Read Alladian 2 ROJA KÍDÍ 5 Bible Online

2 ROJA KÍDÍ 5 - Alladian bible

2 ROJA KÍDÍ 5

¹Delo Naaman bí Siria rojake sipaying ruutumpe ito. Bíkkíng Siria roje agér takamlo míídasudungai. Delokke bí ami takamke míídasukenge. Kapeila bíkkelomin RUUTUM bí ralnamem bila Siria em ikum motone. Bí arorupe miram runakuai, idola bí tííd genako.

²Leko Siria lokke sipaying opééko gíla Israelem mimak ikolok, mimum kooko umla bomatoku. Dem mimumdem Naamanke méng delo bím agér ibidope lulíkto.

³Delo bí Naamanke méng dem poto, “Ngok ruutum bí letelko Samari amonglo duuna kaaluna miri elo enla kaarík sukíduamílo bík tííd kinam si aiyékuai.”

⁴Dem tatla Naaman, roja delo gíla Israel mimumlok ponam takamdem pokanto.

⁵Delo rojade Naamanme poyansuto, “No depe-epe idokom enkí kala. Ngo Israel rojalo nok legape shitiko atlíkyé.” Delo Naaman baldínem 340 kilogramko, uunem 70 kilogramko delokke ege-galugem íying annyiko gela Israelpe ento.

⁶Bí rojalok bilíknam Israel rojaem bipenam shiti demteng geto. Shiti delo sikepe atpa, “Sok shiti sok ngo ngok béérang Naamanme bík tííd kinam sim no mopít bidokupe nokkíng melíkdung.”

⁷Edílo Israel rojade shitidem ritodí, delo bí agí lukdordem puké-puyésula yagorupe marla sikepe pokai, “Ngo Shédía? Ngo taroko petpala iturlayékunía? Si amisi kapeda tííd gena ami sim ipít dokupe ngokkíng ami melík dune? Kaatola, kape kísa bí piyyang leríngem igugdun?”

⁸Edílo Elisha Israel rojalok agí lukdorem bétké-béyyé sunamem tattodí, delo bí Israel rojadem sikepe políkto, “Kapeda no agí lukdorem bétsudune? Amidem ngokkíng lulík topena delomin bí Israel amonglo kaaluna miri ami kadung emla kényéne.”

⁹Delo Naaman guré kídí lokla guré-gaarilok enla Elishake ekum gíída delo oito.

¹⁰Delo Elisha amiko tomlíkla, Naamanme sikepe pomoto, “Jordan asilo gíla lemkíníd ko írsu langka, delo nok amílde deeyéku, delokke nok kinamde aiyéku.”

¹¹Idola Naaman yagorupe marla gídokula sikepe emto, “Bí agíe gílenla ngok agéplo dagla RUUTUM bíkke Shédíke amínlok alage meyaabla ngok tííd sim mopít yéku emla ngo míítuai.

¹²Abana, Pharpar, delokke Damaskaslok korong kídíe Israel korong kídíem aiyamanía? Ngo eke elo ursula deelang kumanía?” Dekepe empala bí marla enkartoku.

¹³Delo bíkke béérang kídíe bíkkíng aala poto, “Ngoluke abua! Kaalu miri Elisha bí nom bottena agérko lulíg domílo no imadonía? Dekemílo no asilo ursulangka emla bík ponamdem ila, mopít sukunam dem kapeda iman?”

¹⁴Delo Naaman gíla Jordan asilo lemkínídko Elisha ke pokampe jilum rongem bík asig-ayo kídíe yaamé koo kísape pelam kaku.

¹⁵Delo Naaman bík ami takamem gíbola Elisha kíng aala sikepe poto, “Supak lokke Israel petomlo Shédí kadung, abídlo kamang emla ngo kénbengkai. Depeila ngok aman gebinam sim no ayala laarík sutoika.”

¹⁶Delo Elisha poyansuto, “Ngok agér gérbinam turna RUUTUM keelok pésudung, ngo ingko kokom lamayé.” Naaman laadorupe rogu gugap lateng bík amandem Elisha bí laamato.

¹⁷Naaman Elisha me poto, “No aman sim laapemamílo, ngom gado aména annyi sok getengko kédénglok gurla gemokui, kapeila nokke béérang si RUUTUM ke kékonlo ingkona uyu emkom romnam aman biyimayé.

¹⁸Idola RUUTUM bí, bík béérang sim legang atel sok legape maab bidaklangka. Edílo ngok ruutume Rimmon uyume kumsukeng ekumlo aala kumsupe iyém, bí ngok alaglo tapda sudung, delo ngote gubmíndung, sok legape RUUTUM ngom maab langka.”

¹⁹“Aapíe míípodola enkalangku,” emla Elisha bí poto. Naamanke anyong oolko endokuem,

²⁰Elishake béérang Gehaji bí sikepe bík aapílo míísuto, “Ngok ruutum bí Siria ami Naamanme asamrupe melíktoku. Ngo turna RUUTUM ke amínlok berokpe monmín gela atíko laalen ruyé.”

²¹Gehaji Naamanme monmín geto. Naaman bí kangkut suname Gehaji monmín gedung. Dem kaala Naaman guré-gaari delok oila, bím kaarík sudola, “Kape takame aidunía?” emla íngkíto.

²²“Takame aidung,” emla Gehaji poyan sudola pokane, “Ngok ruutum ngom lulíkdung, ‘Ephraim amonglok kaaluna yaamé annyiko supak pak píídung. Bínyim baldín nogdi lok 3000 ko delokke gíídí ege-galuk lok bínyim annyi asak bidope bilangka.’ ”

²³“No ayasula 6000 ko baldín nokdi lok laabilangka,” emla Naaman bí poyansuto. Bí emgapla, nyogon annyi kolo 6000 baldín nokdi demlang gíídí ege-galuk kídídem bík béérang annyikolo gelík bidokupe joolíkla, bínyi Gehajike kerangpe en-getoku.

²⁴Edílo bulu díítum delo píítokudín, delo Gehaji ekurang dem bínyi keelok laala, agí ekumlo mepala béérang annyi dem enmotoku.

²⁵Delo bí bík ruutum Elishake ampelo dagatoku, “Gehaji no ingkolo yétokan?” emla Elisha íngkíto. “Nok béérang ngo ingko loteng gímang,” emla bí poyansuto.

²⁶Idola Elisha bím poto, “Ami delokke guré-gaarilok oila nom kaarík sudodelo ngok aide nokkíng yémín manía? Supak abal, ege-galuk olib tél, onggur arík, mér sobén, mime béérang, milokong béérang em amanpe laadía?

²⁷Dekepeila, Naamanke tííd kiname nokkíng lang nok oten ome-oolo kayaryé.” Delo Gehaji Elishake keranglok gínyok getoku. Delokke ila bík amíl takame tapam kísa, tíídpe yabyak lenkai.