Read Alladian 2 ROJA KÍDÍ 4 Bible Online

2 ROJA KÍDÍ 4 - Alladian bible

2 ROJA KÍDÍ 4

¹Kaaluna kídíke yébosunam lokke mimekone Elishame jérla pokai, “Nok béérangpe ituana ngok miloe sikai. Bí RUUTUM me míngkesula agér inakuai emla no kéndung. Bík ajéng geko ami si supak ngok oo annyiem abílpe bomkupe ibomdung.”

²Elisha poyansukai, “Ngo kape kísa nom igulyén? No ingko ekurang eeke ekumlo kadune dem ngom pobisutola.” “Nok béérang si aména tél peking petomko kadung,” emla mimede poto.

³Delo Elisha, “Nok kumrí kídílo gígoola tél píkeng pekinglok kokumtoka. Bojéko kokum langka.

⁴Delo ekum aralo aado langkula eyabem sittum sulangka. No lang oo annyide ekum aralo duula, kilíng kídí delo tél pílík langka. Bíísétna kilíng kídarem mengu sulangka,” emla lulígto.

⁵Dekepeila, bí Elisha kelok gílangkula, kilínglok kokumpala oo annyidem ekum aralo aabo pala eyabem sittumto. Delo bí kilíng kídídem tél pílíkto.

⁶Kilíng takamem píbíng rongem, bí kilíng araana matato. Delo bík oo konde, “Kiilíng araana kaimang,” emla lukai. Delo tél deteng biilen yimangkai.

⁷Delo mimede Elishame pokantoku. Elishabí pokai, “Demílo tél kídardem kopala ajéngem dorna tokula. Dorngatko kayémílo no lang nok oo annyide donam-tíínampe ilado.”

⁸Longe konem Elisha bí Shunemlo gíto. Delo miremna mimeko duudungai. Bí Elishame dobo tomto. Depe irongem edí-edílodí Elisha en-go todín delo dongkeng dungai.

⁹Mimede bík milodem pokai, “Ngo kéndung, ngolukíng dooyarna ami si RUUTUM ke deena amiko.

¹⁰Kumbang telo pírtekko píbila, delo ipkeng kyareko, tébulko, palengko, delokke meruko melík bilaju. Delo bí ngolukíng enpatyém dongkedope.”

¹¹Longeko Elisha aala bík teyong pírteklo ketduem,

¹²bí Gehaji emnam bík béérang dem lulíkla Shunem mimedem tommoto. Delo Shunem anede Elishake keralo dagato.

¹³Delo Elisha bík béérang dem pokai, “No bím polangka, ‘No ngoluke legape adír paadung. Nok legape kape ibimíloi? Nok legape rojem demamílo sipaying ruutum kídíem ngolu lupo subipía?’ ” Shunem lok mimede bím poyansuto, “Ngo ngokke agí ami duupomlo aisudung.”

¹⁴Delo Elisha Gehajime íngkíto, “Demílo bík legape ingkoko ibimíloi?” Gehaji poyansuto, “Bí oo kamang, delokke bík milo si mijingkai.”

¹⁵Elisha pokai, “Bím tompo tokaku.” Delo Gehaji bí Shunem mimedem tomtoku. Bík lamgé delo dagadodem,

¹⁶“Lunnyingke siro-meyum kísalo, no oo ko oyé,” emla Elisha bí pokai. “E Shédíke amia, nok béérang sime yadmapeka,” emla mimede pokai.

¹⁷Idola Elishake ponam pakpe oo ko gela dítak goorík aadoku delo oo ko oto.

¹⁸Koode sisala longe konem, bík abuke aam gatna ami kídíem yébola yékolo enmín geto.

¹⁹Delo bí abudem poto, “Ngok dumpong si yagorupe kidung!” Delo abude béérang konem lulígla koo dem anelo bolík motoku.

²⁰Longe raadang deloope koode ane keranglo duuto. Delokrodem koo de sikai.

²¹Koo delok simang dem mimede Elishake legape pírngu subinam pírtek delo saala ippu delo ketmoto. Delo bí gílen langku langaala eyab em sittum pala gínyotoku.

²²Delo mimede bík milo dem tomla poto, “Ngo RUUTUM ke ami delo gíla kaarík supala menape aalat sudokupe, ngom gado kolang béérangko lulíg bitoka.”

²³“No kapeda poolo karsingmang, delokke apéédí longe mape bíkkíng gíyén?” emla milode íngkíto. “Deke madokom ngo gíyérung,” emla mimede poyansuto.

