Read Alladian 2 ROJA KÍDÍ 3 Bible Online

2 ROJA KÍDÍ 3 - Alladian bible

2 ROJA KÍDÍ 3

¹Judahlok roja Jehoshaphatke dítak íying kolang dítak píínyiko rojape ido delo Ahabke oo Joram bí Israel kídíke rojape Samarilo ito. Bí dítak takying kolang dítak annyiko roja doto.

²Bí RUUTUM ke kangkolo atímape yéto. Idokom bík ane-abu kísa rorímang. Bík abulok elínglok pínam Baal uyuke mimang dem bí joopakto.

³Idola Nebatke oo Jeroboamke Israel opínem yémem bola paab inamdem Joram bí lekoda imem memtíla yéboto. Edíloteng bí míílat sukumang.

⁴Moab kídíke roja Mesha bí mér bomdungai. Bí 100,000 ko Israel rojaem mérem, delokke 100,000 mér lokke amídem kajanangpe bidungai.

⁵Idokom Ahab rojake sirongem Moab kídíe Israel kídíke mirolpe irepkai.

⁶Depeila Joram rojabí Samarilok enlenla Israel ami kídíem ponomgoto.

⁷Bí Judah lokke roja Jehoshaphat kíng amiko melíkla sikepe pomoto, “Moab lokke roje ngom mirolpe irepdung. Moab kídíem ngok mimak magkolo no ngom igul mayénía?” Delo Judahlok rojade poyansuto, “Ngo nom mimaklo gígulyé. Ngolang no atele, ngok ami kídí si nok ami kídíe, ngok guré kídísi nok guré kídíe.

⁸Ingko bedang lok maglíngem aabom míloi?” emla bí íngkíto. “Edom emnam yépol mooruk lok aabomlape,” emla Joram bí poyansuto.

⁹Delo Israel rojade Judah roja emlang Edomlok rojem enbosula enlento. Longe kínídko entírongem maglíng, delokke buluke enbonam taro kídíem asie pínkai.

¹⁰Kapei emla mandola Israel rojade pokai, “RUUTUM bí ngolum roja angumem Moab alaglo bipe emlaya laadum sutune?”

¹¹Delo Jehoshaphat bí íngkíto, “RUUTUM ke kaaluna miriko kamanía? Ngolu bím RUUTUM ke míínamem tatkímodope.” Israel roja rumkílo migompe yéna kone luyansula lukai, “Shaphat ke oo Elisha bí sina yédune, bí Elijahke alaglo asi pílík dungai.”

¹²Jehoshaphat pokai, “RUUTUM ke agome bíkkíng kadung.” Depeila Israel roja Jehoshaphat, delokke Edomlok roje Elishame kaarík sula luposupe oyikai.

¹³Elisha bí Israel kídíke rojaem poto, “Noluke aralo ngo ingkokoda ibosulayén? Noluke buku-neku kídíke kaalunalo gítola.” Israel rojade poyansuto, “Ma, kapeila RUUTUM bímin ngolum angumem Moab alaglo bipe emla laadum sutune.”

¹⁴Delo Elisha pokai, “Ngo RUUTUM ke agérem gérbinape idola, RUUTUM ke duudung tetedem berokrupe lubidung, Judah lokke roja Jehoshaphatme míngge mamílo, nolum ngo kaasu pekom mayé.

¹⁵Idola supak ngom tapung batjinako tombi.” Edílo amide tapung dem batlentodí, delo RUUTUM ke alage Elisha kíng píngkai.

¹⁶Delo Elishabí pokai, “RUUTUM bí sikepe podung, ‘Sim kobung sim jikong-jirongpe iyinmoyé.’

¹⁷Kapeila RUUTUM bí podung, ‘Nolu pedong-asar kaapamayé, idola jikong-jirong kídare asipe bíísétyé. Delo nolu lang noluke bomnam taro kídíe asi tíípayé.’

¹⁸RUUTUMke kangkolo si iporunamko. Bí Moab emkom noluke alaglo biyé.

¹⁹Nolu líísak lok pínam yapgo kídíem benpakla doolung kídíem aabomyé. Nolu gairuna esing sine kídíem tengkutyé. Delokke asi sirung kídíem ooyinmoyé, delokke ali-ayé arík kídíem dabulok gekyakyé.”

²⁰Roh kondem ipak idí delo Edom danlok asie bingang kai. Among takamde asipe bíngkai.

²¹Roja kídíe mimak ipe aadung emla Moab ami kídíe edílo tattodí, mijing-koope mimak ibeena takamem tomdumsula rísu delo dumsukai.

²²Bulu roh dem edílo doonyi asire asi delo latka todí, delo Moab kídíke notko delo duula kaaname bedang rotkon delo asie iyyi kísa yalíngdo.

²³Delo bulu pokai, “Esi iyyieke, bulu depekom pamín sutunama, Moab kídía! Bénabomla buluke notkoem líílaju.”

²⁴Idola edílo Moab kídíde Israel notkolo aabomtodí, Israel kídíe darepla mimak imín sula Moab kídídem montoku. Israel kídíe maglíngpe aabomla Moab ami kídídem petpak pakyinto.

²⁵Bulu doolung kídíem líípak geyéla mipile aríklok ali-ayé kídí emteng dabulok gekyakto. Bulu sirung asi kídíem pootumla, aina esing sine kídíem teeyinto. Méélam yalumpe képitél luune Kir-Hareseth petomde idíng kímanampe dongkai. Idola lakpon bomna maglíngko demteng aabomla ikumto.

²⁶Edílo Moab rojade bím ikumdak emla ansukadí, delo língko kínídko yoksa bomna amilok ulla Edom rojake retak danlok dugnyokpem ikíto. Idokom bulu ilamato.

²⁷Delo bí bík obíng oo, rojape yétítpena dem doolung luyab delo buluke uyu ruutum kíng kumsudola romnam amanpe petlíkto. Dem kaala Israel kídíe yagorupe martík geyéla agí amongpe ensutoku.