Read Alladian 2 ROJA KÍDÍ 22 Bible Online

2 ROJA KÍDÍ 22 - Alladian bible

2 ROJA KÍDÍ 22

¹Judah lok rojape ilendo delo Josiahbí dítak píínyido, delokke takying angum kolang taktelko bí rojape Jirusalemlo ito. Bík anelok amíne Jedidah. Bí Adaiahke ome, delokke Bojkath doolung lokke.

²Josiah bí RUUTUM ke kaabang dope yéla, bík buku Dabidke yénam pakpe, lakké-lakbíkpe ngéngkup-ngélatmape jonnampe yéto.

³Bík dítak íying kolang píínyido delo Josiah roja bí atgebona, Ajaliahke oo, delokke Meshullamke oten Shaphan me, bí RUUTUM ke Kumkeng Ekumlo lulígdola sikepe poto,

⁴“No miri ríne Hilkiah kíng gíla delokke lamgé dakbomna kídíke ami kídílok Kumkeng Ekumlo bomanam abalem langkumla menam lok ripodem laatoka.

⁵Abal dem Kumkeng Ekumem mosi-momo agérem kaabom-tatbomdope lulíknam kídíem bilangka delokke,

⁶delok mosi-momona mistri kídíem buluke agér ire abalem bilangka. Delokke esing delokke kampope gatnam elínglok remolangka.

⁷Idola bulum isi-simo legape abal pitdope binamem isap mínmangkom aiyé, kapeila bulu míngkenglok agérem idung.”

⁸Miri írne Hilkiah bí atgebona Shaphanme poto, “Ngo ayon kitabem RUUTUM ke Kumkeng Ekumsok paatungku.” Bí dem Shaphanme bito, delo Shaphan bí dem porito.

⁹Delo atgebona Shaphan bí rojalo aala pokanto, “Nok agérem kangge bodope lulígnam ami kídílo RUUTUM ke Kumkeng Ekumlok paanam murkong kídíem nok béérang kídíe doryin líkto.”

¹⁰Delo Shaphan bí rojadem, “Miri írne Hilkiahbí ngom kitabko bitung,” emdola bí roja tatko delo kitab dem pori rikan bito.

¹¹Edílo rojade yéyon kitab delok agomem tattodí, delo bí agí lukdorem bétsuto.

¹²Delo miri írne Hilkiahme, Shaphanke oo Ahikam me, Mikaiahke oo Akhbor me, atgebona Shaphanme, delokke roja tomlík gíbina Asaiah bulum sikepe políkto,

¹³“Supakke pangkunam yéyon kitab so ngokke legang, delokke ami kídí legang, delokke takam Judah opín kídí legangem kape attudí dem nolu RUUTUM kíng gíla íngkí-tatkí bilangka. Ngoluke buku kídíe RUUTUM ke agomem tatmape ipatsunam legape RUUTUM ke marname ngoluke teyolo kadung.”

¹⁴Miri írne Hilkiah, Ahikam, Akhbor, Shaphan delokke Asaiah bulu roja ege-galuk mepomem kaabomna Harhaske oten, Tikbahke oo Shallumke méng, kaalu-kangorna Huldahme luposupe gíto. Bí Jirusalemlok doolung anípe item kunamlo duudungai.

¹⁵Huldahbí bulum poto, “RUUTUM Israelke Shédí sipe podung: ‘Nolum ngokkíng lulígna ami dem sipe polangka,

¹⁶RUUTUM bí sikepe podung, Judah rojalok porinam yéyon kitablo atnam kísape ngo so among so, delokke ami kídí teyolo reyub runam adírem melíkyé.

¹⁷Kapeila bulu ngom mepakto, delokke uyu mimanglo bulu mesing-merí nyotla kumsula ngom yagorupe marmodung. Ngok marname sim among sim gupakla edílokom mitmayé.

¹⁸Idola Judah rojame RUUTUM Shédíke legangem íngkí-tatkídope lulígnadem polangka: RUUTUM Israel ke Shédí sikepe podung: No ayon kitablo atnamem tatla,

¹⁹edílo no sok among sok teyolo aapena adír legangem tattodí nok aapíe bursula, ngok keralo mínggípsula, egem bétsula kapgu sutodí, ngo nok kumnamem tatbito.

²⁰Depeila ngo nom nok abu kídílo laadum sulíkyéku, delokke nom dengerupe yusimoyéku, delokke among sok teyolo binam adírem no agí amiglok kaasumayé.’ ” Delo bulu ponam kídí takam sim roja dem pobitoku.