Read Alladian 2 ROJA KÍDÍ 6 Bible Online

2 ROJA KÍDÍ 6 - Alladian bible

2 ROJA KÍDÍ 6

¹Kaaluna miri yébosuna kídíde Elishame pokai, “Kaatola, ngoluke duubo sukesi tapét aloodung.

²Ngolume Jordan belo gíla, mipile gaang asak pala ngoluke duupekoko erong dope modokupe enmoyika.” Delo bí poyansuto, “Aiyé, enbo sulangka.”

³Bulu kelok akonde Elishame enmín gedope emgapla, bí tolíkla,

⁴lekope enbosuto. Bulu Jordanlo pííla ekum esing-tarípe esing teeto.

⁵Dekepe buluke esing teeduk dungem akonlok arem egínge asilo olíkkai. Delo amide, “Ah ngok ruutume, egíng si ami lok koponam kuama,” emla manto.

⁶Delo Shédíke amide íngkíto, “Ingko paklo olíkkan?” Delo olíkko dem sutkan líktoname Elisha esing aagko pala olíkko delo ellík toname arem egíng dem asi teyolo pungon dope ito.

⁷“Laato langku,” emla bí poto. Delo amide egíng dem laatoku.

⁸Sirialok rojade Israel rojadem mimak imín sudukdo. Doolung yége bona migom kídíem duubosula lupo poyin bosupala Siria rojade pokai, “Ngo ngok notkoem delo dekena amonglo ilíkyé.”

⁹Delo Elisha bí Israel rojadem pokanmoto, “Ansulangka, delo among kídí delo gígong mapeka, kapeila Siria lok ami kídíe delo mimak notko ilíkyé.”

¹⁰Depeila Israel rojade Elishake lubinam among kídídem kangkup-kaalat bommoto. Elisha bí rojadem ankup-anlat bomtídope poyilla irum bojéko mopítto.

¹¹Sikepe inamsi Siria rojadem yagorupe marmoto. Bí migom kídíem tomdumsula íngkíto, “Sékopak ngoluke arang sok Israel roja danpe aapí gena si, nolu ngom pobimayénía?”

¹²“Ngoluke roja ruutuma, ngolu sékokom Israel danpe aapí gena kamang. Idola Israello duuna Elisha min nokke ipko pírteklo ponam agom takam emteng Israel rojaem poyin bidung kune,” emla akonde pokai.

¹³Delo rojade poto, “Nolu menape gíla bík dungkoem tattatoka, delo ami melíkla bíme umdope.” Elisha bí Dothanlo duudung emla pokantoku.

¹⁴Delo bí guré maglíng delokke guré-gaariem Elishame umdope melíkto. Bulu kaamo yohlo Elisha ke dungko doolungdem gargo bomto.

¹⁵Roh rokom dem Elisha ke béérang de luuyulo lenla kanggong suname deddína Siria maglíngem guré, delokke guré-gaariem doolung dem gargong bomdupe kaato. Delo bí poto, “E, ngok ruutum ngolu kape iyén?”

¹⁶Bím Elisha poyansuto, “Pesomapeka, kapeila bulum pemílo bojéyanako ngolukíng yédung.”

¹⁷Delo Elisha kumsuto, “E RUUTUM, bím kaala dope mikdar molangka.” RUUTUM bí bík amigem kamoto. Delo bí kanggong suname bulum pakyape díítum delo sipaying guré, delokke emepe írna guré-gaari deddíne Elishame gargong dope kaato.

¹⁸Edílo Siria maglíngde toknín todín, delo Elisha bí kumsuto, “E RUUTUM, sim ami kídar sim mikmang motoika.” Delo Elisha ke kumkampe bí bulum mikmang moto.

¹⁹Dekepe ido delo Elisha bí bulum poto, “Si bedangmang, delokke doolungmang. Ngokkíng gímín getola, ngo nolum noluke matanam ami delo gílíkyé.” Bí bulum Samarilo gílíkto.

²⁰Buluk doolung aralo aarongem “RUUTUMA, bulum mikdar molangkuka,” emla kumsuto. Delo bulu amige darlangkula kanggong suname Samari amonglo bulu aalum tubong.

²¹Bulum kaala Israel rojade, “Poyilne, ngo bulum peyyin míloya?” emla Elisha me íngkíto.

²²Elisha poyansuto, “Bulume no petmapeka. Agíke ityi-epug, yoksa lok umnam emteng no petdunía? Bulum donam-tíínam melen bitoka. Dem bulu dopa-tíípala buluke ruutumlo enlat sudokupe.”

²³Delo bí bulum dobo-tííbola ito. Bulu doyin-tííyin pala enlat sukaku. Delok longe delok ila Siria ami kídíe edílokom Israel amongem maglíng aabom yimang.

²⁴Méélam delo Siria lok roja Ben-Hadad, bíkke deddína maglíngem melíkla Samari amongem mimakpe aabomla, amongdem langkamto.

²⁵Delo Samari among delo botteruna díírí-kenoe pííla, gado dumpong atelem baldín íying píínyi kilogram arepe koto. Perong tayé em [1] gram língko annyilo baldín pilngo nokdipe ito.

²⁶Israel rojade longe konem doolung etor kumgong teyodelok gídagem mime kone, “Ngom igultoika, e roja ruutum,” emla pokai.

²⁷Rojade poyansula poto, “RUUTUM bí nom igul marodem, nom ngo ingkolok igul layén? Gehu yikpom logía, ma onggur kétpom logía?”

²⁸Delo bí mimedem íngkíto, “Legangde ingkokoda?” Bí poyansukai, “Si mime si ngom, ‘Nokke oo dem silo ngolu keela dolape delo nyampo ngokke oo sim dolape,’

²⁹emkolok, ngolu ngokke uem keela doto. Silo bíkke uem keedope koname bíkke oo dem rumsuptung.”

³⁰Edílo rojade mime delok agomem tattodí, delo bí bík lukdorem yagorupe aapíe kila bétsuto. Doolung etor agéplok gína kídíde rojadem ankí egeme bík galug aralo pítgedope kaato.

³¹Bí pokai, “Shédí bí ngom, Shaphatke oo Elishake dumpongem longe gíyinmang adape silo teetumamílo, mokadaklangka.”

³²Delo Elisha bík ekum delo miro kídíem duubosula duudo. Rojade amiko metosulíkla idodem ami delok píímang adape Elisha miro kídardem sikepe poto, “Nolu kaamanía? Kape kísa si ami petnasi, ngok dumpongem patung dope amiko melíktune. Kaatola, edílo amide pííyédí eyabem sittum langka. Eyabem sittumla dakbom langka. Bík méélamde bíkke ruutumlok gídutmanía?”

³³Bíkke lupo podung adape rojade[2] bíkkíng píítok dola pokai, “Si adír si RUUTUMke biname. Kapeila ngo RUUTUM me kayang yatíyén?”