Read Alladian 2 ROJA KÍDÍ 23 Bible Online

2 ROJA KÍDÍ 23 - Alladian bible

2 ROJA KÍDÍ 23

¹Delo rojade Jirusalem delokke Judahlok miro kídíem tomdum suto.

²Bí Judah lokkela Jirusalemlok ami kídíem delokke miri kídí, kaalu-kangorna kídí, delo mirem-opan kaangusumape takam amiem gíbola RUUTUM ke Kumkeng Ekum delo gíto. Buluke takam tatkolo bí Kumkeng Ekum delok pangkunam ayon kitab tabung deme pori rikan bito.

³Rojade kedonna gaanglo dagdola RUUTUM ke ayon kídíemla lulíg kídí takamem bík aapí loklang aidlok apíngpe tatbila, delokke ayon kitab delo atkampe ipenam takamem yége dokupe daapongko RUUTUM kíng ibosuto. Delo daapong ibosunam agompe yéyéku emla takame pésuyinto.

⁴Delo rojade miri írne Hilkiahme, bím nítmín gena miri kídíem, delokke Kumkeng Ekum lok lamgé dakbomna kídíem, Baal uyuke, delokke Asherah, delo taleng telo dakna kídí legape monam ekurang takamem RUUTUM ke Kumkeng Ekum lok laabíndope ukumto. Dem ekurang kídídem bí langkumla Jirusalem beyulo duuna Kidron Yiibelo rompak pakyinla, delok mepi kídíem Bethello bomtoku.

⁵Judah lolang Jirusalem anín kídílo moomem uyu kídíem kedonko kumpomlo ipagem ibodope, delokke Baal uyu kíng, doonyi, poolo, taleng telo dakna lolang takar kídílo ipak ila, nampona mesing nyotbodope, Judah roja kídílok ullígnam uyu mimang kumsubona miri kídíem, rojade ipak pakyintoku.

⁶Bí Asherah gaangdem Kumkeng Ekum delok laalenla Jirusalem beyulo Kidron yiibelo rompakto. Bí mepidem pemukpe tummík pala ami kídí agolo kuujéng líkto.

⁷Bí Asherah uyu keepe mime kídíke ege sumpom, milokong notii kídí dungkeng ekum dem Kumkeng Ekum delok bénpak bito.

⁸Josiah bí, Judah lok luune takamlok miri kídíem laadumsula kedonna kumpom kídíem Geba lokke ila Beersheba loope runggu kídarem líípakbito. Bí luune delok aatak lamgé lakkédanlo duuna, luune gobonor Joshua ke pínam luuyab lok ampenglo molíknam kedonna kumpom kídíemteng bénpak pakyinto.

⁹Kedonna kumpomlok miri kídíde Jirusalemlo duuna RUUTUM ke runggu delo agér gérbi momato, idokom bulu siiyé líkmanam ettíngem buluke bíro kídarlo dobosuto.

¹⁰Bí Topheth emnam Ben Hinnom Yiibelo duuna demteng líípakbila, uyu Molekke mepomlo, lekoteng agí ome-oo kídíem uyu amínpe romka sulíkkan yimadope ito.

¹¹Bí RUUTUM ke Kumkeng Ekum lokke angko luuyablo Judahlok roja kídíke doonyi uyuke amínpe guré rínbinam takamem laapaktoku. Sikesim luuyab ampenglo Nathan Melekh emnam migomlok pírtek ampenglo medungai. Delokke bí Doonyi uyu kepe tolíknam guré-gaari menam kídí emteng rompakto.

¹²Bí Ahajke teyong pírtek ekaplo Judah rojalok molíknam runggu, delokke Manassehke RUUTUM ke Kumkeng Ekum gíídang annyi delo molíknam runggu demteng laapakto. Bí dekedem laala petmík pala, pemuk kídídem Kidron Yiibelo elpakto.

¹³Rojade Jirusalem sanggo danlo duuna kedonko kumpom lok ila sokkodanlo, Israel roja Solomon ke Sidon kídíke belumrunam uyu mime Astarte, Moab kídíke belumrunam uyu Khemosh, delokke Ammon kídíke belumrunam uyu Milkom bulum kumsuko Olib Díítum [4] loope líípakbito.

¹⁴Josiahbí buluke líídung gaang kídíem, Asherah gaangem paletla dem among dem tani alonglok tíkapto.

¹⁵Israel kídíem paab agér imona Nebatke oo Jeroboamke Bethello píbonam runggu delokke kedonna kumsu supom kídíemkom Josiah bénpakto. Bí kedonko kumsu supom kídí emlang Asherah gaangem pemukpe tupmíkla emeepe rompakto.

¹⁶Delo Josiahbí kanggong suname díítum teyonglo bí ago kídíem kaapaala, delok along kídíem laalenla runggue deeyimadope, RUUTUM ke ullíknam kaaluna amilo, sikesim kerang pekai porung bitonam kísape romlíkto.