²⁴Gado lamku delo duupu ilík pala mimede béérang dem poto, “No ngok luyamang tetengem, ngok legape eetetmape entí bolangka.”

²⁵Dekepe enlenla RUUTUM ke ami Elisha ke dungko Karmel adi delo pííto. Edílo Elisha mimedem mootepe kaatodín, delo bí bík béérang dem tomla poto, “Kaatola Shunem mimede aadak.

²⁶Menape dugla, bím kaarík dola, ‘Kape no aidun? Nok miloe aidun? Nok oo de aidun?’ emla ingkítoka.” Delo ingkíduem “Takame aidung,” emla mimede poyansuto.

²⁷Edílo mimede Elishake dungko adi delo píítodín delo bí Elisha ke alem jumto. Gehaji bím nínggépe aadodelo, Elisha poto, “Bím asoope melíkto. Bí ankí-kíbong aloodung. Idola RUUTUM ngom pokanmape kape supkane?”

²⁸“Ngo nom oko kotonía? Ngom yagope míínam sumomapeka emla ngo nom pomanía?” emla mimede Elishame poto.

²⁹Elisha Gehajime poto, “Nok galuk dem nok uug delo péllíksusa pala ngok banggénem alaglo bomla dukkala. Bedanglo ami kaarík suyémílo luposumapeka. Amie lupoyémílo poyan sumapeka. Koo mikmo delo ngok banggénem leelík langka.”

³⁰Idola mimede pokai, “RUUTUM keela nok turnam lok pésudung, ngo nom gínyo kumayé.”

³¹Dekepeila bí gerepla mime delo gímín getoku. Gehaji gígela koo sina delok mikmo teyong delo banggénem leelíkto, idola deloteng koode adud-ayud kamang, delokke turkumato. Depeila Gehaji duklat sulangkula kooe darkumang emla Elishame pokantoku.

³²Elishake ekum delo píídodem koode pírtek delo sila dodo.

³³Bí aralo aala eyab annyi demkai sittum supala RUUTUM me kumsuto.

³⁴Delo koo nappanglo, amiglo, delokke alaglo agí nappangem, amigem delokke alagem irík sudola yamtar líktoname koo delok amílde iigang lenkaku.

³⁵Elisha dagrep langkula pírtek arang delo gíkup-gílat sula ipala ippu delo géngang langkula lekoteng koo simang delo yamtarla koo dem bumjém rongkuem koode lemkínídko aksik sikpala amige darkaku.

³⁶Elisha Gehajime gogla koo delok anedem tommoto. Edílo Shunem mimede aatodí delo bí pokai, “Nok koo sim laato langku.”

³⁷Delo Shunem mimede aralo aala lebíng-kooníla amonglo pela dola kumsuto. Delo bí koo dem bola gítoku.

³⁸Elisha Gilgal amonglo enlat sudokuem delo among delo dírí-kenoe ikai. Kaaluna miri kídíe bím kaaríksula duubosuduem bí bík béérang dem políkto, “Peking bottena delo domílok kaaluna miri lok oo kídarem keebito.”

³⁹Buluke lok akone aríklo gíla neyang kusére matala, moonam onggur eke paato. Bí ayoko agí kanalok pílla bík galuk delo bíínako getoku. Bí aalangkula dekedem pamík geyéla peking delo keemíkto. Dekedem sékote kangkénna kamato.

⁴⁰Nyurongem tublenla dobosupe idolo dokípala bulu, “Díkneke, Shédíke amia! Peking so keenam kídí si díkka peneke,” emla ulo gogto. Bulu dem domape meto.

⁴¹Delo Elisha ettínglok laamopala dem peking delo toolík dola bí pokai, “Ami kídíem dodope sim ortoka.” Dem bulu aipe doto.

⁴²Baal Shalishah emnam amiko min-geyalumna anyadlok inam, pamnam ettíng íying annyi kolang min-geyalumna ambenglok gatla Elishame bomang bito. “Sike sime, ami kídísim dodope bito,” emla Elisha pokai.

⁴³Delo bík béérangde pokane, “Ngo sim anyongo sim kape kísa ami língko sim domoyén!” Idola Elisha poyansuto, “Sime ami kídí sim dodope bitorung, kapeila RUUTUM bí lubitung, ‘Bulu dolate doyinmayé.’”

⁴⁴Delo bí buluke keralo dodope melíkto. RUUTUMke lubinam kísa bulu takame dolateng doyinmang.