Read Alladian 2 ROJA KÍDÍ 25 Bible Online

2 ROJA KÍDÍ 25 - Alladian bible

2 ROJA KÍDÍ 25

¹Delo Jedekiahbí Babilon rojaem ipéésula, Jedekiahke rojape ironge dítak konang kolang poolo íying nana delokke looying nana delo, Babilon roja Nebukadnejjar Jirusalemem maglíngpe aabomto. Bí doolung luune beyu delo notko ila yabgope kumgong sula,

²dítak íying kolang taktel loope Jedekiah rojake yédungem doolung luunedem kumgongnam yabgo aralo duumoto.

³Poolo appinana delokke longe konang nana delo doolung luune delo dírí kenode yagorupe ila atí dope-tíípenam kaimape ito.

⁴Delo luune yabgodem bénpakla yohdem rojade sipaying takamem lekope roja bagan ampengke yabgo annyi pénsamke luuyab delok dugnyok nyokyintoku. Babilon sipaying kídíe luunedem gargoola duuduai. Bulu Arabah danpe dugnyok geto.

⁵Idola Babilon sipaying kídíde roja Jedekiah me monmín gela Jeriko Yiibelo bím umtoku, delokke bík sipaying takame bím mepakla dugpit-dugyit gekai.

⁶Delo bulu rojadem Riblahlo Babilon roja kelo aabola, bík teyolo kebang ayonem luto.

⁷Jedekiahke oo kídarem bík agí amig keralo petbito. Delokrongem bulu bík amigem rongkut pala pitol ikolilok yééla Babilonpe enbotoku.

⁸Poolo pilngo nana lokke longe kínítnana delo, delokke Babilon roja Nebukadnejjarke dítak íying kolang dítak konang nana delo Nebujaradan emnam rojalok sipaying ruutumkone Jirusalemlo aato.

⁹Bí RUUTUM ke Kumkeng Ekumem, roja ekumem delokke ekum kumne takamem emepe rílíkto.

¹⁰Delokke roja sipaying ruutum delo gímín gena maglíngde Jirusalemem torgoona yabgo etor kídíem bénpakto.

¹¹Nebujaradan, doolung luune delo umngongnam ami kídí, agér ijiina kídí, delokke Babilon rojaem míípakna ami takamem umnyok bomtoku.

¹²Idola roja sipaying ruutumde opan yalumna ami kídíem onggur bagan emlang arík kídíem yébomdope melíkto.

¹³Babilon sipaying kídíde pitol gaangem, dakkeng kídíem, delokke Kumkeng Ekum delokke bottena pitol téngkiem demmíkpala Babilonpe getoku.

¹⁴Bulu Kumkeng Ekum delokke agér gérnana pitol ekurang takamem, peking kídíem, bélsa kídíem, sérak bottena kídíem, delokke egug kídíem bomyintoku.

¹⁵Roja sipaying ruutumde baldínlok pínam, delokke uunlok pínam mesing nyotkeng edung, delokke asi batkatkeng tiilat emteng bomtoku.

¹⁶Solomon rojake Kumkeng Ekum legape pitollok pímonam, gaang annyi, dakkeng kídí, botteruna téngkide yagorupe tebegla bekkíkan mato.

¹⁷Gaang kídíde takame mitar píínyipe kedone ila, attíng delo tulíknam pitol apíde 1:3 mitarpe kedone ido. Attínglo pírílna deme kamporupe dalim ayé kísa kaadope pitollok morí-mojokyintung.

¹⁸Sipaying ruutumde Seraiah emnam miri írne delokke bím nítmín gena miri Jephaniah delokke eyab sontori angum deme patek umla bomtoku.

¹⁹Doolung luune delo duuna abíd ami kídí aralok, mimak rudung-rutokbona ruutumdem, delokke luune delo duudo adana rojaem luyil-poyilna midum pilngoko umto. Sok teyolo sipaying maglíng lok atgebona, delokke luune delok midum íying akkéko umto.

²⁰Sipaying ruutum Nebujaradan dem umnam ami kídídem bomlangkula Riblahlo rojalo aabotoku.

²¹Hamath among Riblah delo rojade bulum demmola petpakto. Dekepe Judah kídíe agí among lokke luyulo ami rumkílo dungkai.

²²Babilon roja Nebukadnejjar bí Shaphan ke oten, delokke Ahikamke oo Gedaliahme Judah amonglo dungkít-dumítna ami kídíem gobonorpe yébodope lulíkto.

²³Edílo Judah lok sipaying ruutum kídíe lang buluke yébonam Babilon roja rumkílo tolíksumana sipaying kídíde, Babilon roje Gedaliahme gobonorpe bitung emla tattodí, bulu Mijpahlo Gedaliah kelo aato. Aana kídare: Nethaniah ke oo Ishmael, Kareahke oo Johanan, Nethophah among lok Tanhumeth ke oo Seraiah, delokke Maakah among lokke Jejaniah.

²⁴Gedaliah bulume pébisudola berokbito, “Babilonlok migom kídíem pesomapeka. Among so duulangka, delokke Babilon rojake agér anamem ibilangka, delo nolukíng takame aiyé.”

²⁵Idola delok dítak delokke poolo kínídnana delo, roja odong Elishama ke oten, delokke Nethaniahke oo Ishmael midum íyingko aabola Gedaliahme, delokke Mijpah lo bíkkíng duumín gena Jihudi, delokke Babilon ami kídíem petnyokto.

²⁶Dekepe ikolok Israel ami opan-mirempe takame sipaying migom kídílo lekope Babilon ami kídíem pesolok Ijipt amonglo dugnyokgeto.

²⁷Judah roja Jehoiashinke takying angum kolang dítak kínídnana delokke poolo íying kolang annyinana delokke longe looying annyi kolang kínídnana longe delo, Ebil-Merodakke Babilon rojape ido dítak delo, bí Jehoiashinme ayang lengkansula pateklok laalentoku.

²⁸Ebil-Merodak ai-remelpe bím luposudola, Babilon delo bíkkíng duumín gena roja abíd empemílo kedon yana dungko palenglo duumoto.

²⁹Depeila Jehoiashin bík patek leemo kídíem pítbínsuto. Delokke bík méélam yénamdem roja tébullo agínpe lekope duubo sudola dobo-tííbosuto.

³⁰Rojade Jehoiashinke turdung tetengem longe korsa míínamem loodíke bidungai.