Read Alladian 2 ROJA KÍDÍ 20 Bible Online

2 ROJA KÍDÍ 20 - Alladian bible

2 ROJA KÍDÍ 20

¹Delo Hejekiah bí yagorupe kila sita simang ikai. Kaaluna miri Amoj ke oo Isaiah bí bíkkíng aala sipe poto, “RUUTUM bí sikepe podung: Nokke ekumem aipe leesi lemolangka, kapeila no siyé, kinam sok mopít sukumayé.”

²Delo, Hejekiah ekum suppi danpe ngéngkur dola RUUTUM me kumsuto.

³“E RUUTUM, ngo nom edítko míngkesula aapílok apíírupe míngkesula agér gérla, nok kaabangpe agér gérnam takamem míípang sutoika.” Delo Hejekiah yagorupe kapto.

⁴Isaiahke raadang kebang ekumem gínyo kumang adape RUUTUM ke agome bíkkíng pííla,

⁵“Gílat sulangkula ngok ami kídíem yégebona Hejekiahme polangka, RUUTUM nok buku Dabidke Shédíbí sikepe podung, ngo nok kumnamem tatto, delokke miksiem kaato; nom ngo mopítyéku. Supak lokke longum nana telo no Kumkeng Ekum telo saalangka.

⁶Nok turpenamem dítak íying kolang takngoko bitemyé. Delokke nomlang sim among sim Assiria roja alaglok mopítyé. Ngo sim doolung luune sim, ngok legang pelang ngok béérang Dabidke legangpe miru alaglok mopítyé.”

⁷Delo Isaiah roja dem kaabomna kídídem poto, “Tapang ayélok monam ettíng ko laala, kinam sok aidokupe, bík tasud teyodelo ilíkto.”

⁸Hejekiahbí Isaiahme íngkíto, “Ngo silo lokke ila longum nanem RUUTUM ke Kumkeng Ekumlo saala, ngok kinam sim mopít yéku emla ingkona iyodlok kangkényén?”

⁹Isaiah poyansuto, “Si RUUTUM ke iyodpe iyé. Bí ingkuem pébi sutudí dem ibiyé: Abír-ayoem lekor íyingko gíto sumopía ma gíkut sumopía?”

¹⁰“Abír-ayoem gíto sudope inamde ipoodung. Dem penem, lekor íyingko gíkut sudope imolangka,” emla Hejekiah poto.

¹¹Delo Isaiah bí RUUTUM me gogla, bí abír-ayoem lekor íyingkope Ahaj rojake pínam bangkor [3] delok gíkut sumotoku.

¹²Delo Babilonlok roja Baladanke oo Merodakh Baladan, Hejekiahke yagorupe kinamem tatla aman kolang shitiko melíkto.

¹³Hejekiah Babilon roja melíknam kotoki kídídem aipe toríksula bulum bíkke baldín emlang uunem, bíkke aríkana kuséréng emlang nampona alangem, delokke bíkke mimak ekurang takamem lengkanto. Ingkona ekurang kokom bík kumsung delolang among yéta delo lengkan manam kamato.

¹⁴Delo miri Isaiah, Hejekiah kíng aala íngkíto, “De ami kídíde kape emdun? Delokke bulu ingkolok aadun?” “Bulu mooteng among Babilonlok aadung,” emla Hejekiah bí poyansuto.

¹⁵Kaaluna miride íngkíto, “Nokke ekum delo bulu íngkoko kaaton?” Hejekiah bí poyansuto, “Bulu ngok ekum sok takamem kaayinto. Ngok kumsunglo bulum lengkan manam atí kamang.”

¹⁶Delo Isaiah bí Hejekiahme poyansuto, “Ralnarung RUUTUM ke ponamem tattola:

¹⁷Nokke lang nok abu kídíke mekumnam ekurang takamem Babilonlo gelík díku longeko berokpe aayé. Atí koteng mebimayé, emla RUUTUM bí podung.

¹⁸Noluke osunam, noluke adín iyyilok lenna otíng-oyin kídí emteng enbo langkula, bulum Babilon roja rumkílo mumbalpe imoyé.”

¹⁹“RUUTUM kelok nokke ngom agom ponamde aidung,” emla Hejekiah bí poyansuto. Kapeila, bí aapílo mííto, “Ngok turdung anyong sim ngok yénamlo aapí eetet emla ebín kamape yéyé.”

²⁰Hejekiah rojake abíd-abíd legangem, bík miram kídíem, delokke kapekísa paatang koola, delo nala rolíkla doolung luune kídílo asi biimotodí, dem takam Judah roja kídí lokke legang atkumko kitablo atkum manía?

²¹Hejekiahke sirongem bík oo Manasseh bí rojape yéyankai.