Read Alladian 2 ROJA KÍDÍ 24 Bible Online

2 ROJA KÍDÍ 24 - Alladian bible

2 ROJA KÍDÍ 24

¹Jehoiakimke roja yédudelo Babilonlok roja Nebukadnejjar mimakpe aabomla dítak angumko Jehoiakim bí Nebukadnejjarke rumkílo yéto. Idola méélamdem bí aapíe angu langkula Nebukadnejjarme mirolpe imín sutoku.

²RUUTUM bí Babilon, Siria, Moab, delokke Ammon maglíngem melíkla, RUUTUM ke kerapekai bík béérang kaalu miri kídílok poto subinampe, Judah amonglo rulgong moto.

³Sike takam si berokrupe RUUTUM ke ukumlok Judah ami kídíem bík keranglok laapak dope iname, kapeila Manasseh bí ami kídíem paab ibola,

⁴ami dengena kídílok yilíng biimoto. Bí ami deena kídílok yilíngem Jirusalemlo biimonam legape RUUTUM bí dem maab lamape ikai.

⁵Jehoiakim ke roja yédo delok abíd-abíd legangem, bík inam kídí takamem Judahlok roja kídí legang atkumko kitablo atkum manía?

⁶Jehoiakimke sirongem bík oo Jehoiashin, bím rojape yétítkai.

⁷Ijipt rojade bík among delok lekoda maglíngpe gílen yimato, kapeila Babilon roje bík amongem Ijiptlok Wadilok ila Euphrates korong loope langkutto.

⁸Rojape ilendo delo Jehoiashin ke dítage takying kolang dítak píínyido, delokke bí Jirusalemlo poolo angumko rojape ito. Bík anelok amíne Nehushta, bí Jirusalemlo duuna Elnathanke ome.

⁹Bík abu lok yérukpe bíkom RUUTUM ke kangkolo aimape yéto.

¹⁰Bíkke rojape yédo delo Babilon roja Nebukadnejjar ke béérang kídíe Jirusalemem aabomla rotkamto.

¹¹Béérang kídíke rotkam bomdu dem Nebukadnejjar bí luune delo aato.

¹²Judahlok roja Jehoiashin, bík ane, bík oo kídíe, bík tomlík-luang ibina kídí, bík rumkílo kénna ami duuna kídí, delokke bík migom kídí takame Nebukadnejjar ke rumkínglo duupe agíe tolíksuto. Nebukadnejjar rojake dítak píínyinape yédo delo Jehoiashinme patek umla,

¹³RUUTUM ke porungnam kísa Nebukadnejjar Kumkeng Ekumlok murkong, roja ekumlo mekumnam murkong, delokke Israel roja Solomonke Kumkeng Ekum legape uunlok píla mekumnam takamem bomyintoku.

¹⁴Delokke bí Jirusalemlok migom kídíem, mimak ina ami kídí, delokke mistri takamem idumsula midum éjar íying ko umnyok bomtoku. Among delok opan yalum ami kídí petome dungkai.

¹⁵Nebukadnejjar bí Jehoiashinme umla Babilonlo bomtoku. Bí Jehoiashinke ane, bík méng kídí, migom kídí delokke miro kídí emteng Jirusalem lokke Babilonpe enbotoku.

¹⁶Babilon rojade éjar kínídko mimak ijiina sipaying kídíem, éjarko agér gérjina mistriem Jirusalem lokke Babilonpe enbotoku.

¹⁷Bí Jehoiashinke apang Mattaniahme rojape imoto, delokke bík amínem Jedekiah emla mínbuktoku.

¹⁸Jedekiahke rojape ido delo bík dítage takying annyi kolang taktelko ido. Bí Jirusalemlo takying kolang taktelko rojape yéto. Bík ane amíne Hamutal. Bí Libnahlo duuna Jeremiahke ome.

¹⁹Jedekiah rojakom bík abu Jehoiakimke akampe RUUTUM ke keralo deemape yéto.

²⁰RUUTUM ke Jirusalem lolang Judah ami teyolo yagorupe marnam legape, bulum bík kangkolok monpakto.