Read Alladian 2 ROJA KÍDÍ 7 Bible Online

2 ROJA KÍDÍ 7 - Alladian bible

2 ROJA KÍDÍ 7

¹Elisha poto, “RUUTUM ke agomem tattola. RUUTUM bí sikepe podung: Nyampo supak kísana moodílo ettíng kilogram angumem, demangkom anyat kilogram akkéem baldín nokdi atellok reyé.”

²Roja delok tapda sukeng migomde Elishame pokai, “RUUTUM bí teyong among lok kirki kídíem sayyadokom, sikepe ilayénía?” Elisha bí poyansuto, “No sim agí amiglok kaayé, idola no atí dopang mayé.”

³Doolung beyu luuyab delo tííd kina midum appiko duudungai. Bulu sikepe luposuto, “Ngolu sido loope kape so duutíyén?

⁴Doolung arang elo aalaju empene dírí kenoe, deloteng ngolu siyé. So duusulape empene soteng siyé. Depeila ngolu Siria notkolo gílaju. Bulu ayang kaapa suyémílo ngolu turyé. Bulu ayang mape petpak mílo ngolu siyé.”

⁵Kaamo-paang ríson delo bulu gerepla Siria ami kídí notkope ento. Notko ampeng delo píínín name, mitel koteng notko delo duumang.

⁶Kapeila RUUTUM bí Siria ami kídídem deddína guré-gaari, mimak guré, delokke maglíng aabomnam kísape adudko tatmoto. Delo bulu pobosuto, “Kaatola Israel rojae ngolum mimak magadope Hittit, delokke Ijipt roja kídíem relíktung.”

⁷Dekepe Siria ami kídíde pesolok buluke tombuem, guréem, gadoem delokke abíd-abíd ekurangem notko delo dekepe meyampala, rokom arsang delo agíem motursupe duknyo nyoyintoku.

⁸Tííd gena ami kídíde notko delo pííla tombu sonam kolo aato. Bulu dola-tííla ipala uun, baldín, ege-galuk kídíem bomlangkula rumsuptoku. Delo bulu tombu akon deloteng aala ekurang ayoko laala dekedemte rumsuptoku.

⁹Delo bulu pobosukai, “Ngoluke inam si ijiimang, siloke longe si aina longeko. Sim pokanmape ngolu duusup sugedung. Ngolu paangem duuyang mílo ngolukíng adíre pííyé. Kaju menape gíla roja ekum eranglo pobisulape.”

¹⁰Depeila bulu gíla luuyab dakbomna dem pobito, “Ngolu Siria kídí notkolo aatoname mitel koteng duurík sumang, ami adud-ayud kokom kamang. Guré, gado kídíem pakla, tombu kídíem depe mepala ennyo nyoyinkaku.”

¹¹Delo luuyab dakbomna amide gogying líktoname menape roja ekum deloteng legangem tatyinkai.

¹²Rojade yoh delo gerepla bík migom kídíem pokai, “Siria ami kídíe ngolum kape ibomdudín, dem ngo nolum poboyé. Ngolum kenoe pínbomdung emla bulu kéndung. Bulu gínyomílo ngolu buluke notkolo aayérung, delo ngoluke aayém ngolum bulu turdope umpe mííla doolung kídarlo runyok gedung.”

¹³Migom konde poyansuto, “Luune araso emum pekom ami kídar sim sikabona kísape kenoe pínkayé. Iname, ami lok ayoko guré duuna pilngo sim bomla, kape ikanai dem kéndope melík kílaju.”

¹⁴Delo bulu amieke ullenla guré-gaari annyikolo rojade bulum Siria sipaying kídíem kangkí-tatkídope melíkto. Bí gaari dukbona dem ukumto, “Gíla, kangkítoka.”

¹⁵Bulu Jordan loope monmín gela kaaname bedang ruubudem Siria ami kídíde buluke ege-galuk, ekuserangem dukdak langkula elpak pakyintung. Dem kaapala ami kídíde enlat sulangkula rojadem poyin bitoku.

¹⁶Ami kídíde Siria ami kídíke dugnyokunam notko delok ekuserangem laasitoku. RUUTUM ke ponam pakpe ettíng kilogram angum, demangkom anyat kilogram akkéem baldín nokdi atellok reyé emname apínglíkkai.

¹⁷Rojade Elishake ekum delo aaduem Elisha kape pobitodín, deke pakpe roja delok míída sukeng migom dem bí doolung luuyab ruutumpe lulígto. Delo bím ami kídíe tujém saayémla ikolok bí sikai.

¹⁸Kapeila roja dem Elisha sikepe porung bituai, “Nyampo supakke kísalo ettíng kilogram angum demangkom anyat kilogram akkéem baldín nokdi atelpe Samari luuyablo koyé.”

¹⁹Migomde Shédíke amidem potuai, “RUUTUM bí teyong telok kirkiem sayya líkdokom sikepe iyénía?” Delo Shédíke amide poyansuto, “No agí amiglok sike sim kaasuyé, idola no sim domayé.”

²⁰Si aropakpe ikai, bím ami kídíe luuyab delo tujém-tuyém kolok bí delo silíkkai.