¹⁷Rojade íngkíto, “De sékoke agoei?” Delo luune delok ami kídíe poyansuto, “Judahlok aala, nokke siloke Bethel lok runggu kídíem inam kídísim iyé emla, potosubina Shédíke amilok agoe.”

¹⁸“Dem dekepe doomoto,” emla bí ukumto, “Bík alongem séko meteng ikup-silat momapeka.” Dekepeila bulu bík along kídí emla Samari lok aana kaaluna kídíke alongem ukkímape meto.

¹⁹Bethello inampak kísape, Josiahbí RUUTUM me marmona Israel roja kídíke Samari luunelo molíknam kedonko kumsu supom, delokke runggu kídíem líípakbito.

²⁰Josiah kedonko kumsu supom lokke miri kídíem runggulo paka líkpala, tani along kídíem runggu delo romlíkto. Delokrongem bí Jirusalemlo aalat sutoku.

²¹Rojade ami kídíem sikepe ukumto, “Daapong kitablo atnam kísape RUUTUM noluke Shédí ke Gíbong gíídíem nolu loodum bomlangka.”

²²Kebang ruutum kídí yédo delokke ila, Israelem yégebona roja kídí demangkom Judah em yégebona roja kídí deloope Gíbong gíídíem loodum yimato.

²³Idola takying kolang dítak píínyinape Josiahke yédo delo sim Gíbong gíídí sim Jirusalemlo RUUTUM keloope loodumto.

²⁴Sok teyolote Josiah uyu luposuna, uyu ekumlo kumsunam uyu delokke abíd belumnam uyu mimang, Judahlo delokke Jirusalemlo duuna kídíem laapakyinto. Sike sim bí Hilkiah mirike kaapang kunam ayon kitab delo atnam kídíem ipíng dope emla ito.

²⁵Sok kerape, delokke méélampe Josiah kísa ingkona rojekom RUUTUM kíng aidlok, aapílok, delokke ralnamlok Mosike ayonlo pokampe yélat sukuna kamang.

²⁶Sikepe ilateng Manassehke imarlok RUUTUM ke Judah teyolo marname ansing yimape ito.

²⁷Depeila RUUTUM pokai, “Ngo Israel kídíem kape kísa ipaktodí depe Judah kídíemkom ipak pakyinyé, delokke ngo ngokke tonam Jirusalem, delokke ngome so kumsupe aido emko Kumkeng Ekum, emkom ngo mepakyé.”

²⁸Josiah ke abíd-abíd legang, bí ingkoko itodí, dem takam Judah lok roja kídílok yégang-daggang atkumko kitablo atmanía?

²⁹Josiahke rojape idungem Ijiptlok roja Pharaoh Neko bí Euphrates korong bedalo Assiria rojaem igulpe maglíng ento. Josiah roja bím mimak magrík supe emla ento, idola Neko bím mimak ila delo Megiddo among delo Josiahme petto.

³⁰Josiahke simangdem bík béérang kídíe guré-gaarilok Megiddo lokke Jirusalemlo gelangkula, bík agí agolo yutoku. Delokke among delok ami kídíe Josiahke oo Jehoahajme kumla tél molla bík abu ayanpe rojape imoto.

³¹Jehoahaj ke roja ido delo bík dítage takying annyi kolang tagumdo, delokke bí Jirusalemlo poolo angumko rojape ito. Bík ane amíne Hamutal, bí Libnah luunelok Jeremiahke ome.

³²Bí bík buku kídarlok inam kísape, RUUTUM ke kaabamape yéto.

³³Bím Jirusalemlo rojape ilayimadope, Pharaoh Neko bí Hamath lokke Riblah emnam delo ikolilok ééla meto, delokke Judah em 3400 kilogram ko baldínlok, delokke 34 kilogram ko uunlok kajanang bidope ukumto.

³⁴Pharaoh Neko Josiahke oo Eliakim me bík abu Josiahke ayanpe rojape imogeyéla Eliakimke amínem Jehoiakim emla míntoku. Idola bí Jehoahaj me laala Ijipt amonglo enbo langkula Jehoahaj delo silíkkai.

³⁵Jehoiakim bí Pharaoh Nekoke konampe baldín, uun kídíem bidungai. Sim bigape bí among delok kajanang ulla baldín, uun kídíem ami kídílok buluke bibangpe laadungai.

³⁶Jehoiakim takying annyi kolang tagngo nanalo roja ito, delokke dítak íying kolang taktelko Jirusalemlo rojape ito. Bík anelok amíne Jebidah, bí Rumah luunelo duuna Pedaiahke ome.

³⁷Bí bík abu kídí yékampe RUUTUM ke kaabamape yéto.