Read Alladian 2 ROJA KÍDÍ 8 Bible Online

2 ROJA KÍDÍ 8 - Alladian bible

2 ROJA KÍDÍ 8

¹Delo Elishabí itur bikunam koo delok ane deme poto, “Erang takamem sok gílenbola ingko amonglo duubang yédí delo duupong tolangka, kapeila RUUTUM bí dítak kíníd kope dírí kenoem among so píímodope ukumkai.”

²Mimede Elishake pokampe erang takamem ennyokbola Philistain amonglo dítak kínídko duuto.

³Dítak kíníddem duuyin rongem bí enlat sulangkula roja delok agíke ekum among kídíem bidokupe rogupe gíto.

⁴Delopak rojade Gehaji emnam Elishake béérang dem luposudo. Rojade íngkíto, “Elishake irisinyo inam kídíem ngom pobika.”

⁵Gehaji bí rojadem kape kísa Elisha bí sina koo dem turmo tokudín delok legangem podungem delopak koo delok anede ekum arík legape roja delo rogula dagato. Gehaji poto, “Ngok ruutum roja, simoko de mimede, delokke sina Elishake iturkunam bík ue.”

⁶Rojade mimedem legangem íngkí kolok mimede legang takamem lukan bito. Delo rojade bík migom akonem mime delok legangem kaabi-tatbidope lulík geyéla sikepe poto, “Bík ato takamem bilat sulangkuka. Bíkke sok ennyokdak delok ila supak loope edítko bík amonglok murkong paanam kídí emkom bilat sulangkuka.”

⁷Elishake Damaskas endo delo Siria lok roja Ben-Hadad kido. Edílo rojadem Elishake delo píínamem pokantodí,

⁸delo rojade Hajaelme sikepe políkto, “Amanko bomla Shédíke amidem kaarík sutoka. Bíme RUUTUM me, ngo sok kinam sok aiyékudín ma aikumayédín deme íngkímoto.”

⁹Damaskas lok kampo yalumna, gaiyalumna ekurangeke uut simon íying appi getengko amanpe gela Hajael Elishame kaaríksupe gíto. Bí Elishake aníndelo aala poto, “Nok oo, Siria lok roja Ben-Hadad bí kinam lok aiyékun dem íngkídope ngom lulíktung.”

¹⁰Elisha poyansuto, “Gílangkula bím pobi tolangku, ‘No berok rupe aiyéku,’ emlangka. Idola bí siyérung emla RUUTUM bí ngom lengkantung.”

¹¹Delo bí Hajael me amige kemír yimape kaatí bomkolok Hajael annyinglok migmoe igepeko kaimato. Delo Shédíke amide kapkai.

¹²“Kape ngok ruutum no kapdune?” emla Hajael íngkíto. Bí poyan suto, “Kapeila Israel ami kídíem nok itung-irépenamem ngo kéndung. No língkum kumgong sula duuna luune kídíem eme rílíkyé; koo kídíem yoksalok payinyé; ojing kídíem amonglo gepetlíkla nganga gena mime kídíem akiiem joksalyé.”

¹³“Kape kísa nokke ekii kísana béérang si dekena agér iyén?” emla Hajael íngkíto. Elisha poyansuto, “RUUTUM bí ngom lengkandung, no Siria lokke rojape iyé.”

¹⁴Delo Hajael Elishame mepala bík ruutum rojadelo aatoku. Ben-Hadad bím íngkíto, “Elisha bí nom kape emdon?” Hajael poyan suto, “No berokpe aiyéku emdo.”

¹⁵Idola longe kondem bí ege bisamnako laala asilo pyompala roja delok mikmo delo egedem tamlumla mokato. Bík sirongem Hajael Siria lok rojape ikai.

¹⁶Israel roja Ahabke oo Joram bí dítak pilngonape rojape iduem Jehoshaphatke oo Jehoram Judahlok rojape ilento.

¹⁷Bík rojape ilen delo bí takying angum kolang taknyiduai. Delokke Jirusalemlok rojape dítak píínyiko yéto.

¹⁸Bí Israel roja kídí yénam kísapakpe yéla Ahabke erang ségupe yéto, kapeila bí Ahabke ome em méngpe bomto. RUUTUM ke kangkolo bí atírumape yéto. Idola RUUTUM bí agínpe bík béérang Dabidke legape Judah amongem nyokmo gotto.

¹⁹Dabidke odong delokke otíng-oyin kídíem agínpe angun dope meyaryé emla bí pébisutuai.

²⁰Jehoramke rojape idodelo Edom doolunge Judahlok mirolpe irepla roja dongu sukai.

²¹Depeila Jehoram bík guré-gaari kídíem enbola Jairlo ento. Delo Edom ami kídare bímlang bík sipaying kídíem gargongto, idola yohdem bí pétlen getoku. Bík sipaying kídare agí among danpe duglat suyin getoku.

²²Silo melope Edom kídíe Judah kídíem mirolpe imín sudung. Delo Libnah emnam among deteng mirolpe irepkai.

²³Jehoramke rojape ido lokke abíd-abíd legangem, bí ingkona agér eke ituadí dem takam Judah kídílok roja dooying atkumko kitablo atkum manía?

²⁴Jehoram bík abu kídílo immín gela, bím Dabidke doolung delo yuto. Jehoramke oo Ahajiah bík sirongem rojape iyanto.

²⁵Israel roja Ahabke oo Joramke rojape ila takying kolang taknyiko yédo delo Jehoramke oo Ahajiah Judahlok rojape yélento.

²⁶Ahajiah rojape ido delo bík dítage tatkying annyi kolang taknyiko ido. Delokke bí Jirusalemlo dítak annyi petomko rojape ito. Bík anede Israel roja Omrike otene. Bík amíne Athaliah.

²⁷Bík yédu-yébyange Ahabke ségu kísa RUUTUM ke kangkolo atírumape yéto, kapeila bí Ahab kelo omum-nyameng iríksuto.

²⁸Ahajiah Ahabke oo Joramme enbosula Ramoth Gilead amonglo Siria lok roja Hajaelme mimak imínsupe ento. Siria ami kídíe Joram me mimak delo tarí moketto.

²⁹Depeila Joram bí Jejreel amonglo enlat sulangkula tarí moketnamdem duupísupe duutoku. Delo Judahlok roja Jehoramke oo Ahajiah bí Ahabke oo Joramme kaanampe Jejreello ento, kapeila bí kido.