Read Alladian 2 ROJA KÍDÍ 2 Bible Online

2 ROJA KÍDÍ 2 - Alladian bible

2 ROJA KÍDÍ 2

¹Elijah lang Elisha bínyi Gilgallok enlenla bedanglo endungem RUUTUMke Elijahme teyong amongpe meyatlok laasang díkue píngkai.

²Elijahbí delo Elishame poto, “No so dooyang langka, RUUTUM bí ngom Bethel belo tomlíkdung.” Elishabí poyansuto, “Berokrupe RUUTUM ke duudung tetengem, delokke nokke turdung tetengem nom ngo melutmayé.” Delo bínyi Bethelpe tokbosuto.

³Bethello duuna kaaluna ami kídíe Elisha kíng lenla íngkíto, “Nokke ruutum Elijahme silo RUUTUM bí teyong amongpe laasang yéku emla no kéndunía?” Delo Elisha bí poyansuto, “E! Ngo kéndung. Idokom dem popang mapeka.”

⁴Delo Elijahbí Elishame poto, “No so dooyang bomdoka. Ngom RUUTUM bí Jerikolo lulígdung.” Elisha poyansuto, “RUUTUMke duudung tetedem, delokke nok turdung tetedem edílokom ngo nom melutmayé, dem ngo berokpe pobidung.” Delo bínyi Jerikope enbo sukai.

⁵Jerikolo duuna kaaluna ami kídíe Elishame íngkíto, “Nok ruutum Elijahme silo RUUTUMbí teyong amongpe laasang yéku emla no kéndunía?” Elishabí poyansukai, “E, ngo kéndung! Idokom dem lupang mapeka.”

⁶Delo Elijahbí lekoda Elishame poto, “No so dooyang langka. Ngom RUUTUM bí Jordanlo lulígdung.” Delo Elisha poyansuto, “RUUTUM ke duudung tetengem, delokke nokke turdu tetengem edílokom nom ngo melutmayé, dem berokpe lubidung.” Depeila bínyi Jordanlo enbosuto dada.

⁷Kénna delokke kaaluna ami kídíe íying pilngokope Elijah delokke Elisha bínyike Jordanlo enríla dakko delokke mootenggamlo dakla bínyim kaalíkto.

⁸Elijahbí bík genam lukdorem pítbínsula dem títgeyéla, delok Jordan asiem demtoname lakké-lakbíkpe aside péépansula bedangkope ikai. Delok bedang delok bínyi pítílpe Jordan korong delok gíto.

⁹Jordan asiem koopala Elijah bí Elishame poto, “Teyong telo ngom laasang kumang adape nom ngo ingkoko ibipene dem no pobitola.” “Ngo nom rogudung, ngome nokke aid lokke adu annyiko ralnamem kamotoyika,” emla Elisha bí poyansuto.

¹⁰Elijah bí emkai, “Nok konamde bikan manamko kodung. Idola no ngom among sok teyongpe laasang dokupe kaayémílo, ngok ralnam takam si nokkepe iyé, delokke kaamayémílo imayé.”

¹¹Dekepe bínyike luposula bedang delo endungem menarupe emepe ina guré-gaari kolang emepe ina guréeke dem sogela bínyim ipansula Elijahme laala menape teyongpe yopsang bokaku.

¹²Elijahme meyatko aala teyongpe yopsang bokunamem kaala Elisha bí bottepe érla Elijahme gogto, “E ngok abua, ngok abua! Israelke guré-gaari delokke guréem dukbona.” Delokke ila Elisha bí Elijahme lekoda kangkumato. Delo bí agí ege-galugem jumsupala annyikope bétpansuto.

¹³Elijah kelok oletkuna lukdorem, Elisha bí tíla enlat sulangkula, Jordan asi-sibe delo dakto.

¹⁴Bí lukdor delok Jordan korongdem dempala emto, “Íngkolo RUUTUM, Elijah ke Shédíbí?” Edílo bí asidem lukdor delok demtodí, aside lakbík-lakképe péépan sukai, delo bí delok entoku.

¹⁵Jeriko lokke kaalu-kangorna íying pilngode Jordan korong rotkonlo dakla Elishame koolat sudokupe kaadola manbosukai, “Elijahke ralname Elisha kíng angkai.” Delo bulu gíríkla, Elishame lebíng kooníla kumsudola pokai,

¹⁶“Kaatola ngolu supak nokke béérang kídíe íying pilngoko kadung. Nokke ruutum Elijahme matadope bulum mepan sulíktola. RUUTUMke aide bím joobomla kénmangko dííte moopang mamílo sine kobung atíkolo menyoktupe.” “Ma, bulum matakolo melíkmapeka,” emla Elisha bí poyansuto.

¹⁷Idakkom bulu tatmape rogu gutínam legape Elisha bí annying gekabong ila méélamdem matadope tolíkto. Delo bulu íying pilngode rego-regope mapansukai. Longum kope matakíla maram supala bulu Jerikolo píngangtoku.

¹⁸Bulu Jeriko delo Elishake dungko delo aadokudem, Elisha bulum emto, “Ngo nolum kerapekai matamapeka emmanía?”

¹⁹Jerikolo duuna ami kídíe Elisha kíng aala poto, “Kaatola ngoluke ruutum, ngoluke dungko si aina kumkol kope idungai, idola sok asie atímang, delokke kédéng si ali-ayé ngiilík dokom garmang.”

²⁰Delo Elisha bí pokai, “Ngom bati tiilat aníko laabitola. Delo alo anyongko líkto.” Delo bulu bík pokampe bati tiilat aní kolo alo anyongko líkpala bím bito.

²¹Delo bí gílenla korong rojik delo alo dem ellíkdola emto, “RUUTUM bí sikepe podung, ‘Ngo sim asi sim deemotoku, sok korong roojik sok asi tííla, sékote supak lokke sina kamayé, delokke iyyipe bítpaknam kaimayé.’”

²²Delokke ila korong roojik delok asie, Elishake pokampe silo loope deengkaku.

²³Jeriko lokke Elisha Bethel danpe enlat sutoku. Bí bedang delo endungem doolung delok yaamé kooeke lenla ngilka dola emto, “E, tuglokna no, sokke gígétoku! Tuglokna no, sokke gígétoku.”

²⁴Delo bí bulum kangkut sudo langkula, RUUTUMke amínlok béélíkto. Delo moonamlok situm tumne annyiko lenla yaamé kídí delok íying appi kolang midum annyiko pupan-puransula mokato.

²⁵Delo Elishabí Karmel adipe saala, delokke bí Samaripe entoku.