede tani alaglok písunam esing-elíng mimang ekíai,

¹⁹Supak, RUUTUM ngoluke Shédía, tani amongke yéta takame, no petommin, E RUUTUM Shédíe emla kényindope, ngolum Assiria rojake alaglok mopítyika.”

²⁰Delo Amoj ke oo Isaiah bí Hejekiah kíng agomko lulígto, “RUUTUM Israelke Shédí bí sikepe podung, ‘No Assiria roja Sennaserib ke legí-sigangem, ngokkíng kumkan sunamem ngo tatto.

²¹Bíkke teyolo RUUTUM ke kebang agom luname sipe podung: E Sennaserib, Jirusalem luune nom ngilkala míípakdung.

²²Sékomemda no lupu-luléla deemang luketdun? Sékoke teyoloda no ugla lula; míngkímlok nok amige kaadusukan? No Israel ke deena Shédíke mirolpe ikai.

²³Nokke kotoki kídílok no RUUTUM ke teyolo lupu-lulé alongla, “Ngokke sanam yimanam guré-gaarilok Lebanonke kedon yalumna dííte kídíem ikumto. Ngo bodong runa sidar esing emla siinang esingem beeletla, moonam arango loope pííto.

²⁴Ngo mibo amonglo asi déérung konggoola, asi tínggoola, ngokke ale ledu sok Ijipt lokke korong kídíemte oojinmoto,” emla botterupe no agom lukai.’

²⁵“Ngokke kerapekai míírung-irula inamem no tatmanía? Supak ngo agér takamdem imoto. Nok teyolo ngo ralnam pauarem ruulíkla kumgong sunam líísak doolung kídíeme no nyokmola elíng apom kope imoto.

²⁶Deke delo duuna ami kídíde tolyan sulamape, pesola akén-ayén yimape igeto. Bulu arík lokke améngope garsana ííng kísa demangkom, edílo pamkina sanggo asar mutyém rukkuna míílong teyolo íími garna kísa ito.

²⁷“Idola ngo nokke dungko-dakko delokke gíko kídíem kéndung, delokke ngokke teyolo marnamem kéndung.

²⁸No ngok teyolo marnam legape delokke nokke mííte sunamde ngokke nyorung sokai píínam legape, ngo rakékolok nok nyobung delo kéélíkla, delokke nok nappang delo ngo rímo ponlíkla, ingkolokdí no aatone delok nome gílat sudokupe ngo iyé.

²⁹“E Hejekiah, nok keralo sim iyod sim lengkandung. Sinyingla lunnying agí-agíe garsasuna ali-ayéme nolu doyé. Idola toodí tagumnana telo nolu ali-aamem ilíkla, onggur anem lela, dola-tíílayéku.

³⁰Judah amonglo séko buludí turla yéyéne, bulu lekoda eerípe appír pírla, teyolo ayé éngkuna esing kísa yéku.

³¹Jirusalem lola Jayon Díítumlo turla duuna amie kayé, kapeila, RUUTUM ke eername dekedem imoyé.

³²Dekepeila, Assiria rojake legangem RUUTUM bí sikepe ludung: ‘Bí so doolung so aamayé, delokke yokmo atel kokom aplíkmayé. Tamkung bomna maglíng kídíe doolung anínso aamayé, delokke língkum kumsa bomla imayé.

³³Bí doolung so aamape, ingko bedalok bí aatodí delok bedang delok bí enyéku. RUUTUM ngo, sim podung.

³⁴Ngok agísu legapelang ngom agér ibina Dabidke legangpe, doolung sokke tamtepe, ngo dagge bila mopítyé.’ ”

³⁵Delo yoh delo, RUUTUM ke kotokiko gílenla, Assiria notkolo 185,000 sipaying maglíngko mokato. Longekon delokke rodem edílo ami kídíde gereptodí, delo bulu deddína simangem kaapato.

³⁶Dekepe ila Assiriake roja botte, Sennaserib bí notkoem bénlangkula Ninebipe enlat sulangkula delo duutoku.

³⁷Longeko bíkke uyu Nisrokhke kumkeng ekumlo bíkke kumsudungem, bík oo Adrammelekh lang Sharejer bínyi bíme yoksalok paka geyéla Ararat amongpe dugnyok geto. Bíkke ayanpe bíkke oo akon Esarhaddon bí rojape iyankai.